ପୁରୀ ଅଫିସ, ୧୦।୨: ଚଳିତ ବର୍ଷ ମହାପ୍ରଭୁଙ୍କର ଦୁର୍ଲ୍ଲଭ ନାଗାର୍ଜୁନ ବେଶ ହେବ ନାହିଁ। କାରଣ ଚଳିତବର୍ଷର ପଞ୍ଜିକାରେ ଏହା ପଡୁନାହିଁ। ମଙ୍ଗଳବାର ଶ୍ରୀମନ୍ଦିର କାର୍ଯ୍ୟାଳୟରେ ଆୟୋଜିତ ନୀତିକାନ୍ତି ନିର୍ଦ୍ଧାରଣ ବୈଠକ ପରେ ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ଏହି ସୂଚନା ଦେଇଛନ୍ତି। ଫଳରେ ଏ ନେଇ ଦୀର୍ଘଦିନ ଧରି ଚାଲିଥିବା ସମସ୍ତ କଳ୍ପନାଜଳ୍ପନାର ଅବସାନ ଘଟିଛି।
ଚଳିତବର୍ଷ ପଣାସଂକ୍ରାନ୍ତିଠାରୁ ବର୍ଷସାରା ହେବାକୁ ଥିବା ଦାରୁଦିଅଁଙ୍କ ନୀତିକାନ୍ତି ସଂକ୍ରାନ୍ତ ବୈଠକରେ ଶ୍ରୀମନ୍ଦିର ନୀତି ପ୍ରଶାସକ ସଭାପତିତ୍ୱ କରିଥିଲେ। ଏଥିରେ ମୁକ୍ତିମଣ୍ଡପ ପଣ୍ଡିତ ସଭାର ସଦସ୍ୟ, ପଞ୍ଜିକାର, ପୂଜାପଣ୍ଡା ନିଯୋଗ, ଶ୍ରୀମନ୍ଦିର ପରିଚାଳନା କମିଟି ଏବଂ ଦେଉଳ କରଣର ସଦସ୍ୟମାନେ ଉପସ୍ଥିତ ଥିଲେ। ସମସ୍ତଙ୍କ ସହମତି କ୍ରମେ ମେଷ ମାସଠାରୁ ମୀନ ମାସ ପର୍ଯ୍ୟନ୍ତ ଶ୍ରୀମନ୍ଦିରରେ ନୀତିକାନ୍ତି ଓ ପର୍ବପର୍ବାଣି ନୀତି ନିର୍ଘଣ୍ଟ ହୋଇଛି। ଏହି ନିର୍ଦ୍ଧାରିତ ନୀତିକାନ୍ତି ଆଧାରରେ ହିଁ ପଞ୍ଜିକା ପ୍ରସ୍ତୁତ କରିବା ପାଇଁ ପଞ୍ଜିକାରମାନଙ୍କୁ ପରାମର୍ଶ ଦିଆଯାଇଛି। ପ୍ରତିବର୍ଷ ଏଭଳି ଭାବେ ପଞ୍ଜିକାରମାନେ ପଞ୍ଜିକା ପ୍ରସ୍ତୁତ ପରେ ପାଣ୍ଡୁଲିପି ପ୍ରଦାନ କରିଥାଆନ୍ତି। ତାହାକୁ ମୁକ୍ତିମଣ୍ଡପ ପଣ୍ଡିତ ସଭାକୁ ଦିଆଯାଇଥାଏ। ପଣ୍ଡିତମାନେ ଏହାର ଅନୁଶୀଳନ କରିବା ପରେ ପଞ୍ଜିକା କମିଟିର ସଦସ୍ୟମାନେ ଏ ନେଇ ଚୂଡ଼ାନ୍ତ ମୋହର ମାରିଥାନ୍ତି। ତେବେ ଚଳିତବର୍ଷ ପଞ୍ଜିକାରେ ନାଗାର୍ଜୁନ ବେଶ ପଡୁ ନ ଥିବା ମୁକ୍ତିମଣ୍ଡପ ପଣ୍ଡିତ ସଭା କହିଛି। ପୂର୍ବରୁ କେତେକ କ୍ୟାଲେଣ୍ଡର ଓ ପଞ୍ଜିକାରେ ଚଳିତବର୍ଷ ନାଗାର୍ଜୁନ ବେଶ ପଡୁଥିବା ନେଇ ଦର୍ଶାଯାଇଥିଲା। ତେବେ ଏହା ସତ୍ୟ ନୁହେଁ ବୋଲି ମୁକ୍ତିମଣ୍ଡପ ପଣ୍ଡିତ ସଭା ପ୍ରକାଶ କରିଛି। ଏଭଳି ଭୁଲ ତଥ୍ୟ ଦେଉଥିବା ପଞ୍ଜିକା ଓ କ୍ୟାଲେଣ୍ଡର ଛପା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପଣ୍ଡିତ ସଭା ଦାବି କରିଛି।
