କଟକ ଅଫିସ,୫।୪: କଟକ ଏସ୍ସିବି ମେଡିକାଲରୁ ରବିବାର ପୁଣି ୩ ଜଣ ଦଲାଲଙ୍କୁ ମଙ୍ଗଳାବାଗ ପୋଲିସ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ଏସ୍ସିବି କ୍ୱାର୍ଟର୍ସ ନଂ.୩ ଧୋବିଲେନ ଅଞ୍ଚଳର ମୁକେଶ ନାୟକ(୩୩), ମଙ୍ଗଳାବାଗ ଥାନା ସଗଡିଆ ସାହି ଅଞ୍ଚଳର ପ୍ରୀତମ ନାୟକ (୩୮), ଖୋର୍ଦ୍ଧା ଜିଲା ନିରାକାରପୁର ଅଞ୍ଚଳର ସରୋଜ ମହାପାତ୍ର(୪୪)। ସେମାନଙ୍କଠାରୁ ଏକ ଆମ୍ବୁଲାନ୍ସ(ନଂ. ଓଡ଼ି୦୫ଏଜେଡ-୩୩୦୨) ଜବତ କରାଯାଇଛି। ମଙ୍ଗଳାବାଗ ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଏସିପି ଏସ୍କେ. ସରିଫଉଦ୍ଦିନ କହିଛନ୍ତି, ଶନିବାର ଏହି ଥାନାରେ ଜଗନ ସାହୁ ଏକ ଅଭିଯୋଗ କରିଥିଲେ। ଅଭିଯୋଗ ଅନୁଯାୟୀ, ଜଗନଙ୍କ ବନ୍ଧୁ ମଣ୍ଟୁ ମହାକୁଡ ସଡ଼କ ଦୁର୍ଘଟଣାରେ ଗୁରୁତର ହୋଇ ଏସ୍ସିବି ମେଡିକାଲରେ ଭର୍ତ୍ତି ହୋଇଥିଲେ। ସେଠାରେ ଆଉଟ୍ ସୋର୍ସିଂରେ କାମ କରୁଥିବା ଅଭିଯୁକ୍ତମାନେ କହିଥିଲେ, ଏଠାରେ ଠିକ୍ଭାବେ ଚିକିତ୍ସା କରାଯାଉନାହିଁ। ଏଣୁ ଯୋବ୍ରାସ୍ଥିତ ଏକ ନର୍ସିଂହୋମ୍କୁ ନିଆଗଲେ ରୋଗୀ ଶୀଘ୍ର ଭଲ ହୋଇଯିବେ। ଏଥିସହ ସେମାନେ ରୋଗୀଙ୍କ ଚିକିତ୍ସା ପାଇଁ ଏକ ଲକ୍ଷ ଟଙ୍କା ମାଗିଥିଲେ। ହେଲେ ଜଗନ ୩୮,୦୦୦ ଟଙ୍କା ଦଲାଲଙ୍କୁ ଦେଇଥିଲେ। ପରେ ସେମାନେ ଏକ ଆମ୍ବୁଲାନ୍ସ ଡାକିଥିଲେ। ତେବେ ସେମାନଙ୍କ ଉପରେ ସନ୍ଦେହ ହେବାରୁ ଏସ୍ସିବି କାଜୁଆଲ୍ଟିରେ ଥିବା ଡାକ୍ତର ଏବଂ କର୍ମଚାରୀମାନଙ୍କୁ ସେମାନଙ୍କ ବିଷୟରେ ଜଗନ ପଚରାଉଚରା କରିଥିଲେ। ଏହାପରେ ସେ ସତ୍ୟତା ଜାଣିପାରି ଅଭିଯୁକ୍ତଙ୍କୁ ଟଙ୍କା ଫେରସ୍ତ ପାଇଁ କହିଥିଲେ। ଅଭିଯୁକ୍ତମାନେ ଟଙ୍କା ଫେରସ୍ତ କରିବା ପରିବର୍ତ୍ତେ ଜଗନଙ୍କୁ ଧମକ ଦେଇଥିଲେ। ଏନେଇ ଜଗନ ମଙ୍ଗଳାବାଗ ଥାନାରେ ଅଭିଯୋଗ କରିବାରୁ ପୋଲିସ ଏକ ମାମଲା ରୁଜୁ କରିଥିଲା। ସୂଚନାଥାଉକି, ଗତ ୨ ତାରିଖରେ ମଙ୍ଗଳାବାଗ ପୋଲିସ ଏସ୍ସିବିରୁ ୬ ଜଣ ଦଲାଲଙ୍କୁ ଗିରଫ କରିଥିଲା।