ପୁରୀ ଅଫିସ,୨୪ା୧୦: ଶାରଦୀୟ ଦୁର୍ଗାପୂଜାର ସମସ୍ତ ରୀତିନୀତି କିପରି ଶାନ୍ତିଶୃଙ୍ଖଳାର ସହ ସମ୍ପନ୍ନ ହେବ ତାହା ଉପରେ ଗୁରୁତ୍ୱ ଦେଇଛି ପୁରୀ ଜିଲା ପ୍ରଶାସନ। ଚଳିତବର୍ଷ ମହାମାରୀ କରୋନା ପାଇଁ ସବୁକିଛି ନିରାଡ଼ମ୍ବର ଭାବେ କରାଯିବ। ମା’ ଦୁର୍ଗା ଓ ଗୋଷାଣି ପୂଜା ବିଭିନ୍ନ ମଣ୍ଡପରେ କଟକଣା ଭିତରେ ଚାଲିଛି। ଭସାଣି ମଧ୍ୟ ସରକାରୀ କଟକଣା ଏବଂ ହାଇକୋର୍ଟ କୋର୍ଟଙ୍କ ନିର୍ଦ୍ଦେଶ ଅନୁଯାୟୀ କରାଯିବ। ଏ ନେଇ ଜିଲା ପ୍ରଶାସନ ପକ୍ଷରୁ ଶୁକ୍ରବାର ଜଗନ୍ନାଥ ବଲ୍ଲଭ ପରିସରରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ବଲୱନ୍ତ ସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ସାହିଯାତ କମିଟି ଓ ବିଭିନ୍ନ ପୂଜା କମିଟିର କର୍ମକର୍ତ୍ତା ଯୋଗଦେଇଥିଲେ। ଜିଲାପାଳ ସିଂ ଏବଂ ଏସ୍ପି ଅଖିଳେଶ୍ୱର ସିଂ ସବୁ କମିଟିକୁ ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ପୂଜା କାର୍ଯ୍ୟ ସମ୍ପନ୍ନ କରିବାକୁ ଅନୁରୋଧ କରିଥିଲେ। ମହାମାରୀ କରୋନା ବିପଦ ଏ ପର୍ଯ୍ୟନ୍ତ ଟଳି ନାହିଁ। ତେଣୁ ସମସ୍ତଙ୍କୁ ଏଥିପ୍ରତି ନଜର ରଖିବାକୁ ପଡ଼ିିବ। ଏଥର ଭସାଣି ନିରାଡମ୍ବର ଭାବେ କରାଯିବ। କୌଣସି ବାଜା ବାଜିବ ନାହିଁ କି ଶୋଭାଯାତ୍ରା ହେବ ନାହିଁ। ଆଲୋକ ସାଜସଜା ମଧ୍ୟ ହେବନି। ମଙ୍ଗଳାଘାଟଠାରେ ସମସ୍ତ ମୂର୍ତ୍ତି ବିସର୍ଜନ କରାଯିବ। ଏଥିପାଇଁ ପୁରୀ ପୌରସଂସ୍ଥା ପକ୍ଷରୁ ଅସ୍ଥାୟୀ ପୋଖରୀ ପ୍ରସ୍ତୁତ କରାଯିବ। କୋଭିଡ୍ ଗାଇଡ଼ଲାଇନ ଅନୁପାଳନ କରାଯାଇ ଆସନ୍ତା ୨୭ ତାରିଖ ଏକାଦଶୀରେ ଭସାଣି କରାଯିବ। ସିଂହଦ୍ୱାର ସମ୍ମୁଖକୁ ସବୁ ମୂର୍ତ୍ତି ଆସିବେ। ଏକାଦଶୀ ଦୀପ ଉଠିବା ପରେ ଗୋଟିକ ପରେ ଗୋଟିଏ ମୂର୍ତ୍ତି ଭସାଣି ପାଇଁ ନିଆଯିବ ବୋଲି ନିଷ୍ପତ୍ତି ହୋଇଛି। ବୈଠକରେ ଅନ୍ୟମାନଙ୍କ ମଧ୍ୟରେ ଉପଜିଲାପାଳ ଭବତାରଣ ସାହୁଙ୍କ ସମେତ ବିଭିନ୍ନ ଥାନା ଅଧିକାରୀ ଯୋଗଦେଇଥିଲେ।
