ଭୁବନେଶ୍ୱର,୮।୯(ବ୍ୟୁରୋ): ୩୦ବର୍ଷରେ ପହଞ୍ଚତ୍ଛି ରସୁଲଗଡ଼ ଦୁର୍ଗାପୂଜା। ୧୯୯୨ରେ ୧୦ରୁ ୧୫ ହଜାର ଟଙ୍କା ମଧ୍ୟରେ ଆରମ୍ଭ ହୋଇଥିବା ପୂଜା ୨୦୧୯ରେ ସର୍ବାଧିକ ୮୦ଲକ୍ଷ ଟଙ୍କାରେ ପହଞ୍ଚତ୍ଥିଲା। ତେବେ କୋଭିଡ୍ ପରିସ୍ଥିତି ପାଇଁ ଆର୍ଥିକ ସ୍ଥିତି ପ୍ରଭାବିତ ହୋଇଥିବାରୁ ଚଳିତ ବର୍ଷ ପୂଜା ବଜେଟ୍ କମ୍ ରଖାଯାଇଛି। ଏଥରର ବଜେଟ ୪୦ଲକ୍ଷ ଟଙ୍କା ମଧ୍ୟରେ ସୀମିତ ରଖିବାକୁ ରସୁଲଗଡ଼ ଦୁର୍ଗାପୂଜା କମିଟି ପକ୍ଷରୁ ନିଷ୍ପତ୍ତି ନିଆଯାଇଛି। ତେବେ ଚଳିତବର୍ଷ ଏଠାରେ ଦିଲ୍ଲୀ ନୋଏଡାର ପ୍ରସିଦ୍ଧ ଅକ୍ଷରଧାମ ମନ୍ଦିରର ତୋରଣ ଆକର୍ଷଣ ସାଜିବ। ୮୦ଫୁଟ୍ ଉଚ୍ଚ ଓ ୧୨୦ ଫୁଟ ଓସାରର ଏହି ତୋରଣ ନିର୍ମାଣରେ କୋଲକାତାର କାରିଗରମାନେ ଲାଗି ପଡିଛନ୍ତି। ତେବେ ମୂର୍ତ୍ତି ସହ ମେଢ଼ର ଉଚ୍ଚତା ୨୨ଫୁଟ ରହିବ। ସ୍ବତନ୍ତ୍ରତା ହେଲା, ସାଜସଜ୍ଜା ଓ ମୂର୍ତ୍ତିରେ ଆଇସକ୍ରିମ୍ କାଠି, ବିଭିନ୍ନ ଫଳର ଚୋପା, ଜାଇଫଳ, ଗୁଆ ଆଦି ଲାଗିବ। ସେହିପରି ଷଷ୍ଠୀଠାରୁ ଦଶମୀ ପର୍ଯ୍ୟନ୍ତ ପୂଜାବିଧି ସହ ପ୍ରତିଦିନ ଖେଚୁଡ଼ି, ଚରୁଅନ୍ନ ଓ ଦହି ପଖାଳ ଆଦି ଭୋଗ ଲାଗିବ। କୋଭିଡ୍ ଭୟ ଏ ପର୍ଯ୍ୟନ୍ତ ଯାଇ ନଥିବାରୁ କମିଟି ପକ୍ଷରୁ ମଧ୍ୟ କେତେକ ବ୍ୟବସ୍ଥା କରାଯାଇଛି। ମାସ୍କ ବଣ୍ଟନ, ସିସିଟିଭି ଓ ଭିଡ ନିୟନ୍ତ୍ରଣ ପାଇଁ ୪୦ ସ୍ବେଚ୍ଛାସେବୀ ନିୟୋଜିତ କରାଯିବ। ସ୍ବତନ୍ତ୍ର ସ୍ବାସ୍ଥ୍ୟ ଶିବିର ମଧ୍ୟ ଆୟୋଜନ କରାଯାଇଛି। ୫ଦିନ ଧରି ହେବାକୁ ଥିବା ଏହି ଉତ୍ସବରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ରହିଛି। ଏଥି ସହିତ ମୀନା ବଜାର, ଖାଦ୍ୟ ଷ୍ଟଲ ଶ୍ରଦ୍ଧାଳୁଙ୍କ ପାଇଁ ବିଶେଷ ଆକର୍ଷଣ ପାଲଟିବ।
କୋଭିଡ୍ ପରବର୍ତ୍ତୀ ଆର୍ଥିକ ସ୍ଥିତିରେ ବିଶେଷ ସୁଧାର ଆସିନାହିଁ। ଚାନ୍ଦା ଆଦାୟକୁ ମଧ୍ୟ ପ୍ରାଧାନ୍ୟ ଦିଆଯାଉନାହିଁ। ୨ବର୍ଷ ପରେ ମା’ ଦୁର୍ଗା ଧରାପୃଷ୍ଠକୁ ଅବତରଣ କରୁଥିବାରୁ ପୂଜା ପ୍ରସ୍ତୁତି ପାଖାପାଖି ୧୫ ଦିନ ହେବ ଆରମ୍ଭ ହୋଇଗଲାଣି। ସମସ୍ତଙ୍କ ସହଯୋଗରେ ପୂଜାର ଆୟୋଜନ କରାଯାଉଛି। ମା’ଙ୍କ ଆଶିଷରେ ସବୁ କିଛି ଠିକ୍ ଭାବରେ ହୋଇଯିବା ଆଶା ରହିଛି।
-ମଳୟ କୁମାର ରାଉତରାୟ, ସଭାପତି