ଗୋପ, ୭।୮(ଭାରତୀ ଭୂଷଣ ଉପାଧ୍ୟାୟ): ଗୋପ ଥାନା ଅଧୀନ ସୋରଭା ପଞ୍ଚାୟତ ଦୁର୍ଗାପୁର ଗ୍ରାମରେ ଜଣେ ମହିଳାଙ୍କ ବିବାହର ଚାରି ମାସ ପରେ ଯୌତୁକ ନିର୍ଯାତନା ଏବଂ ସ୍ବାମୀଙ୍କ ମୃତ୍ୟୁ ପରେ ତାଙ୍କ ଅନ୍ତ୍ୟେଷ୍ଟି କ୍ରିୟାକୁ ବାରଣ କରିବା ସହ ଜୀବନରୁ ମାରିଦେବାକୁ ଧମକ ଦିଆଯାଉଥିବା ଭଳି ରବିବାର ଅଭିଯୋଗ ହୋଇଛି। ଏନେଇ ପୋଲିସ ୩୩୨/୨୩ରେ ଶାଶୁ, ଶ୍ୱଶୁର ଓ ଦିଅରଙ୍କ ବିରୋଧରେ ଏକ ମାମଲା ରୁଜୁ କରି ତଦନ୍ତ କରୁଥିବା ଜଣାପଡ଼ିଛି।
ପ୍ରକାଶ ଯେ, ରାଜକିଶୋର ନାୟକଙ୍କୁ ବୈଦିକ ରୀତିନୀତିରେ ଗୌରୀରାଣୀ ସ୍ବାଇଁ ୨୦୨୧ରେ ବିବାହ କରିଥିଲେ। ବିବାହ ସମୟରେ ଯୌତୁକ ମୁତାବକ ନଗଦ ଅର୍ଥ, ଆସବାବପତ୍ର ଦିଆଯାଇଥିଲା। ଏଥିସହ ରାଜକିଶୋରଙ୍କୁ ୨୫ ଗ୍ରାମ୍ର ସୁନା ଚେନ୍ ଓ ମୁଦି, ଝିଅକୁ ସୁନା ଚେନ୍, ମଙ୍ଗଳସୂତ୍ର, ସୁନା ଚୁଡ଼ି, କାନଫୁଲ, ଶଙ୍ଖା ସମେତ ୧୫ ଭରିର ସୁନା ଅଳଙ୍କାର ସହ ୬୦୦ ଗ୍ରାମ୍ର ରୁପା ଅଳଙ୍କାର ପ୍ରଦାନ କରିଥିଲେ। ବିବାହର ୪/୫ ମାସ ପରେ ଅଧିକ ଯୌତୁକ ଦାବି କରି ସ୍ବାମୀ, ଦିଅର ବିଜୁ ନାୟକ, ଶାଶୁ ମଞ୍ଜୁଲତା ନାୟକ, ଶ୍ୱଶୁର ବ୍ରଜକିଶୋର ନାୟକ ବିଭିନ୍ନ ସମୟରେ ଶାରୀରିକ ଓ ମାନସିକ ନିର୍ଯାତନା ଦେଇ ମାଡ଼ମାରି ଘରୁ ବାହାର କରିଦେଇଥିଲେ। ପରେ ଭଦ୍ରଲୋକଙ୍କ ମାଧ୍ୟମରେ ବୁଝାଶୁଝା କରି ଗୌରୀଙ୍କୁ ଘରକୁ ଫେରାଇ ଆଣିଥିବା ବେଳେ ସ୍ବାମୀ ସ୍ତ୍ରୀ ଦୁହେଁ ଭୁବନେଶ୍ୱରଠାରେ ରହୁଥିଲେ। ହେଲେ ସେଠାରେ ମଧ୍ୟ ସ୍ବାମୀ ନିଶା ସେବନ କରି ଗୌରୀରାଣୀଙ୍କୁ ଅକଥନୀୟ ଅତ୍ୟାଚାର କରୁଥିଲେ। ଏନେଇ ଗୌରୀ ଭୁବନେଶ୍ୱର ମହିଳା ଥାନାର ଦ୍ୱାରସ୍ଥ ହୋଇଥିଲେ। ପରେ ଗତ ମାସରେ ସଡ଼କ ଦୁର୍ଘଟଣାରେ ରାଜକିଶୋରଙ୍କ ମୃତ୍ୟୁ ଘଟିଥିଲା। ସ୍ବାମୀଙ୍କ ଅନ୍ତ୍ୟେଷ୍ଟି କ୍ରିୟାରେ ଯୋଗଦେବାକୁ ଗୌରୀ ଶାଶୁଘରେ ପହଞ୍ଚିଥିବା ବେଳେ ଶାଶୁଘର ଲୋକେ ତାଙ୍କୁ ଗାଳିମନ୍ଦ କରି ଜୀବନରୁ ମାରି ଦେବାକୁ ଧମକ ଦେଇଥିବା ଥାନାରେ ଅଭିଯୋଗ କରିଥିଲେ। ଅଭିଯୋଗରେ ଯୌତୁକ ଟଙ୍କା, ସୁନା, ରୁପା ଅଳଙ୍କାର ସବୁ ଫେରାଇବାକୁ ଦର୍ଶାଇଥିଲେ ମଧ୍ୟ ପୋଲିସ କେବଳ ମାମଲା ରୁଜୁ କରି ଚୁପ ବସି ରହିଛି। ମାମଲା ରୁଜୁ ହୋଇଥିଲେ ମଧ୍ୟ ଏହି ଅଭିଯୋଗ ନୟାହାଟ ଫାଣ୍ଡି ଅଧିକାରୀ କୁନାଲ କୁମାରଙ୍କ ନିକଟରେ ପହଞ୍ଚିପାରି ନ ଥିବା ଜଣାପଡ଼ିଛି। ଏହି ମାମଲାରେ ପୁରୀ ଏସ୍ପି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ କୁନାଲଙ୍କୁ ପଚାରିବାରେ, ତାଙ୍କ ନିକଟରେ ଏ ସମ୍ପର୍କିତ କୌଣସି ଏତଲା କପି ପହଞ୍ଚି ନ ଥିବା ସେ କହିଛନ୍ତି।