ଗାଇଡ୍ଲାଇନ୍ ଅନୁପାଳନକୁ ବିଏମ୍ସିର ଗୁରୁତ୍ୱ
ଭୁବନେଶ୍ୱର, ୨୩ା୧୦ (ବ୍ୟୁରୋ): ଭୁବନେଶ୍ୱରରେ ସଂକ୍ରମଣ କମୁଥିଲେ ମଧ୍ୟ ଏବେ ବି ଜଟିଳ ସ୍ଥିତି ସୁଧୁରିନାହିଁ। ଦୁର୍ଗାପୂଜାରେ ଯେପରି ସଂକ୍ରମଣ ବୃଦ୍ଧି ନ ହେବ ସେଥିପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଗୁରୁତ୍ୱ ଦେବା ସହ ଏହା ଉପରେ ସ୍ବତନ୍ତ୍ର ନଜର ରଖିଛି। ଏଥିପାଇଁ ଶୁକ୍ରବାର ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ସମସ୍ତ ପୂଜା କମିଟି ସହ ଆଲୋଚନା କରି ସହଯୋଗ ଲୋଡ଼ିଛନ୍ତି। ରାଜ୍ୟ ସରକାରଙ୍କ ପକ୍ଷରୁ ଜାରି ହୋଇଥିବା ଗାଇଡ୍ଲାଇନ୍କୁ ଅନୁପାଳନ କରିବାକୁ ସେ ନିବେଦନ କରିଛନ୍ତି।
ବିଏମ୍ସି ମୁଖ୍ୟାଳୟରେ ଆୟୋଜିତ ବୈଠକରେ କମିଶନର ଚୌଧାରୀ ଗାଇଡ୍ଲାଇନ୍ ସଂକ୍ରାନ୍ତରେ ପୂଜା କମିଟି କର୍ମକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ। ସେ କହିଲେ, ପ୍ରଦୂଷଣ ନିୟନ୍ତ୍ରଣ ପାଇଁ ମା’ ଦୁର୍ଗାଙ୍କ ମୂର୍ତ୍ତିରେ ରାସାୟନିକ ପଦାର୍ଥ ବ୍ୟବହାରକୁ ବାରଣ କରାଯାଇଛି। ମଣ୍ଡପରେ ସ୍ବଚ୍ଛତା ବଜାୟ ରଖିବା ସହ ଆବଶ୍ୟକ ଡଷ୍ଟବିନ୍ର ବ୍ୟବସ୍ଥା କରିବା, ପୂଜା ପରେ କୃତ୍ରିମ ପୋଖରୀରେ ମା’ଙ୍କ ମୂର୍ତ୍ତିକୁ ବିସର୍ଜନ କରିବାକୁ ପରାମର୍ଶ ଦେଇଥିଲେ। ଏହି ମଧ୍ୟରେ ପରିବେଶ ବିଶେଷଜ୍ଞ, ଜୋନାଲ ଡେପୁଟି କମିଶନର, ଏନ୍ଜିଓ ସଦସ୍ୟ ଓ ପୂଜା କମିଟିର ବରିଷ୍ଠ ସଦସ୍ୟଙ୍କୁ ନେଇ ଗଠିତ ଟିମ୍ ଯାଞ୍ଚ ପ୍ରକ୍ରିୟା ଶେଷ କରିଛନ୍ତି। ନିୟମ ଖିଲାପ କରୁଥିବା ନଜରକୁ ଆସିଲେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଜରିମାନା ଆଦାୟ କରିବାକୁ କମିଶନର ଚୌଧାରୀ ନିର୍ଦ୍ଦେଶ ଦେଇଛନ୍ତି। ବିଏମ୍ସି ମୁଖ୍ୟାଳୟରେ ଆୟୋଜିତ ଏହି ବୈଠକରେ ବିଭାଗୀୟ ଅନ୍ୟ ଅଧିକାରୀ ଓ ବିଭିନ୍ନ ପୂଜା କମିଟି ସଦସ୍ୟ ଉପସ୍ଥିତ ଥିଲେ।