ସଇଁତଳା,୨୯ା୪(ଡି.ଏନ.ଏ.): ବିନ୍ଧନବାହାଲି ମଦଭାଟି ଡକାୟତି ଘଟଣାରେ ବଲାଙ୍ଗୀର ଜିଲା ସଇଁତଳା ଥାନା ଅଧୀନ ବଡ଼ମାଳ ଫାଣ୍ଡି ପୋଲିସ ଅଟକ ରଖିଥିବା ୨ ଅଭିଯୁକ୍ତ ଫେରାର ହୋଇଯାଇଛନ୍ତି। ଦାୟିତ୍ୱରେ ଅବହେଳା ପାଇଁ ୩ ଜଣ କନଷ୍ଟେବଳଙ୍କୁ ଏସ୍ପି ନୀତିନ କୁଶଲକର ନିଲମ୍ବିତ କରିଛନ୍ତି। ସେମାନେ ହେଲେ ସଇଁତଳା ଥାନାର ସତ୍ୟବାନ ରାଉତ, ଅଶ୍ୱିନୀ ସେଠ ଓ ବଡ଼ମାଳ ଫାଣ୍ଡିର ସୁନୀଲ କୁମାର ମିଞ୍ଜ।
ଫେରାର ଥିବା ଅଭିଯୁକ୍ତ ସଇଁତଳା ଥାନା ସର୍ଗିପାଲି ଗ୍ରାମର ପଣ୍ଟୁ ଦାସ ଓ ଫୁଲବାଣୀ ତୁମୁଡ଼ିବନ୍ଧର ସନ୍ତୋଷ ବଡ଼ସେଠଙ୍କୁ ଧରିବା ପାଇଁ ପୋଲିସ ତନାଘନା ଚଳାଇଛି। ଅପରପକ୍ଷରେ ଏସ୍ପିଙ୍କ ନିର୍ଦ୍ଦେଶ କ୍ରମେ ବଲାଙ୍ଗୀର ଏଏସ୍ପି ଦିଲୀପ କୁମାର ପଟେଲ ସନ୍ଧ୍ୟାରେ ସଇଁତଳା ଥାନାରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି।
ପ୍ରକାଶ ଯେ, ୧୮ ତାରିଖ ରାତିରେ ସଇଁତଳା ଥାନା ଅନ୍ତର୍ଗତ ବିନ୍ଧନବାହାଲି ମଦଭାଟିକୁ ମଦ ପିଇବା ବାହାନାରେ ୫ରୁ ୬ଜଣ ଯୁବକ ପହଞ୍ଚତ୍ ଥିଲେ। ଭାଟି ମ୍ୟାନେଜର ଅର୍ଜୁନ ସିଂ ଓ ଅନ୍ୟ କର୍ମଚାରୀଙ୍କୁ ସେମାନେ ମାଟପିଟ କରିବା ସହ ବନ୍ଧୁକ ଦେଖାଇ ୧ ଲକ୍ଷ ୮୦ହଜାର ଟଙ୍କା ଓ ମୋବାଇଲ ଲୁଟି ନେଇ ଫେରାର ହୋଇଯାଇଥିଲେ। ଏହି ଘଟଣାରେ ପୋଲିସ ସୋମବାର ପିଣ୍ଟୁ ଓ ସନ୍ତୋଷଙ୍କୁ ଉଠାଇ ଆଣି ତଦନ୍ତ ଚଳାଇଥିଲା। ବୁଧବାର ରାତି ୧୦ଟାରେ ଦୁଇ ଅଭିଯୁକ୍ତଙ୍କୁ ଫାଣ୍ଡିରେ ରାତ୍ରି ଭୋଜନ ଦିଆଯାଇଥିଲା। ଖାଇ ସାରିବା ପରେ ହାତ ଧୋଇବା ବାହାନା ଦେଖାଇ ଅନ୍ଧାରର ସୁଯୋଗ ନେଇ ନିକଟସ୍ଥ ଜଙ୍ଗଲକୁ ସେମାନେ ଦୌଡ଼ି ପଳାଇଥିଲେ। ରାତିତମାମ ପୋଲିସ ନିକଟସ୍ଥ ଜଙ୍ଗଲ, ରେଳଷ୍ଟେଶନରେ ଖୋଜାଖୋଜି କରିଥିଲେ ମଧ୍ୟ ସେମାନଙ୍କର ପତ୍ତା ମିଳି ନ ଥିଲା। ଗଲାବେଳେ ଅଭିଯୁକ୍ତଙ୍କ ହାତରେ ହ୍ୟାଣ୍ଡକପ ପଡିଥିବା ଚର୍ଚ୍ଚା ହେଉଛି। ଘଟଣା ଜଣାପଡିବା ପରେ ଏସପି କୁଶଲକର ଏଏସପି ପଟେଲଙ୍କୁ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦେଇ ଉପରୋକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ।