କରୋନା ସମୟରେ ଯୁବକମାନେ ସେମାନଙ୍କ ଭବିଷ୍ୟତକୁ ନେଇ ଚିନ୍ତିତ ଅଛନ୍ତି। କିଏ ଚାକିରି ପାଇବାକୁ ନେଇ ତ ଆଉ କିଏ ଚାକିରି ଚାଲିଯିବା ଭୟରେ ଅଛନ୍ତି। ଏସବୁ ଭିତରେ ୩ ସାଙ୍ଗ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି। ଉତ୍ତରପ୍ରଦେଶର ବାରାଣସୀ ଜିଲାର ୩ ଜଣ ଶିକ୍ଷିତ ଯୁବକ କରୋନା ସମୟରେ ଚାକିରି ଛାଡି ନୂଆ କୃଷି ପ୍ରଣାଳୀ ଆପଣାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆତ୍ମନିର୍ଭରଶୀଳ ଭାରତର ସ୍ବପ୍ନକୁ ପୂରଣ କରିବାରେ ନିୟୋଜିତ ଅଛନ୍ତି। ବାରାଣସୀର ଚିରାଗାଓଁ ବ୍ଲକର ଚୌବେପୁର ଅଞ୍ଚଳର ନାରାୟଣପୁରେ ୩ ଜଣ ସାଙ୍ଗ ମିଶି ଗ୍ରାମବାସୀଙ୍କୁ ନୂଆ କୃଷି ଶିକ୍ଷା ଦେଉଛନ୍ତି। ଛୋଟ ପୋଖରୀରେ ଶ୍ୱେତାଙ୍କ, ମୋହିତ ଏବଂ ରୋହିତ ଶାମୁକା ଚାଷ କରୁଛନ୍ତି। ଏହା ବ୍ୟତୀତ ଏହି ତିନିଜଣ ମହୁମାଛି ଚାଷ ଏବଂ ଛେଳି ମଧ୍ୟ ପାଳନ କରୁଛନ୍ତି।
ଶ୍ୱେତାଙ୍କ କହିଛନ୍ତି ଶାମୁକା ଚାଷ ପାରମ୍ପରିକ ଚାଷଠାରୁ ଟିକିଏ ଭିନ୍ନ। କୃଷି ଉଦ୍ୟୋଗ ମାଧ୍ୟମରେ ସେମାନେ ମୋତି ଚାଷ କରୁଛନ୍ତି। ଏମ୍ଏ ଏବଂ ବିଡବ୍ଲ୍ୟୁ ପାଠ ପଢିଥିବା ଶ୍ୱେତାଙ୍କ ଶାମୁକା ଚାଷ ପାଇଁ ଆଗ୍ରହୀ ଥିଲେ। ତେଣୁ ଇଣ୍ଟରନେଟ ମାଧ୍ୟମରେ ଏହା ବିଷୟରେ ଅଦତ୍କ ସୂଚନା ଲାଭ କଲେ। ଏଥିପାଇଁ ତାଲିମ ମଧ୍ୟ ନେଲେ। ସେ କହିଛନ୍ତି ଯେ ଶାମୁକାରୁ ମୋତି ବାହାର କରିବା କାର୍ଯ୍ୟରେ ତିନିଥର ଲାଭ ହେଉଛି।
ମହୁମାଛି ପାଳନ କରୁଥିବା ମୋହିତ ଆନନ୍ଦ ପଠକ କହିଛନ୍ତି ଯେ ବିଏଚୟୁରୁ ବିଏ ଶେଷ କରିବା ପରେ ସେ ପାରମ୍ପରିକ ଚାଷ ବଦଳରେ କିଛି ନୂଆ କରିବା ପାଇଁ ଦିଲ୍ଲୀ ଗାନ୍ଧୀ ଦର୍ଶନରୁ ତାଲିମ ନେବା ପରେ ମହୁମାଛି ଚାଷ ଆରମ୍ଭ କରିଥିଲେ। ନିଜେ ତାଲିମ ପାଇ ଅନ୍ୟମାନଙ୍କୁ ମଧ୍ୟ ତାଲିମ ଦେଉଛନ୍ତି। ବର୍ତ୍ତମାନ ମହୁ ବିକ୍ରୟ କରୁଥିବା କମ୍ପାନୀ ଏବଂ ମେଡିସିନ୍ ଷ୍ଟୋରଗୁଡିକ ଗୁଡିକ ମଧ୍ୟ ସେମାନଙ୍କଠାରୁ ମହୁ ନେଉଛନ୍ତି।
ରୋହିତ ଆନନ୍ଦ ପାଠକ ଏହି ତିନିଜଣ ବନ୍ଧୁଙ୍କ ମଧ୍ୟରୁ ଜଣେ, ଯିଏ ପୂର୍ବରୁ ଏକ ସମିତି କମିଟି କୃଷି ଉଦ୍ୟମର ପ୍ରତିନିଧୀ ଭାବରେ ଜଡିତ ଥିଲେ। ବର୍ତ୍ତମାନ ସେ ଏବଂ ଦୁଇ ସାଙ୍ଗଙ୍କୁ ଏକାଠି କରି ଏକ ନୂଆ ଆରମ୍ଭ କରିଛନ୍ତି। ସେ କରୋନା ସମୟରେ ଏକ ବଡ କମ୍ପାନୀର ଆଞ୍ଚଳିକ ମୁଖ୍ୟ ଭାବରେ ଚାକିରି ଛାଡି ବାରାଣସୀକୁ ଚାଲିଗଲେ।
ଏହି ୩ ସାଙ୍ଗ ମିଶି ଚଳିତ ବର୍ଷ ଆହୁରି ଦୁଇଶହ ଲୋକଙ୍କୁ ନିଜ କାର୍ଯ୍ୟରେ ଯୋଡିବା ଲକ୍ଷ୍ୟ ରଖିଛନ୍ତି। ସେମାନେ କହିଛନ୍ତି, କରୋନା ମହାମାରୀ ଅନେକ କିଛି ଶିକ୍ଷା ଦେଇଛି, କାରଣ ଆଗାମୀ ଦିନରେ ପରିବେଶ ଦ୍ରୁତ ଗତିରେ ବଦଳିବ ଏବଂ ଏହିପରି ଚାଷ କାର୍ଯ୍ୟ ମାଧ୍ୟମରେ କେବଳ ଯେ ରୋଜଗାର କରିହେବ ତା’ ନୁହେଁ ପରିବେଶ ମଧ୍ୟ ସନ୍ତୁଳିତ କରାଯାଇପାରିବ। ୟୁପି ସରକାରଙ୍କ କ୍ୟାବିନେଟ ମନ୍ତ୍ରୀ ତଥା ଅଞ୍ଚଳର ବିଧାୟକ ଅନିଲ ରାଜଭାର ମଧ୍ୟ ଏହି ଅଭିଯାନରେ ଖୁସି ହୋଇ ସେମାନଙ୍କୁ ଉତ୍ସାହିତ କରିଛନ୍ତି।