ପାରଳାଖେମୁଣ୍ଡି,୪ା୨(ଡି.ଏନ୍.ଏ.): କାଶୀନଗର ବ୍ଲକ ହାଡୁଭଙ୍ଗୀ ଗ୍ରାମରେ ଶାସକ ଦଳ ନିର୍ବାଚନ ଆଚରଣବିଧି ଉଲ୍ଲଂଘନ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି। ପୂର୍ବରୁ ଗାଁ ଲୋକେ ସରକାରୀ ଜମି ଜବରଦଖଲ କରି ରହିଥିବା ବେଳେ ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଗତ ଡିସେମ୍ବରରେ ଉଚ୍ଛେଦ ପ୍ରକିୟା ଆରମ୍ଭ ହୋଇଥିଲା। ପରେ ନିର୍ବାଚନ ଆଚରଣ ବିଧି ଲାଗୁ ପରେ ଉଚ୍ଛେଦ ପ୍ରକିୟା ବନ୍ଦ ରହିଛି। ହେଲେ ଗତ ଗୁରୁବାର ପ୍ରଶାସନ ପକ୍ଷରୁ ପୁଣି ଥରେ ଉଚ୍ଛେଦ ନିମନ୍ତେ ଲୋକଙ୍କ ଘର ଚିହ୍ନଟ କରାଯାଇଛି। ସରକାରୀ ଜାଗାରେ ଥିବା ଘର ୭ ଦିନ ମଧ୍ୟରେ ଭାଙ୍ଗି ଦେବା ପାଇଁ ନିର୍ଦ୍ଦେଶ ଦିଆଯାଇଛି। ଏହାକୁ ନେଇ ଶାସକ ଦଳର କିଛି ନେତା ଭୋଟ ନ ଦେଲେ ଘର ଭଙ୍ଗାଯିବ ବୋଲି ଧମକ ଦେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ନିର୍ବାଚନ ଆଚରଣ ବିଧି ଲାଗୁ ହୋଇଥିବା ସମୟରେ ପ୍ରଶାସନର ଏଭଳି କାର୍ଯ୍ୟକୁ ସ୍ଥାନୀୟ ବିଧାୟକ କେ. ନାରାୟଣ ରାଓ ନିନ୍ଦା କରିବା ସହ ଘଟଣାକୁ ନେଇ ରାଜ୍ୟ ନିର୍ବାଚନ କମିଶନଙ୍କ ନିକଟରେ ଫେରାଦ ହେବେ ବୋଲି କହିଛନ୍ତି।
