କଟକ ଅଫିସ,୬ା୭: କଟକ ସହରରେ କରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବଢ଼ିଚାଲିଛି। ସଂକ୍ରମଣର ପ୍ରସାରକୁ ରୋକିବା ପାଇଁ ସପ୍ତାହାନ୍ତ ଶଟ୍ଡାଉନ୍ ପରେ ସୋମବାରଠାରୁ ବୁଧବାର ରାତି ପର୍ଯ୍ୟନ୍ତ ପୁଣି ଥରେ ଶଟ୍ଡାଉନ୍ ଜାରି କରାଯାଇଛି। ଏହାର ସଠିକ୍ ପାଳନ ପାଇଁ ସାହିଭାଇଙ୍କ ସହଯୋଗ ଲୋଡ଼ିଛି ପ୍ରଶାସନ। ଡିସିପିଙ୍କ କାର୍ଯ୍ୟାଳୟରେ ରବିବାର ଅପରାହ୍ନରେ ଏନେଇ ବସିଥିବା ବୈଠକରେ ସିଏମ୍ସି ଓ କମିଶନରେଟ୍ ପୋଲିସର ବରିଷ୍ଠ ଅଧିକାରୀ ସାହି ମୁରବିଙ୍କ ସହ ଆଲୋଚନା କରିଛନ୍ତି। କରୋନା ଲଢ଼େଇରେ ସ୍ଥାନୀୟ ବାସିନ୍ଦାଙ୍କ ଭାଗିଦାରୀ ରହିବ। ଏଥିପାଇଁ ପ୍ରତ୍ୟେକ କମ୍ୟୁନିଟିରେ ୧୫ ଜଣିଆ ସ୍ବତନ୍ତ୍ର ପୋଲିସ ଅଧିକାରୀ (ଏସ୍ପିଓ) ରହିବେ। ସେମାନେ ସ୍ଥାନୀୟ ଥାନାର ଅଧିକାରୀଙ୍କ ସହ ଯୋଗାଯୋଗରେ ରହିବେ। ନିର୍ଦ୍ଦିଷ୍ଟ ଅଞ୍ଚଳରେ ସରକାରଙ୍କ ସମସ୍ତ ପ୍ରକାର କଟକଣାକୁ କେମିତି କଡ଼ାକଡ଼ି ପାଳନ କରାଯାଇପାରିବ, ଏହି ଏସ୍ପିଓମାନେ ତାହାର ତଦାରଖ କରିବେ। ସ୍ଥାନୀୟ ଥାନା ଅଧିକାରୀ ତାଙ୍କୁ ପରାମର୍ଶ ଦେବେ। ବୈଠକରେ ସିଏମ୍ସି କମିଶନର ଅନନ୍ୟା ଦାସ, କଟକ ଡିସିପି ଅଖିଳେଶ୍ୱର ସିଂଙ୍କ ସମେତ ପୋଲିସ ଓ:ସିଏମ୍ସି ଅଧିକାରୀ, ପୂଜା କମିଟି ପଦାଧିକାରୀ, ବ୍ୟବସାୟୀ ସଂଘର କର୍ମକର୍ତ୍ତା ଉପସ୍ଥିତ ଥିଲେ।
ଗଡ଼ିବ ମୋ’ ବସ୍
