ଫୁଲବାଣୀ ଅଫିସ, ୧୪।୪: ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭୋଟ ଗ୍ରହଣ କେନ୍ଦ୍ରରେ ବେଆଇନ କାର୍ଯ୍ୟ କରିବା ଅଭିଯୋଗରେ ଜିଲାପାଳ ଡା.ବୃନ୍ଦା ଡି ଆଉ ୩ ଜଣ ଶିକ୍ଷକଙ୍କୁ ନିଲମ୍ବିତ କରିଛନ୍ତି। ସେମାନେ ହେଲେ ତୁମୁଡିବନ୍ଧ ବ୍ଲକର ପ୍ରଧାନଶିକ୍ଷକ କାଳୁଚରଣ ମହାରଣା, ଚକାପାଦ ବ୍ଲକର ସହକାରୀ ଶିକ୍ଷକ ରଂଜିତ ମାଝୀ ଓ ଟିକାବାଲି ଏଏମ୍ସିଏସ୍ ମହାବିଦ୍ୟାଳୟର କ୍ରୀଡ଼ା ଶିକ୍ଷକ ସୁଶାନ୍ତ ଭୋଳ। ଏହାକୁ ମିଶାଇ ନିଲମ୍ବିତଙ୍କ ସଂଖ୍ୟା ୫ରେ ପହଞ୍ଚତ୍ଛି ା
ନିର୍ବାଚନ ବେଳେ ପ୍ରଧାନ ଶିକ୍ଷକ ମହାରଣା ଫୁଲବାଣୀ ବ୍ଲକ ଦୁଡୁକି ପଞ୍ଚାୟତ ୮ ନଂ ବୁଥ୍ରେ ପୋଲିଂ ଅଫିସର ଭାବେ ନିଯୁକ୍ତ ହୋଇଥିଲେ ା ବୁଥ୍ରେ ବାଲାଟ ପେପରକୁ ଉଦ୍ଦେଶ୍ୟ ମୂଳକ ଭାବେ ଭୁଲ ଢଙ୍ଗରେ ମୋଡିଥିବା ଅଭିଯୋଗ ହୋଇଥିଲା ା ସହକାରୀ ଶିକ୍ଷକ ମାଝୀଙ୍କୁ ଫିରିଙ୍ଗିଆ ବ୍ଲକ ରତଙ୍ଗ ପଞ୍ଚାୟତର ୧୦ ନଂ ବୁଥ୍ରେ ନିର୍ବାଚନ ପରଚାଳନା ଦାୟିତ୍ୱ ଦିଆଯାଇଥିଲା ା ସେ ବିନା କାରଣରେ ବାରମ୍ବାର ଭୋଟ ଦିଆ ଯାଉଥିବା ସ୍ଥାନକୁ ଯାଉଥିବା ନେଇ ତାଙ୍କ ନାମରେ ଅଭିଯୋଗ ହୋଇଥିଲା। ସେହିପରି କ୍ରୀଡା ଶିକ୍ଷକ ଭୋଳ ଫିରିଙ୍ଗିଆ ବ୍ଲକ ପଲାବ୍ରୁଡି ପଞ୍ଚାୟତ ୧ ନଂ ବୁଥରେ ଦାୟିତ୍ୱରେ ଥିଲେ। ସେ ଏକ ନିର୍ଦ୍ଦିଷ୍ଟ ଦଳ ପାଇଁ ଭୋଟର ମାନଙ୍କୁ ପ୍ରଭାବିତ କରୁଥିବା ନେଇ ଅଭିଯୋଗ ହୋଇଥିଲା। ସମସ୍ତ ଅଭିଯୋଗର ତଦନ୍ତ ପରେ ସମ୍ପୃକ୍ତ ଅଧିକାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରାଯାଇଥିଲା। ଜିଲାପାଳ ତଦନ୍ତ ରିପୋର୍ଟକୁ ଆଧାର କରି ଏହି ତିନି କର୍ମଚାରୀଙ୍କୁ ନିଲମ୍ବିତ କରିଛନ୍ତି। ସୁଚନାଯୋଗ୍ୟ, ଫୁଲବାଣୀ ବ୍ଲକ ମିଣିଆ ପଞ୍ଚାୟତର ବିଘାପଦର ୧୨ ନଂ ବୁଥ ଓ ମାସାପଦର ୧୩ ନଂ ବୁଥରେ ସରପଞ୍ଚ ପ୍ରାର୍ଥୀଙ୍କ ବାଲାଟ ପେପରକୁ ଉଦ୍ଦେଶ୍ୟ ମୂଳକ ଭାବେ ଭୁଲ ଢଙ୍ଗରେ ମୋଡିବା ଅଭିଯୋଗରେ ରାଇକିଆ ବ୍ଲକର ପ୍ରଧାନ ଶିକ୍ଷକ ରବୀନ୍ଦ୍ରନାଥ ପାତ୍ର ଓ କ.ନୂଆଗାଁ ବ୍ଲକର ସହକାରୀ ଶିକ୍ଷକ ନବ କିଶୋର ଓଝାଙ୍କୁ ପୂର୍ବରୁ ନିଲମ୍ବିତ କରାଯାଇଛି।