କେନ୍ଦୁଝର,୨୨ା୧୨(ସ୍ବ.ପ୍ର.): କେନ୍ଦୁଝର ଜିଲା ଦେଇ ଯାଇଥିବା ମୁମ୍ବାଇ – କୋଲକାତା ଜାତୀୟ ରାଜପଥ (ଏନ୍ଏଚ୍) ୪୯ରେ ସଦର ଥାନା ଅନ୍ତର୍ଗତ ଠାକୁରଡିହି ନିକଟରେ ଦୁଇଟି ଟ୍ରକ୍ ବ୍ରେକ ଡାଉନ ହେବାରୁ ସୋମବାରଠାରୁ ଯାତାୟାତ ଠପ୍ ହୋଇଯାଇଛି। ଏହି ରାସ୍ତାରେ ହଜାର ହଜାର ସଂଖ୍ୟାରେ ଲୁହାପଥର ବୋଝେଇ ଟ୍ରକ ସହିତ ମାଲବାହୀ ଲାଇନ ଟ୍ରକ୍ ଚଳାଚଳ କରୁଥିବାରୁ ସବୁବେଳେ ଏଭଳି ସମସ୍ୟା ଉପୁଜୁଥିଲେ ହେଁ ସୁଧାର ଆସୁନାହଁ। ଏହି ରାସ୍ତାରେ ଦୈନିକ ହଜାର ହଜାର ସଂଖ୍ୟାରେ ମାଲବାହୀ ଟ୍ରକ, ଲୁହାପଥର ବୋଝେଇ ଟ୍ରକ ଚଳାଚଳ କରିଥାଏ। ଲୁହାପଥର ବୋଝେଇ ଟ୍ରକ ପାର୍କିଂ ବ୍ୟବସ୍ଥା ନାହିଁ। ଏଣୁ ରାସ୍ତା ଉପରେ ଟ୍ରକ ପାର୍କିଂ ହୋଇଥାଏ। ସେହିପରି ରାସ୍ତା କଡ଼ରେ ତେଲ ପମ୍ପ ଥିବାରୁ ତେଲ ଭର୍ତ୍ତି ପାଇଁ ଟ୍ରକଗୁଡ଼ିକ ଲମ୍ବା ଧାଡ଼ି ଲାଗିବା ଯୋଗୁ ରାସ୍ତା ଜାମ୍ ହୋଇଥାଏ। ରାସ୍ତା ଜାମ୍ ଯୋଗୁ ଯାତ୍ରୀବାହୀ ବସ୍ ଓ ସାଧାରଣ ଲୋକ ଏବଂ ଆମ୍ବୁଲାନ୍ସ ଯାତାୟାତ ଠପ୍ ହୋଇଯାଇଛି। ତୁରନ୍ତ ରାସ୍ତା ଜାମ୍ ହଟାଇବା ପାଇଁ ପଦକ୍ଷେପ ଗ୍ରହଣ କରାଯାଉଛି ବୋଲି ସଦର ଥାନା ଅଧିକାରୀ ଜୟନାରାୟଣ ଖଣ୍ଡେଇ କହିଛନ୍ତି।