ମୁମ୍ବାଇ,୮ା୧୧: ବଲିଉଡ୍ ଅଭିନେତା ତଥା ମୋଷ୍ଟ ବ୍ୟାଚଲର ସଲମାନ ଖାନ୍ଙ୍କୁ ପୁଣି ହତ୍ୟା ଧମକ ମିଳିଛି। ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ପୁଣି ସଲମାନଙ୍କୁ ହତ୍ୟା ଧମକ ଦେଇଛି। ମୁମ୍ବାଇ ଟ୍ରାଫିକ୍ କଣ୍ଟ୍ରୋଲ୍ ରୁମ୍କୁ ଏପରି ଧମକପୂର୍ଣ୍ଣ ମେସେଜ୍ ଆସିଛି। ଏନେଇ ଓ୍ବାର୍ଲି ଥାନାରେ ମାମଲା ରୁଜୁ ହୋଇଥିବାବେଳେ ପୋଲିସ ଛାନ୍ଭିନ୍ ଚଳାଇଛି।
ଗୁରୁବାର ରାତି ପ୍ରାୟ ୧୨ଟାରେ କଣ୍ଟ୍ରୋଲ ରୁମ୍କୁ ଏକ ଧମକପୂର୍ଣ୍ଣ ମେସେଜ ଆସିଥିଲା। ଏଥିରେ ଲେଖାଯାଇଛି ଯେ, ସଲମାନ ଖାନ ଏବଂ ଲରେନ୍ସ ବିଷ୍ଣୋଇ ଉପରେ ଏକ ଗୀତ ଲେଖାଯାଇଛି, ଏହାକୁ ଛଡ଼ାଯିବ ନାହିଁ।
ଏହି ମେସେଜରେ ଆହୁରି ମଧ୍ୟ ଲେଖାଯାଇଛି ଯେ, ଏକ ମାସ ମଧ୍ୟରେ ଗୀତ ଲେଖକଙ୍କୁ ହତ୍ୟା କରାଯିବ, ଗୀତ ଲେଖକଙ୍କ ଅବସ୍ଥା ଏପରି ହେବ ଯେ ସେ ନିଜ ନାଁରେ ବି ଗୀତ ଲେଖି ପାରିବେ ନାହିଁ। ଯଦି ସଲମାନ ଖାନଙ୍କର ସାହସ ଅଛି ତେବେ ସେ ତାଙ୍କୁ ଆସି ବଞ୍ଚାନ୍ତୁ। ବର୍ତ୍ତମାନ ମୁମ୍ବାଇ ପୋଲିସ ଏହି ଘଟଣାର ତଦନ୍ତ କରୁଛି।
ଏହାପୂର୍ବରୁ ସଲମାନଙ୍କୁ ହତ୍ୟା ଧମକ ଦେବା ଅଭିଯୋଗରେ ରାଜସ୍ଥାନର ଜଣେ ବ୍ୟକ୍ତି ବୁଧବାର ଧରାଯାଇ ମହାରାଷ୍ଟ୍ର ପୋଲିସକୁ ହସ୍ତାନ୍ତର କରିଥିଲେ। ଅଧିକାରୀ କହିଛନ୍ତି, ଅଭିଯୁକ୍ତଙ୍କୁ ଭିକା ରାମ (୩୨)। ଯିଏକି ବିକ୍ରମ ନାମରେ ମଧ୍ୟ ଜଣାଶୁଣା ଏବଂ ସେ ରାଜସ୍ଥାନର ଜାଲୋରର ବାସିନ୍ଦା।
ହାଭେରୀ ପୋଲିସ ଅଧୀକ୍ଷକ ଅଂଶୁ କୁମାର କହିଛନ୍ତି, ମହାରାଷ୍ଟ୍ର ଏଟିଏସ (ଆତଙ୍କବାଦୀ ବିରୋଧୀ ସ୍କ୍ବାଡ୍) ରୁ ମିଳିଥିବା ସୂଚନାକୁ ଆଧାର କରି ହାଭେରୀ ସହରରେ ଜଣେ ବ୍ୟକ୍ତି ଧରାପଡିଥିଲେ ଏବଂ ତାଙ୍କୁ ହସ୍ତାନ୍ତର କରାଯାଇଥିଲା।