ଢେଙ୍କାନାଳ ଅଫିସ,୧୪ା୩: ଢେଙ୍କାନାଳ ସଦର ଥାନା ଗୋବିନ୍ଦପୁର ଫାଣ୍ଡି ବଳଦିଆବନ୍ଧର ସାଇପ୍ରସାଦ ଦାସଙ୍କ ଘରୁ ଗତ ଫେବୃୟାରୀ ୧୧ରେ ହୋଇଥିବା ଲୁଟ୍ ଘଟଣାର ଦେଢ଼ମାସ ପରେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ବଳଦିଆବନ୍ଧ ଗ୍ରାମର ରଶ୍ମିରଞ୍ଜନ ସାହୁ ଓରଫ୍ ଗାନ୍ଧୀ (୩୮), ମିଥୁନ ମଲ୍ଲିକ ଓରଫ୍ ପିଣ୍ଟୁ (୨୩) ଏବଂ ଗୋବିନ୍ଦପୁର ବାରବାଙ୍କ ସାହିର ତୋଫାନ୍ ମଲ୍ଲିକ (୩୨)। ଢେଙ୍କାନାଳ ଜିଲାରେ ୨୨ବର୍ଷ ତଳେ ଘଟିଥିବା ବହୁଚର୍ଚ୍ଚିତ ବିଷ୍ଣୁବାବା ହତ୍ୟାକାଣ୍ଡ ମାମଲାରେ ଧରାପଡ଼ିଥିବା ଅଭିଯୁକ୍ତ ରଶ୍ମିରଞ୍ଜନ ଗିରଫ ହୋଇ ଜେଲ ଯାଇଥିଲେ। ବଳଦିଆବନ୍ଧ ଲୁଟ୍ ଘଟଣାରେ ସେ ଧରାପଡ଼ିବା ପରେ ପୁଣି ଥରେ ଚର୍ଚ୍ଚାକୁ ଆସିଛି ବିଷ୍ଣୁବାବା ହତ୍ୟାକାଣ୍ଡ।
ପୋଲିସ ଗିରଫ ଅଭିଯୁକ୍ତଙ୍କ ନିକଟରୁ ନଗଦ ୫ଲକ୍ଷ ୪୧ହଜାର ଟଙ୍କା, ବାଇକ୍ (ଓଡ଼ି ୦୬ କେ ୮୨୩୪), ଅଟୋରିକ୍ସା (ନଂ. ଓଡ଼ି ୧୯ କେ ୬୯୯୮), ଗୋଟିଏ ସୁନା ମଙ୍ଗଳସୂତ୍ର, ୨ ହଳ କାନଫୁଲ, ଗୋଟିଏ ସୁନା ମୁଦି ଏବଂ ୨ଟି ସୁନାହାର ଜବତ କରିଛି।
ଲୁଟ୍ ଟଙ୍କାରେ ତୋଫାନ୍ ଉକ୍ତ ବାଇକ୍ କିଣିଥିବା ପୋଲିସ ସ୍ପଷ୍ଟ କରିଛି। ଏ ନେଇ ସେହି ସମୟରେ ସଦର ଥାନାରେ ନଂ. ୮୫/୨୨ରେ ଏକ ମାମଲା ରୁଜୁ କରାଯାଇଥିଲା। ଅଭିଯୁକ୍ତଙ୍କୁ ରବିବାର କୋର୍ଟ ଚାଲାଣ କରାଯାଇଛି।