ଭଦ୍ରକ ଅଫିସ, ୧୬ା୯:ଦୁଇବର୍ଷ ପରେ ଏଥର ଧୁମ୍ଧାମ୍ରେ ଶାରଦୀୟ ଦୁର୍ଗାପୂଜା ପାଳନ କକରାଯିବ। ଏଥିପାଇଁ ଏବେଠୁ ପ୍ରସ୍ତୁତି ଆରମ୍ଭ ହୋଇଗଲାଣି। ପୂଜା କମିଟି ପକ୍ଷରୁ ଜୋର୍ସୋରରେ ପ୍ରସ୍ତୁତି ସାଙ୍ଗକୁ ମା’ଙ୍କ ମୃଣ୍ମୟୀ ମୂର୍ତ୍ତି ନିର୍ମାଣ ଚାଲିଛି। ଚଳିତବର୍ଷ ଆଡ଼ମ୍ବରରେ ମା’ଙ୍କ ଆବାହନ ପାଇଁ ଭଦ୍ରକର ଆରଡ଼ିଛକ ନିକଟସ୍ଥ ପ୍ରାଚୀନଗର ଦୁର୍ଗାପୂଜା କମିଟି ବିଭିନ୍ନ ଯୋଜନା ପ୍ରସ୍ତୁତ କରିଛି। ୧୯ ବର୍ଷ ଧରି ଏଠାରେ ଦୁର୍ଗାପୂଜା ଅନୁଷ୍ଠିତ ହୋଇଆସୁଥିବା ବେଳେ ଗତ ଦୁଇବର୍ଷ କୋଭିଡ୍ କଟକଣା ଯୋଗୁ ନିରାଡ଼ମ୍ବରରେ ପୂଜାର୍ଚ୍ଚନା କରାଯାଇଥିଲା। ଚଳିତବର୍ଷ ଆଡ଼ମ୍ବରରରେ ପୂଜା କରିବାକୁ ନେଇ ସମସ୍ତଙ୍କ ମନରେ ଉତ୍ସାହ ଦେଖାଦେଇଛି। ଆରଡ଼ି ଛକଠାରୁ ପ୍ରାଚୀନଗର ପର୍ଯ୍ୟନ୍ତ ଦେଢ଼ କିଲୋମିଟର ରାସ୍ତାର ଉଭୟପାର୍ଶ୍ୱ ରଙ୍ଗୀନ ଆଲୋକମାଳାରେ ଝଲସିବ। ଏଥିସହ ୩ଟି ତୋରଣ ମଣ୍ଡପ, ଆରଡ଼ି ଛକ ଓ ପ୍ରାଚୀନଗରରେ ନିର୍ମାଣ କରାଯିବ। କାରିଗରମାନେ ମା’ଙ୍କ ମୃଣ୍ମୟୀ ମୂର୍ତ୍ତି ଓ ପାର୍ଶ୍ୱମୂର୍ତ୍ତି ଗଢ଼ିବାରେ ଲାଗିପଡ଼ିଛନ୍ତି। ମା’ଙ୍କ ପ୍ରତିମାର ଉଚ୍ଚତା ୧୫ ଫୁଟ୍ ରଖାଯାଇଛି। ସପ୍ତମୀ, ଅଷ୍ଟମୀ ଓ ନବମୀ ସନ୍ଧ୍ୟାରେ ପାଲା, ପ୍ରବଚନ ଓ ଭଜନସନ୍ଧ୍ୟା କାର୍ଯ୍ୟକ୍ରମ ରହିଛି। ଷଷ୍ଠୀଠାରୁ ପାଞ୍ଚଦିନ ଦିନ ଧରି ମୀନାବଜାର ପଡ଼ିବ। ଚଳିତବର୍ଷ ୭ଲକ୍ଷରୁ ଊର୍ଦ୍ଧ୍ୱ ଟଙ୍କାର ବଜେଟ୍ ରଖାଯାଇଛି। ପ୍ରାଚୀନଗରରେ ଦେଢ଼ଶହ ପରିବାରକୁ ନେଇ ୨୦୦୪ରେ ଏକ ବୈଠକ କରାଯାଇ ପୂଜା ଆରମ୍ଭ ହୋଇଥିଲା। ପୂଜା କମିଟିକୁ ଜିଲାପାଳଙ୍କ ଅଫିସରେ ପଞ୍ଜୀକୃତ ମଧ୍ୟ କରାଯାଇଛି। କମିଟିରେ ୧୦ ଜଣଙ୍କୁ ଉପଦେଷ୍ଟା ଭାବେ ରଖାଯାଇଛି। ୨୦୦୭ରେ ୫ ଡିସିମିଲ ଜାଗା କମିଟି ନଁାରେ କିଣାଯାଇ ମଣ୍ଡପ ମୁଖଶାଳା, ପୂଜକଙ୍କ ରହିବା ଘର, ରୋଷେଇ ଘର ଆଦି ନିର୍ମାଣ କରାଯାଇଛି।