ବଲାଙ୍ଗୀର,୧୭ା୭ (ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ପୃଥ୍ବୀରାଜ ହାଇସ୍କୁଲ ବ୍ୟାଡ୍ମିଣ୍ଟନ ଇନ୍ଡୋର ଷ୍ଟାଡିୟମରେ ଓଡିଶା ରାଜ୍ୟ ସିନୟର ର଼୍ୟାଙ୍କିଙ୍ଗ୍ ବ୍ୟାଡ୍ମିଣ୍ଟନ ପ୍ରତିଯୋଗିତା ରବିବାର ଉଦ୍ଯାପିତ ହୋଇଛି। ଫାଇନାଲରେ ଆୟୁଷ ଦାସ ପୁରୁଷ ସିଙ୍ଗଲ୍ସ, ଡବଲ୍ସ ଓ ମିକ୍ସଡ ଡବଲ୍ସ ମ୍ୟାଚ୍ ଜିତି ତ୍ରିମୁକୁଟ ହାସଲ କରିଛନ୍ତି। ମହିଳା ବିଭାଗରେ ଶ୍ରୁତି ସ୍ବାଇଁ ସିଙ୍ଗଲ୍ସ ଓ ଡବଲ୍ସ ଫାଇନାଲ ମ୍ୟାଚ୍ ଜିତି ଦ୍ୱିମୁକୁଟ ଅର୍ଜନ କରିଛନ୍ତି ା ସେହିପରି ଅନୁଜା-ଶ୍ରୁତି ଯୋଡି ମହିଳା ଡବଲ୍ସ ବର୍ଗ, ଆୟୁଷ-ଅବିନାଶ ଯୋଡି ପୁରୁଷ ଡବଲ୍ସ ବର୍ଗ, ଆୟୁଷ-ପୂର୍ବା ପ୍ରତ୍ୟାଶା ଯୋଡି ମିକ୍ସଡ ଡବଲ୍ସ ବର୍ଗରେ ଫାଇନାଲ ଜିତି ଟାଇଟଲ କବ୍ଜା କରିଛନ୍ତି ା
ରବିବାର ସମସ୍ତ ବର୍ଗର ସେମିଫାଇନାଲ ଓ ଫାଇନାଲକୁ ନେଇ ସମୁଦାୟ ୧୫ଟି ମ୍ୟାଚ ଖେଳାଯାଇଥିଲା। ପୁରୁଷ ସିଙ୍ଗଲ୍ସ ବିଭାଗ ସେମିଫାଇନାଲରେ ଆର୍ଯ୍ୟ ଅମୀୟଙ୍କୁ ଏବଂ ଆୟୁଷ ସ୍ବାଧୀନଙ୍କୁ ହରାଇ ଫାଇନାଲକୁ ଉନ୍ନୀତ ହୋଇଥିଲେ। ଫାଇନାଲ୍ରେ ଆୟୁଷ ଉଚ୍ଚକୋଟିର ଖେଳ ପ୍ରଦର୍ଶନ କରି ଟାଇଟଲ ଫେଭରିଟ୍ ଆର୍ଯ୍ୟଙ୍କୁ ହରାଇ ପୁରୁଷ ସିଙ୍ଗଲ୍ସ ଚାମ୍ପିୟନ ହୋଇଥିଲେ। ପୁରୁଷ ଡବଲ୍ସ ବିଭାଗରେ ଅମୀୟ-ଅନିର୍ବାଣ ଓ ଆୟୁଷ-ଅବିନାଶଙ୍କ ଯୋଡି ମଧ୍ୟରେ ଫାଇନାଲ ଖେଳା ଯାଇଥିଲା ା ରୋମାଞ୍ଚକର ଫାଇନାଲରେ ଆୟୁଷ- ଅବିନାଶଙ୍କ ଯୋଡି ବାଜି ମାରିଥିଲେ। ମହିଳା ସିଙ୍ଗଲ୍ସ ସେମିଫାଇନାଲରେ ହର୍ଷିତା ଇଶାନୀଙ୍କୁ ଓ ଶ୍ରୁତି ଶିରିନଙ୍କୁ ହରାଇ ଫାଇନାଲରେ ପଦାର୍ପଣ କରିଥିଲେ। ଫାଇନାଲରେ ଶ୍ରୁତି ବିଜୟ ଲାଭ କରିଥିଲେ ା
