ମୁମ୍ବାଇ: ରିଲାଏନ୍ସ ଇଣ୍ଡଷ୍ଟ୍ରିଜ୍ ଚେୟାରମ୍ୟାନ ମୁକେଶ ଅମ୍ବାନୀ ଏବଂ ତାଙ୍କ ପରିବାର ସହ ଏକ ଫଟୋ ଭାଇରାଲ ହେବାରେ ଲାଗିଛି। ତାଙ୍କ ସହ ଫଟୋରେ ଦେଖାଯାଇଥିବା ମହିଳାଙ୍କ ପାକିସ୍ତାନ ସହ ସମ୍ପର୍କ ରହିଛି, ଏହି କାରଣରୁ ପାକିସ୍ତାନରେ ଏହି ଫଟୋ ଉପରେ ଅଧିକ ଚର୍ଚ୍ଚା ହେଉଛି। ପାକିସ୍ତାନ ଗଣମାଧ୍ୟମ ଅନୁଯାୟୀ, ମୁକେଶ ଅମ୍ବାନୀଙ୍କ ସହ ଦେଖାଯାଇଥିବା ମହିଳା ଜଣେ ନେତା, ଯାହାଙ୍କ ନାମ ଶର୍ମିଳା ଫାରୁକୀ। ସେ ବିଲାଓ୍ବାଲ ଭୂଟ୍ଟୋଙ୍କ ପାକିସ୍ତାନ ପିପୁଲ୍ସ ପାର୍ଟି (ପିପିପି)ର ନେତ୍ରୀ। ଭାଇରାଲ ଫଟୋରେ ଶର୍ମିଳା ତାଙ୍କ ସ୍ବାମୀ ହାସନ ଶେଖ ଏବଂ ପିଲାମାନଙ୍କ ସହିତ ନଜର ଆସିଛନ୍ତି।
ମିଡିଆ ରିପୋର୍ଟ ଅନୁଯାୟୀ, ଏହି ଫଟୋ ପ୍ୟାରିସର ଡିଜ୍ନିଲାଣ୍ଡରୁ ଆସିଛି। ଆମେ ଆପଣଙ୍କୁ କହି ରଖୁଛୁ ଯେ, ଭାରତର ସବୁଠାରୁ ଧନୀ ବ୍ୟକ୍ତି ବର୍ତ୍ତମାନ ତାଙ୍କ ସ୍ତ୍ରୀ ନୀତା ଅମ୍ବାନୀ ଏବଂ ଝିଅ ଇଶା ଅମ୍ବାନୀଙ୍କ ସମେତ ଫ୍ରାନ୍ସର ରାଜଧାନୀରେ ଅଛନ୍ତି। ଏହି ସମୟରେ ଏହି ଫଟୋ ଦେଖିବାକୁ ମିଳିଛି। ଯେତେବେଳେ ଶର୍ମିଳା ଇନ୍ଷ୍ଟାଗ୍ରାମରେ ଶେୟାର କରିଥିଲେ। ତାହା ପରେ ଏହି ଫଟୋ ଭାଇରାଲ ହୋଇଥିଲା। ସେ ଏଥିରେ କ୍ୟାପଶନ ଲେଖିଛନ୍ତି, ମୁକେଶ ଅମ୍ବାନୀଙ୍କ ସହ। ଫଟୋରେ ମୁକେଶ ଅମ୍ବାନୀ ତାଙ୍କ ନାତୁଣୀ ସହିତ ନଜର ଆସିଛନ୍ତି। ଡିଜ୍ନୀଲାଣ୍ଡରେ ବୁଲୁଥିବା ସମୟରେ ମୁକେଶ ଏବଂ ପାକିସ୍ତାନୀ ମହିଳା ସାକ୍ଷାତ ହୋଇଥିଲେ, ଯେଉଁଥିରେ ଏହି ସେଲ୍ଫି ନିଆଯାଇଥିଲା। ଶର୍ମିଳା ମଧ୍ୟ ଇଶା ଅମ୍ବାନୀଙ୍କ ସହ ସେଲ୍ଫି ନେଇଥିଲେ।
ପାକିସ୍ତାନର ସିନ୍ଧ୍ର ଜଣେ ବିଶିଷ୍ଟ ରାଜନେତା ଫାରୁକୀ ୨୫ ଜାନୁୟାରୀ ୧୯୮୭ରେ ଜନ୍ମଗ୍ରହଣ କରିଥିଲେ। ସେ ଦୁଇଥର ସିନ୍ଧ୍ ବିଧାନସଭା ସଦସ୍ୟ ଭାବରେ ନିର୍ବାଚିତ ହୋଇଛନ୍ତି। ଶର୍ମିଳାଙ୍କ ପରିବାର ଦୀର୍ଘଦିନ ଧରି ରାଜନୀତି ସହ ଜଡ଼ିତ ଥିଲେ। ସେ ପାକିସ୍ତାନର ପୂର୍ବତନ ଅର୍ଥମନ୍ତ୍ରୀ ଏନ୍ଏମ୍ ଉକାଲିଙ୍କ ନାତୁଣୀ। ସେ ୧୯୮୧ରୁ ୧୯୯୬ ପର୍ଯ୍ୟନ୍ତ ପାକିସ୍ତାନ ଷ୍ଟିଲ୍ ମିଲ୍ସର ପୂର୍ବତନ ଚେୟାରମ୍ୟାନ ଥିଲେ। ୨୦୨୧ରେ ତାଙ୍କର ଦେହାନ୍ତ ଘଟିଥିଲା। ତାଙ୍କ ପରିବାର ପାକିସ୍ତାନ ଷ୍ଟିଲ୍ ମିଲ୍ସରୁ ୧.୯୫ ବିଲିୟନ ଡଲାରର ଅପବ୍ୟବହାର ଅଭିଯୋଗ ସହିତ ଅନେକ ବିବାଦରେ ଛନ୍ଦି ହୋଇଯାଇଛନ୍ତି।