କଟକ ସହରରେ ବୁଧବାର ରାତି ପର୍ଯ୍ୟନ୍ତ ଶଟ୍ଡାଉନ୍ ଜାରି ହୋଇଛି। ଏହି ସମୟରେ ଅନାବଶ୍ୟକ କାମରେ ଯାନବାହାନ ଚଳାଚଳ ଉପରେ କଟକଣା ଜାରି କରାଯାଇଛି। କେବଳ ଜରୁରୀ କାମରେ ହିଁ ଯାନବାହାନ ବ୍ୟବହାର ହୋଇପାରିବ। ତେବେ ଶଟ୍ଡାଉନ୍ ସତ୍ତ୍ବେ କଟକରେ ମୋ’ ବସ୍ ଚଳାଚଳ କରିବ ବୋଲି କ୍ୟାପିଟାଲ୍ ରିଜିଅନ୍ ଅର୍ବାନ୍ ଟ୍ରାନ୍ସପୋର୍ଟ (ସିଆର୍ୟୁଟି) ତରଫରୁ ଘୋଷଣା କରାଯାଇଛି। ଜରୁରୀ କାମ ନ ଥିଲେ ବସ୍ରେ ଯାତ୍ରା ନ କରିବାକୁ ପରାମର୍ଶ ଦିଆଯାଇଛି। ଯାତ୍ରା ବେଳେ ମାସ୍କ ପିନ୍ଧିବା ସହ ସାମାଜିକ ଦୂରତ୍ୱ ପାଳନ କରିବାକୁ ନିବେଦନ କରାଯାଇଛି। କଟକର ଅନେକ ବାସିନ୍ଦା ଭୁବନେଶ୍ୱରରେ ବିଭିନ୍ନ ସରକାରୀ କାର୍ଯ୍ୟାଳୟରେ କାମ କରନ୍ତି। ସେମାନେ ଯାତାୟତ ପାଇଁ ମୋ’ ବସ୍କୁ ବ୍ୟବହାର କରିଥାନ୍ତି। ଏହାକୁ ଦୃଷ୍ଟିରେ ରଖି ମୋ’ ବସ୍ ଚଳାଚଳ ପାଇଁ ନିଷ୍ପତ୍ତି ନିଆଯାଇଛି।
ସଙ୍ଗରୋଧରେ ଗଲେ ହାଇକୋର୍ଟର ୧୧ କର୍ମଚାରୀ
ଓଡ଼ିଶା ହାଇକୋର୍ଟର ସିଭିଲ୍ ରେକର୍ଡ଼ ସେକ୍ସନର ଜଣେ କର୍ମଚାରୀ କିଛି ଦିନ ତଳେ କରୋନାରେ ଆକ୍ରାନ୍ତ ହୋଇଥିଲେ। ତାଙ୍କୁ ଭୁବନେଶ୍ୱରସ୍ଥିତ ଏକ କୋଭିଡ୍ ହସ୍ପିଟାଲ୍ରେ ଚିକିତ୍ସା କରାଯାଉଛି। ହାଇକୋର୍ଟର ଅନେକ କର୍ମଚାରୀ ତାଙ୍କ ସଂସ୍ପର୍ଶରେ ଆସିଥିବା ଆଶଙ୍କା ରହିଛି। ତେଣୁ ସିଭିଲ୍ ରେକର୍ଡ଼ ରୁମ୍ରେ କାର୍ଯ୍ୟ କରୁଥିବା ଅନ୍ୟ ୧୧ ଜଣ କର୍ମଚାରୀଙ୍କୁ ଗୃହ ସଙ୍ଗରୋଧରେ ଯିବାକୁ କୁହାଯାଇଛି। ସେମାନେ ୧୨ ତାରିଖ ପର୍ଯ୍ୟନ୍ତ ସଙ୍ଗରୋଧରେ ରହିବେ। ରବିବାର ଅଗ୍ନିଶମ ବିଭାଗର କର୍ମଚାରୀମାନେ ହାଇକୋର୍ଟର ପାର୍କିଂଠାରୁ ଆରମ୍ଭ କରି ରେକର୍ଡ଼ ବିଭାଗ ପର୍ଯ୍ୟନ୍ତ ସବୁ ଅଞ୍ଚଳକୁ ବିଶୋଧନ କରିଛନ୍ତି। ଅନ୍ୟପକ୍ଷରେ ସୋମବାର ଯେଉଁ ସବୁ ମାମଲା ବିଚାର ପାଇଁ ରହିଥିଲା, ସେସବୁ ଗୁରୁବାର ଶୁଣାଣି କରାଯିବ।