ଇନ୍ଦୋର,୨୫।୭: ମହାମାରୀ କରୋନା ଭାଇରସ ସଙ୍କଟ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶକୁ ‘ଆତ୍ମନିର୍ଭର ଭାରତ’ର ମନ୍ତ୍ର ଦେଇଛନ୍ତି। ଏଥିରୁ ଅନୁପ୍ରାଣିତ ହୋଇ ଜଣେ ମହିଳା ନିଆରା ଢ଼ଙ୍ଗରେ ଇକୋ ଫ୍ରେଣ୍ଡଲି ରାକ୍ଷୀ ଓ ଗଣେଶ ମୂର୍ତ୍ତି ତିଆରି କରିଥିବା ଦେଖିବାକୁ ମିଳିଛି। ଆଗକୁ ଗଣେଶ ଚତୁର୍ଥୀ ଓ ରାକ୍ଷାବନ୍ଧନ ଆସୁଛି। ଏହାକୁ ଦୃଷ୍ଟିରେ ରଖି ମଧ୍ୟପ୍ରଦେଶର ଇନ୍ଦୋରରେ ରହୁଥିବା ଶ୍ୱେତା ପାଲିଓ୍ବାଲ ନାମ୍ନୀ ଜଣେ ମହିଳା ଗାଇର ଗୋବରରୁ ରାକ୍ଷୀ, ଗଣେଶ ମୂର୍ତ୍ତି ଓ ଅନ୍ୟାନ୍ୟ ସାମଗ୍ରୀ ପ୍ରସ୍ତୁତ କରିଛନ୍ତି।
ଗଣେଶଙ୍କ ମୂର୍ତ୍ତି ତିଆରି କରିବା ପାଇଁ ସେ ଏଥିରେ ଗାଇର ଗୋବର, ତୁଳସୀ ମଞ୍ଜି ଓ ଅନ୍ୟାନ୍ୟ ଜିନିଷ ବ୍ୟବହାର କରିଛନ୍ତି। ଯାହା ହାଲୁକା ହେବା ସହ ପରିବେଶକୁ କ୍ଷତି ମଧ୍ୟ ପହଞ୍ଚାଇବ ନାହିଁ। ଆଉ ଏହି ମୂର୍ତ୍ତି ଓ ରାକ୍ଷୀକୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିକଟକୁ ପଠାଇବେ ବୋଲି ଶ୍ୱେତା କହିଛନ୍ତି। ସୂଚନାଯୋଗ୍ୟ, ଶ୍ୱେତା ଚାଇନାର ସାମଗ୍ରୀକୁ ବଏକଟ୍ କରିବା ସହ ଭାରତରେ ଉତ୍ପାଦିତ ସାମଗ୍ରୀକୁ ପ୍ରୋତ୍ସାହିତ କରିଛନ୍ତି। ଶ୍ୱେତା ଡିଜାଇନର୍ ମାସ୍କ ମଧ୍ୟ ତିଆରି କରୁଛନ୍ତି। କଟନରେ ତିଆରି ହୋଇଥିବା ମାସ୍କ ଗୁଡ଼ିକରେ ବିଭିନ୍ନ ରଙ୍ଗ ଓ ଡିଜାଇନ୍ରେ ସେ ଚିତ୍ରିଣ କରୁଥିବା ଜଣାପଡ଼ିଛି। ପ୍ରକୃତିକୁ ଧ୍ୟାନରେ ରଖି ସେ ଏଭଳି ପନ୍ଥା ଆପଣାଇଛନ୍ତି ବୋଲି ଶ୍ୱେତା କହିଛନ୍ତି।