ନୂଆଦିଲ୍ଲୀ, ୪ା୮ (ପି.ଟି.)-କୋଭିଡ୍-୧୯ ଯୋଗୁ ଦୁଇଥର କାର୍ଯ୍ୟସୂଚୀରେ ପରିବର୍ତ୍ତନ କରାଯିବା ପରେ ଥୋମାସ୍ ଓ ଉବର କପ୍ ଫାଇନାଲ ଡେନମାର୍କର ଆରହସ୍ଠାରେ ଅକ୍ଟୋବର ୩ରୁ ୧୧ ପର୍ଯ୍ୟନ୍ତ ଆୟୋଜନ ପାଇଁ ସ୍ଥିର ହୋଇଛି। ଏଥିରେ ଭାରତ ଅପେକ୍ଷାକୃତ ସହଜ ଡ୍ର’ରେ ସ୍ଥାନ ପାଇଛି। ଭାରତୀୟ ପୁରୁଷ ବ୍ୟାଡ୍ମିଣ୍ଟନ ଦଳ ଗ୍ରୁପ୍ ସି’ରେ ସ୍ଥାନ ପାଇଛି। ଏହି ଗ୍ରୁପ୍ରେ ୨୦୧୬ ଚାମ୍ପିୟନ ଡେନମାର୍କ, ଜର୍ମାନୀ ଓ ଆଲଜେରିଆ ସ୍ଥାନ ପାଇଛନ୍ତି। ଅନ୍ୟପକ୍ଷରେ ମହିଳା ଦଳକୁ ୧୪ଥର ବିଜେତା ଚାଇନା, ଫ୍ରାନ୍ସ ଓ ଜର୍ମାନୀ ସହ ଗ୍ରୁପ୍ ଡି’ରେ ସ୍ଥାନ ମିଳିଛି। କୁଆଲାଲମ୍ପୁରସ୍ଥିତ ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ମୁଖ୍ୟ କାର୍ଯ୍ୟାଳୟରେ ସୋମବାର ଡ୍ର’ ଅନୁଷ୍ଠିତ ହୋଇଥିଲା। ଟୁର୍ନାମେଣ୍ଟରେ ଉଭୟ ମହିଳା ଓ ପୁରୁଷ ଦଳ ୫ମ ସିଡ୍ ମାନ୍ୟତା ଲାଭ କରିଛନ୍ତି। ୧୩ ଥର ପୂର୍ବତନ ଚାମ୍ପିୟନ ଇଣ୍ଡୋନେସିଆ ଏବଂ ପୂର୍ବତନ ୬ଥର ଚାମ୍ପିୟନ ଜାପାନ ଯଥାକ୍ରମେ ଥୋମାସ କପ୍ ଓ ଉବର କପ୍ରେ ଟପ୍ ସିଡ୍ ମାନ୍ୟତା ଲାଭ କରିଛନ୍ତି। ଏହି ସମ୍ମାନଜନକ ଇଭେଣ୍ଟ ପ୍ରକୃତରେ ମେ’ ୧୬ରୁ ୨୪ ପର୍ଯ୍ୟନ୍ତ ଅନୁଷ୍ଠିତ ହୋଇଥାନ୍ତା କିନ୍ତୁ ଏହା ଅଗଷ୍ଟ ୧୫ରୁ ୨୩କୁ ଘୁଞ୍ଚାଇ ଦିଆଯାଇଥିଲା। ଶେଷରେ ଏହାକୁ ଅକ୍ଟୋବରରେ କରିବା ଲାଗି ନିଷ୍ପତ୍ତି ନିଆଯାଇଛି। କରୋନା ଭାଇରସ୍ ଯୋଗୁ ବିଡବ୍ଲ୍ୟୁଏଫ୍ ମାର୍ଚ୍ଚରେ ଅଲ୍ ଇଂଲଣ୍ଡ ପ୍ରତିଯୋଗିତା ପରଠାରୁ ଏହାର ଓ୍ବାଲର୍ଡ ଟୁର୍ ଏବଂ ସ୍ବୀକୃତିପ୍ରାପ୍ତ ଅନ୍ୟ ଟୁର୍ନାମେଣ୍ଟଗୁଡ଼ିକୁ ଶଟ୍ ଡାଉନ୍ କରି ଦେଇଥିଲା। ଥୋମାସ ଓ ଉବର କପ୍ ଫାଇନାଲରେ ପ୍ରତି ଗ୍ରୁପ୍ର ଶ୍ରେଷ୍ଠ ଦୁଇ ଦଳ ନକ୍ ଆଉଟ୍ ପର୍ଯ୍ୟାୟକୁ ଉନ୍ନୀତ ହେବେ। ୨୦୧୮ରେ ଅନୁଷ୍ଠିତ ଗତ ସଂସ୍କରଣରେ ଭାରତୀୟ ମହିଳା ଓ ପୁରୁଷ ଦଳ ନକ୍ଆଉଟ ଷ୍ଟେଜ୍କୁ ଉନ୍ନୀତ ହୋଇ ପାରି ନ ଥିଲେ। ଉବର କପ୍ର ୨୦୧୬ ସଂସ୍କରଣ ସେମିଫାଇନାଲ ଷ୍ଟେଜ୍ରେ ଭାରତୀୟ ମହିଳା ଦଳ ଚାଇନାଠାରୁ ପରାଜିତ ହୋଇଥିଲା। ସେମାନେ ଆହୁରି ମଧ୍ୟ ୨୦୧୪ ନୂଆଦିଲ୍ଲୀ ସଂସ୍କରଣରେ ସେମିଫାଇନାଲରେ ପ୍ରବେଶ କରିପାରିଥିଲେ।
ଥୋମାସ୍ କପ୍ (ପୁରୁଷ)
ଗ୍ରୁପ୍ ଏ’: ଇଣ୍ଡୋନେସିଆ, ମାଲେସିଆ, ହଲାଣ୍ଡ ଓ ଇଂଲଣ୍ଡ।
ଗ୍ରୁପ୍ ବି’: ଚାଇନା, ତାଇଓ୍ବାନ, ଅଷ୍ଟ୍ରେଲିଆ ଓ ଫ୍ରାନ୍ସ।
ଗ୍ରୁପ୍ ସି’: ଡେନମାର୍କ, ଭାରତ, ଜର୍ମାନୀ ଓ ଆଲଜେରିଆ।
ଗ୍ରୁପ୍ ଡି’: ଜାପାନ, ଦକ୍ଷିଣ ଆଫ୍ରିକା, ଥାଇଲାଣ୍ଡ ଓ କାନାଡା।
ଉବର କପ୍ (ମହିଳା)
ଗ୍ରୁପ ଏ’: ଜାପାନ, ତାଇଓ୍ବାନ, ଇଜିପ୍ଟ ଓ ସ୍ପେନ୍।
ଗ୍ରୁପ୍ ବି’: କୋରିଆ, ଇଣ୍ଡୋନେସିଆ, ଅଷ୍ଟ୍ରେଲିଆ ଓ ମାଲେସିଆ।
ଗ୍ରୁପ୍ ସି’: ଥାଇଲାଣ୍ଡ, ଡେନମାର୍କ, ସ୍କଟଲାଣ୍ଡ ଓ କାନାଡା।
ଗ୍ରୁପ୍ ଡି’: ଚାଇନା, ଭାରତ, ଫ୍ରାନ୍ସ ଓ ଜର୍ମାନୀ।