ଚେନ୍ନାଇ, ୩୧।୭ : ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ କହିଛନ୍ତି ଯେ ଭାରତ ଉପରେ ଗୋଟିଏ ଭାଷା, ଗୋଟିଏ ଧର୍ମ ଏବଂ ଗୋଟିଏ ସଂସ୍କୃତି ଲାଗୁ କରିବା ସମ୍ଭବ ନୁହେଁ। ସେ କହିଛନ୍ତି ଯେ ଯେଉଁମାନେ ଗୋଟିଏ ଭାଷା ଏବଂ ଗୋଟିଏ ଧର୍ମକୁ ପ୍ରୋତ୍ସାହିତ କରୁଛନ୍ତି ସେମାନେ ଆମର ଏକତା ଭାଙ୍ଗିବାକୁ ଚେଷ୍ଟା କରୁଛନ୍ତି ଏବଂ ସେମାନେ ଭାରତ ଏବଂ ଭାରତୀୟଙ୍କର ପ୍ରକୃତ ଶତ୍ରୁ। ଏହା ସହିତ ଷ୍ଟାଲିନ ଡିଏମକେ ସଦସ୍ୟଙ୍କ ସମେତ ୨୭ ଏମ୍ ପିଙ୍କୁ ନିଲମ୍ବନ କରିବା କାର୍ଯ୍ୟ ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ ଏହା ଭାରତୀୟ ଗଣତନ୍ତ୍ରର ଅବସ୍ଥା ବୋଲି କହି ସେ ଚିନ୍ତା ପ୍ରକଟ କରିଛନ୍ତି।
କେରଳର ତ୍ରିସୁରରେ ଆୟୋଜିତ ହୋଇଥିବା ଏକ ସମ୍ମିଳନୀକୁ ଚେନ୍ନାଇରୁ ଭର୍ଚୁଆଲ ଭାବେ ସମ୍ବୋଧିତ କରିବାବେଳେ ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଭାଜପା ଏବଂ କେନ୍ଦ୍ର ସରକାରଙ୍କୁ କଡା ସମାଲୋଚନା କରିଛନ୍ତି। ଏମ୍ ପିଙ୍କ ନିଲମ୍ବନକୁ ନେଇ ଉଦବେଗ ପ୍ରକାଶ କରି ସେ କହିଛନ୍ତି ଯେ ଅଭିବ୍ୟକ୍ତିର ଅଧିକାରକୁ ଛଡ଼ାଇ ନିଆଯାଇଛି। ଷ୍ଟାଲିନ କେନ୍ଦ୍ରର ଭାଜପା ସରକାରଙ୍କୁ ଏହାର ରାଜ୍ୟପାଳଙ୍କ ମାଧ୍ୟମରେ ସମାନ୍ତରାଳ ସରକାର ଚଳାଇବାକୁ ଚେଷ୍ଟା କରୁଥିବା ଅଭିଯୋଗ କରିଛନ୍ତି। ଷ୍ଟାଲିନ କହିଛନ୍ତି ଯେ ଏଭଳି ଚିନ୍ତାଧାରା ଏବଂ ନୀତି ଲୋକ ବିରୋଧୀ।
ଭାରତରେ ଭିନ୍ନତା ମଧ୍ୟରେ ଏକତା ଯୁଗଯୁଗରୁ ରହି ଆସିଛି। ତେବେ ଭାଜପା ସମାନତା ମାଧ୍ୟମରେ କଦାପି ଏକତା ହାସଲ କରିପାରିବ ନାହିଁ । ଷ୍ଟାଲିନ କହିଛନ୍ତି ଯେ ଭାରତକୁ ଶକ୍ତିଶାଳୀ କରିବା ପାଇଁ ଫେଡେରାଲଜିମ, ରାଜ୍ୟ ସ୍ବାଧୀନତା, ଧର୍ମନିରପେକ୍ଷତା, ସମାନତା, ଭ୍ରାତୃଭାବ, ସମାଜବାଦ ଏବଂ ସାମାଜିକ ନ୍ୟାୟକୁ ଅଧିକ ସଶକ୍ତ କରାଯିବା ଜରୁରୀ। ଶକ୍ତିଶାଳୀ, ସମୃଦ୍ଧ ରାଜ୍ୟଗୁଡ଼ିକ ଦ୍ୱାରା ଭାରତ ଉପକୃତ ହେବ। ଶକ୍ତିଶାଳୀ ଏବଂ ଆତ୍ମନିର୍ଭରଶୀଳ ରାଜ୍ୟଗୁଡ଼ିକ ହେଉଛି ଭାରତର ଶକ୍ତି, ଦେଶର ଦୁର୍ବଳତା ନୁହେଁ।
କେନ୍ଦ୍ର ସରକାର ଫେଡେରାଲବାଦ ନୀତି ଅନୁସରଣ କରୁନାହାଁନ୍ତି ବୋଲି ଅଭିଯୋଗ କରି ଷ୍ଟାଲିନ କହିଛନ୍ତି ଯେ ଭାରତକୁ ଏକଜୁଟ କରିବା ପାଇଁ ପ୍ରୟାସକୁ ସ୍ବୀକାର କରାଯିବା ଉଚିତ। ଏଥିପାଇଁ ସମସ୍ତଙ୍କୁ ଆଗକୁ ଆସିବାକୁ ପଡିବ। ସେ କହିଛନ୍ତି ଯେ ଆଜି ଭାରତୀୟ ଗଣତନ୍ତ୍ରର ଅବସ୍ଥା ଏଭଳି ହୋଇଛି ଯେ, ସଂସଦରେ ଏମ୍ପିମାନଙ୍କର କିଛି କହିବାର ଅଧିକାର ନାହିଁ!
ଏହି କାର୍ଯ୍ୟକ୍ରମରେ ଉପସ୍ଥିତ ଥିବା କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କୁ ପ୍ରଶଂସା କରିଥିଲେ। ଏହା ସହିତ ଷ୍ଟାଲିନ ସାମ୍ବାଦିକମାନଙ୍କୁ ଗିରଫ କରିବା ଏକ ସ୍ବେଛାଚାରୀ ଆଚରଣ ବୋଲି କହିଥିଲେ ଏବଂ କେନ୍ଦ୍ରୀୟ ଏଜେନ୍ସି ବିରୋଧୀ ଦଳର ନେତାମାନଙ୍କୁ ଟାର୍ଗେଟ କରୁଥିବା ଅଭିଯୋଗ କରିଥିଲେ।