ମହିଳା ଡବଲ୍ସ ୍ଫାଇନାଲରେ ଅନୁଜା-ଶ୍ରୁତି ଓ ହର୍ଷିତା-ପୂର୍ବା ପ୍ରତ୍ୟାଶାଙ୍କ ଯୋଡି ପରସ୍ପରକୁ ଭେଟିଥିଲେ। ଶେଷରେ ଅନୁଜା-ଶ୍ରୁତିଙ୍କ ଯୋଡି ଚମତ୍କାର ଖେଳ ପ୍ରଦର୍ଶନ କରି ବିଜୟ ମୁକୁଟ ପିନ୍ଧିଥିଲେ ା ସେହିପରି ମିକ୍ସଡ ଡବଲ୍ସ ଫାଇନାଲ୍ରେ ଅଭିଜିତ-ହର୍ଷିତାଙ୍କ ଯୋଡିଙ୍କୁ ଆୟୁଷ-ପୂର୍ବା ପ୍ରତ୍ୟାଶା ଯୋଡି ହରାଇ ଚାମ୍ପିୟନ ହୋଇଥିଲେ।
ସାଙ୍ଗଠନିକ ସମ୍ପାଦକ ସୁରୁଲାଲ ମଟାରିଙ୍କ ସଂଯୋଜନାରେ ଆୟୋଜିତ ଉଦ୍ଯାପନୀ ଉତ୍ସବରେ ବଲାଙ୍ଗୀର ବିଧାୟକ ନରସିଂହ ମିଶ୍ର ମୁଖ୍ୟଅତିଥି ଭାବେ ଯୋଗଦେଇ କୃତି ପ୍ରତିଯୋଗୀଙ୍କୁ ପୁରସ୍କୃତ କରିଥିଲେ। ମୁଖ୍ୟଅତିଥି ମିଶ୍ର ତାଙ୍କ ବକ୍ତବ୍ୟରେ ବଲାଙ୍ଗୀରରେ କ୍ରୀଡାର ଭିତ୍ତିଭୂମିର ବିକାଶ ଦିଗରେ ସ୍ବତନ୍ତ୍ର ଭାବେ ଧ୍ୟାନ ଦିଆଯାଉଛି। ପୃଥ୍ବୀରାଜ ହାଇସ୍କୁଲ ଇନ୍ଡୋର ଷ୍ଟାଡିୟମକୁ ରାଜ୍ୟର ସବୁଠୁ ଭଲ ବ୍ୟାଡ୍ମିଣ୍ଟନ ଇନ୍ଡୋର ବୋଲି ଖେଳାଳିମାନେ କହିବା ଗର୍ବର ବିଷୟ। ଆଗାମୀ ଦିନରେ ବଲାଙ୍ଗୀର କ୍ରୀଡା ହବ୍ ହେବ ବୋଲି କହିଥିଲେ। ପୁରସ୍କାର ବିତରଣ କାର୍ଯ୍ୟକ୍ରମରେ ଜିଲା ବ୍ୟାଡ୍ମିଣ୍ଟନ ସଂଘ ସଭାପତି ଗୋପାଳ ପଣ୍ଡା, ଉପସଭାପତି ଘନଶ୍ୟାମ ମିଶ୍ର, ମ୍ୟାଚ କୋଅର୍ଡିନେଟର ଅନନ୍ତ ବେହେରା, ମାନସ ମହାନ୍ତି, ସୁରେନ୍ଦ୍ର ନେପାଲ, ଡେଭଲପମେଣ୍ଟ କମିଟି ଜିଲା ମୁଖ୍ୟ ଦେବାଶିଷ ମିଶ୍ର ମଞ୍ଚାସୀନ ଥିଲେ। ଫୁଡ ଇନଚାର୍ଜ ସୁଶାନ୍ତ ଚୋପଦାର, ବାସୁଦେବ ବେହେରା, ସୁଧୀର ପଣ୍ଡା, କବିଚନ୍ଦ୍ର ଠାକୁର, ଆଦିତ୍ୟ କେଜ୍ରିୱାଲ, ସୁଶାନ୍ତ ମହାନ୍ତି, ପ୍ରକାଶ ସାହୁ, ଚନ୍ଦନ ମିଶ୍ର, ଆକ୍ରମ ଦୁରାନି, ପୁଷ୍ପ ଭୂଷଣ ସୁତାର, ନନ୍ଦିନୀ ଲାଲ ବିଶେଷ ସହଯୋଗ କରିଥିଲେ। ଚିଫ୍ ରେଫରି ବିଜୟ ବାଗ, ପର୍ଯ୍ୟବେକ୍ଷକ ମନୋରଞ୍ଜନ ଦାସ, ସୁନୀଲ ବେହେରା, ହେମନ୍ତ ପ୍ରଧାନ, ଆଶିଷ ଉପାଧ୍ୟାୟ, ରାଜକିଶୋର ଶତପଥୀ ଓ ଚନ୍ଦ୍ରଶେଖର ମିଶ୍ର ସମସ୍ତ ମ୍ୟାଚ ପରିଚାଳନା କରିଥିଲେ ।