ଜଗତ୍ସିଂହପୁର ଅଫିସ, ୨୨ା୨: ତିର୍ତ୍ତୋଲ ବିଧାୟକ ବିଜୟଶଙ୍କର ଦାସଙ୍କ ପ୍ରେମ ସମ୍ପର୍କ ଓ ବିବାହ ପ୍ରତିଶ୍ରୁତି ମାମଲା ଦିନକୁ ଦିନ ଜଟିଳ ରୂପ ନେବାରେ ଲାଗିଛି। ହାଇକୋର୍ଟଙ୍କ ନିର୍ଦ୍ଦେଶ ଆଧାରରେ ବିଧାୟକଙ୍କ ବିରୋଧରେ ତାଙ୍କ ପ୍ରେମିକା ତଥା ସ୍ଥାନୀୟ ଦେଉଳୀ ଗ୍ରାମେଶ୍ୱର ଗ୍ରାମର ସୋମାଲିକା ଦାଶ (୨୯) ଜଗତ୍ସିଂହପୁର ଥାନାରେ ଅଭିଯୋଗ କରିଥିଲେ। ଏହାକୁ ଭିତ୍ତି କରି କରି ପୋଲିସ ମାମଲା ରୁଜୁ କରିଥିଲା। ତେବେ ଉକ୍ତ ମାମଲାକୁ ରଫାଦଫା କରିବା ପାଇଁ ସୋମାଲିକାଙ୍କୁ ଧମକ ଦିଆଯାଉଥିବା ଅଭିଯୋଗ ହୋଇଛି। ଏନେଇ ସୋମାଲିକା ମଙ୍ଗଳବାର ରାତି ପ୍ରାୟ ୯ଟାରେ ଜଗତ୍ସିଂହପୁର ଥାନାରେ ପହଞ୍ଚତ୍ ଅତିରିକ୍ତ ଆଇଆଇସି ବବିତା ଦଳେଇଙ୍କ ନିକଟରେ ଅଭିଯୋଗପତ୍ର ଦାଖଲ କରିଛନ୍ତି। ଏହି ଅବସରରେ ସୋମାଲିକା ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ୨/୩ ଦିନ ତଳେ ଏବଂ ସୋମବାର ଏକ ଅଜଣା ମୋବାଇଲ ନମ୍ବରରୁ ଧମକ ଆସିଥିଲା । ଟଙ୍କା ନେଇ ସମାଧାନ କରିଦିଅ। ବିଧାୟକଙ୍କ ଗୋଡ଼ ଧରି ଭୁଲ ମାଗ। କେବଳ ଏତିକି ନୁହେଁ, ଶାସକ ଦଳର କେତେଜଣ ସୋସିଆଲ ମିଡିଆରେ ତାଙ୍କ ସାଙ୍ଗମାନଙ୍କ ସହ ଥିବା ପୁରୁଣା ଫଟୋ ଶେୟାର କରୁଛନ୍ତି। ଏଭଳି କରି ମାନସିକ ଚାପ ଦେବାକୁ ଉଦ୍ୟମ କରାଯାଉଛି। ଯେହେତୁ ବିଜୟଶଙ୍କର ଶାସକ ଦଳର ବିଧାୟକ, ତେଣୁ ତାଙ୍କୁ ଘଣ୍ଟ ଘୋଡ଼ାଯାଉଛି ବୋଲି ସେ କହିଛନ୍ତି।
ଅପରପକ୍ଷେ ସୋମାଲିକାଙ୍କ ପାଇଁ ଆତ୍ମହତ୍ୟା କରିବା ଭଳି ପରିସ୍ଥିତି ସୃଷ୍ଟି କରାଯାଉଛି। କିନ୍ତୁ ସେ ଶେଷ ପର୍ଯ୍ୟନ୍ତ ନ୍ୟାୟ ପାଇଁ ଲଢ଼ିବେ। ଆବଶ୍ୟକ ପଡ଼ିଲେ ରାଜରାସ୍ତାକୁ ଓହ୍ଲାଇବାକୁ ପଛାଇବେ ନାହିଁ ବୋଲି ସୋମାଲିକା କୋହଭରା କଣ୍ଠରେ କହିଛନ୍ତି। ତାଙ୍କୁ ଆଇନଗତ ସହାୟତା କରୁଥିବା ସ୍ନିଗ୍ଧା ବିଶ୍ୱାଳ କହିଛନ୍ତି, ତାଙ୍କ ପ୍ରତି ମଧ୍ୟ ଶାସକ ଦଳର ଆକ୍ରୋଶ ବଢ଼ି ଚାଲିଛି । ସୋମାଲିକାଙ୍କ ହାତ ଛାଡ଼ିବାକୁ ଅଜଣା ମୋବାଇଲ ଫୋନ ଯୋଗେ ଧମକ ଆସୁଛି। ତାଙ୍କଠାରୁ ଦୂରେଇ ଗଲେ ମାମଲା ବନ୍ଦ ହୋଇଯିବ ବୋଲି କୁହାଯାଉଛି। ନଚେତ ଅସୁବିଧା ହେବ। କିନ୍ତୁ ସେ ସୋମାଲିକାଙ୍କ ସାଥିରେ ଅଛନ୍ତି ଏବଂ ରହିବେ ବୋଲି ଜଣାଇଛନ୍ତି। ସୋମବାର ଏକ ଅଜଣା ନମ୍ବରରୁ ଏଭଳି କଲ ଆସିଲା ପରେ ବିଶ୍ୱାଳ ସଙ୍ଗେସଙ୍ଗେ ସୋମାଲିକାଙ୍କୁ କନଫରେନ୍ସରେ ନେଇଥିଲେ। ଯେହେତୁ ତାଙ୍କ ଜୀବନ ପ୍ରତି ବିପଦ ଅଛି, ତେଣୁ ଉଭୟଙ୍କ ଦସ୍ତଖତରେ ଜଗତ୍ସିଂହପୁର ଥାନାରେ ଅଭିଯୋଗ କରାଯାଇଛି।
ଗତ ପଞ୍ଚାୟତ ନିର୍ବାଚନ ପୂର୍ବରୁ ବିଧାୟକ ଦାସଙ୍କ ସହ ସୋମାଲିକାଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା। ପରେ ସେମାନଙ୍କ ମଧ୍ୟରେ ବିବାହ ନିଷ୍ପତ୍ତି ହୋଇଥିଲା। ୧୭ା୫ା୨୦୨୨ରେ ଜଗତ୍ସିଂହପୁର ସ୍ବତନ୍ତ୍ର ବିବାହ ଅଧିକାରୀ (ଡିଏସ୍ଆର୍)ଙ୍କ କୋର୍ଟରେ ଉଭୟ ବିବାହ ପାଇଁ ଆବେଦନ କରିଥିଲେ। ଆବେଦନର ୩୧ ଦିନ ସୋମାଲିକା ତାଙ୍କ ସମ୍ପର୍କୀୟମାନଙ୍କ ସହ ଡିଏସ୍ଆର୍ଙ୍କ କାର୍ଯ୍ୟାଳୟରେ ବିବାହ ପାଇଁ ପହଞ୍ଚତ୍ଥିଲେ। ସକାଳୁ ଅପରାହ୍ନ ୩ଟା ପର୍ଯ୍ୟନ୍ତ ବିଧାୟକ ବିଜୟଶଙ୍କରଙ୍କୁ ଅପେକ୍ଷା କରି ନିରାଶ ହେଲା ପରେ ଫେରିଯାଇଥିଲେ। ଅପରପକ୍ଷେ ମା’ଙ୍କ ଦେହ ଖରାପ କାରଣରୁ ପରବର୍ତ୍ତୀ ସମୟରେ ବିବାହ କରିବେ ବୋଲି ବିଜୟଶଙ୍କର ପ୍ରତିଶ୍ରୁତି ଦେଇ ଏପର୍ଯ୍ୟନ୍ତ କୌଣସି ଆଗ୍ରହ ପ୍ରକାଶ କରିନାହାନ୍ତି। ଏନେଇ ଉଭୟଙ୍କ ମଧ୍ୟରେ ତିକ୍ତତା ପର୍ଯ୍ୟାୟକ୍ରମେ ବଢି ଚାଲିଥିଲା। ଏହି ଘଟଣାରେ ପୋଲିସ ନୀରବତା ଅବଲମ୍ବନ କରିବାରୁ ସୋମାଲିକା ହାଇକୋର୍ଟଙ୍କ ଆଶ୍ରୟ ନେଇଥିଲେ। ହାଇକୋର୍ଟଙ୍କ ନିର୍ଦ୍ଦେଶ ପ୍ରକାରେ ପୋଲିସ ମାମଲା ରୁଜୁ କରିବା ସହ ଗତ ୬ ତାରିଖରେ ଧାରା ୧୬୧ରେ ଜଗତ୍ସିଂହପୁର ଥାନାରେ ଏବଂ ୧୦ରେ ଧାରା ୧୬୪ରେ ଜଗତ୍ସିଂହପୁର ଜେଏମ୍ଏଫ୍ସିଙ୍କ କୋର୍ଟରେ ବୟାନ ରେକର୍ଡ କରିଛି।