ଚିତ୍ରକୂଟ,୧୪।୫: ଉତ୍ତରପ୍ରଦେଶର ଚିତ୍ରକୂଟ ଜେଲ୍ରେ ଶୁକ୍ରବାର ଦୁଇଗୋଷ୍ଠୀ ମଧ୍ୟରେ ସଂଘର୍ଷ ଘଟି ୩ ଜଣ ବିଚାରାଧୀନ କଏଦୀ ପ୍ରାଣ ହରାଇଛନ୍ତି। ଅନଶୁଲ୍ ଦୀକ୍ଷିତ ନାମକ କଏଦୀ ଗ୍ୟାଙ୍ଗଷ୍ଟର ମୁକିମ୍ କାଲାଙ୍କ ଉପରକୁ ଗୁଳି ଚଳାଇବାରୁ ତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଗୁଳିମାଡ଼ରେ ଆହତ ମିରାଜୁଦ୍ଦିନ ନାମକ ଅନ୍ୟ ଜଣେ ଅପରାଧୀଙ୍କ ମଧ୍ୟ ମୃତ୍ୟୁ ଘଟିଛି। ମାଫିଆ ଡନ୍ ତଥା ବିଏସ୍ପି ବିଧାୟକ ମୁକ୍ତାର ଅନ୍ସାରୀଙ୍କ ଘନିଷ୍ଠ ହେଉଛନ୍ତି ମିରାଜୁଦ୍ଦିନ। ଦୀକ୍ଷିତଙ୍କୁ ଆତ୍ମସମର୍ପଣ ପାଇଁ ପୋଲିସ କହିଥିଲା। ସେ ଆତ୍ମସମର୍ପଣ ନ କରିବାରୁ ପୋଲିସ ଗୁଳିରେ ନିହତ ହୋଇଛନ୍ତି। ଜେଲ୍ ପରିସରକୁ କିପରି ଅସ୍ତ୍ର ଆସିଲା ତା’ର ତଦନ୍ତ କରାଯିବ ବୋଲି ଚିତ୍ରକୂଟ ଏସ୍ପି ଅଙ୍କିତ୍ ମିତ୍ତଲ କହିଛନ୍ତି। ଜେଲ୍ ଭିତରେ ଜଣେ ଗ୍ୟାଙ୍ଗଷ୍ଟର ଅନ୍ୟ ଜଣେ ଗ୍ୟାଙ୍ଗଷ୍ଟରକୁ ହତ୍ୟା କରିବା ଏହା ଦ୍ୱିତୀୟ ଘଟଣା। ୨୦୧୮ ଜୁଲାଇରେ ଗ୍ୟାଙ୍ଗଷ୍ଟର ମୁନ୍ନା ବଜରଙ୍ଗୀଙ୍କୁ ସୁନିଲ ରାଠି ନାମକ ଅନ୍ୟ ଜଣେ ଅନ୍ତେବାସୀ ବାଗପତ୍ ଜେଲ୍ରେ ଗୁଳିକରି ହତ୍ୟା କରିଥିଲେ।
