ଭୁବନେଶ୍ୱର,୨।୩: ପ୍ରତ୍ୟେକ ବର୍ଷ ଯୁକ୍ତ ଦୁଇ ପରୀକ୍ଷାରେ ଭଲ ପ୍ରଦର୍ଶନ କରିଥିବା ରାଜ୍ୟର ୧୫ ହଜାର ମେଧାବୀ ଛାତ୍ରୀଛାତ୍ରଙ୍କୁ ରାଜ୍ୟ ସରକାରଙ୍କ ତରଫରୁ ବିଜୁ ଯୁବ ସଶକ୍ତିକରଣ ଯୋଜନାରେ ଲାପଟପ୍ ବଣ୍ଟନ କରାଯାଏ। ୨୦୧୩ରୁ ଛାତ୍ରୀଛାତ୍ରଙ୍କୁ ଲାପଟପ୍ ପ୍ରଦାନ କରାଯାଉଛି। କିନ୍ତୁ ଚଳିତବର୍ଷ ବିଜୁ ଯୁବ ସଶକ୍ତିକରଣ ଯୋଜନାରେ ଲାପଟପ୍ ପ୍ରଦାନ କରାଯିବ ନାହିଁ। ଏ ନେଇ ରାଜ୍ୟ ସରକାର ମଙ୍ଗଳବାର ସୂଚନା ଦେଇଛନ୍ତି। ତେବେ ଚଳିତ ବର୍ଷ ଲାପଟପ୍ ବଦଳରେ ଛାତ୍ରୀଛାତ୍ରଙ୍କୁ ମିଳିବ ୩୦ ହଜାର ଟଙ୍କା। ଡାଇରେକ୍ଟ ବେନିଫିଟ ଟ୍ରାନ୍ସଫର(ଡିବିଟି) ମାଧ୍ୟମରେ ସେମାନଙ୍କ ଆକାଉଣ୍ଟକୁ ଟଙ୍କା ପଠାଯିବ। ଯଦ୍ଦ୍ବାରା ସେମାନେ ନିଜ ଇଚ୍ଛାନୁସାରେ ଲାପଟପ୍ କିଣିପାରିବେ। ଏହି ଟଙ୍କା ପାଇବା ପାଇଁ ମେଧାବୀ ଛାତ୍ରୀ ଛାତ୍ରଙ୍କୁ ଚଳିତ ମାସ ୧୮ ତାରିଖ ସୁଦ୍ଧା ଉଚ୍ଚଶିକ୍ଷା ବିଭାଗର ୱେବସାଇଟ୍ରେ ଆବଶ୍ୟକ ଦସ୍ତାବିଜ ଅପଲୋଡ କରିବାକୁ ପଡ଼ିବ।
