ଦୁବାଇ, ୧୯।୧୦: ବିଶ୍ୱର ସବୁଠାରୁ ବ୍ୟୟବହୁଳ କ୍ରିକେଟ୍ ଲିଗ୍ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ ବର୍ଷର ଇତିହାସରେ ‘ସୁପର୍ ସନ୍ଡେ’ ପ୍ରଥମଥର ‘ଫନ୍ ଡେ’ ବା ମଜାର ଦିନ ବୋଲି ପ୍ରମାଣିତ ହୋଇଛି। ଆଇପିଏଲ୍ ଇତିହାସରେ ପ୍ରଥମଥର ଲାଗି ଗୋଟିଏ ଦିନରେ ୩ଟି ସୁପର୍ ଓଭର ଖେଳାଯାଇଛି। ରବିବାର କୋଲକାତା ନାଇଟ୍ ରାଇଡର୍ସ ଓ ସନ୍ରାଇଜର୍ସ ହାଇଦ୍ରାବାଦ୍ ମଧ୍ୟରେ ଖେଳାଯାଇଥିବା ପ୍ରଥମ ମୁକାବିଲା ଟାଇ ରହିଥିଲା।
ଏହାପରେ ସୁପର୍ ଓଭର ଖେଳାଯାଇଥିଲା। ତେବେ ରବିବାର ସନ୍ଧ୍ୟାରେ କିଙ୍ଗ୍ସ ଇଲେଭେନ ପଞ୍ଜାବ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯାଇଥିବା ଅନ୍ୟ ଏକ ମ୍ୟାଚ୍ ମଧ୍ୟ ଟାଇ ରହିଥିଲା। କିନ୍ତୁ କୌତୁହଳର ବିଷୟ ଯେ, ପଞ୍ଜାବ ଓ ମୁମ୍ବାଇ ମଧ୍ୟରେ ମ୍ୟାଚ୍ ଟାଇ ହେବା ପରେ ସୁପର୍ ଓଭର ଖେଳାଯାଇଥିଲା। ତେବେ ଏହା ମଧ୍ୟ ଟାଇ ରହିଥିଲା। ଏହାପରେ ନୂତନ ନିୟମ ଅନୁଯାୟୀ, ମ୍ୟାଚ୍ର ଫଳାଫଳ ବାହାର କରିବା ଲାଗି ୨ୟ ସୁପର୍ ଓଭରର ସହାୟତା ନିଆଯାଇଥିଲା। ଏହିଭଳି ଭାବେ ଆଇପିଏଲ୍ ଇତିହାସରେ ଗୋଟିଏ ଦିନରେ ୩ ସୁପର୍ ଓଭର ଖେଳାଯାଇଥିଲା।
ପୂର୍ବରୁ ଆଇପିଏଲ୍ରେ ଗୋଟିଏ ଦିନରେ ଖେଳାଯାଇଥିବା ୨ଟି ମ୍ୟାଚ୍ କେବେ ମଧ୍ୟ ଟାଇ ରହି ନ ଥିଲା। ଆଇପିଏଲ୍ ୧୩ ବର୍ଷର ଇତିହାସରେ ଏହା ପ୍ରଥମ ଘଟଣା ଯେତେବେଳେ କି ଗୋଟିଏ ଦିନରେ ଅନୁଷ୍ଠିତ ୨ଟି ଯାକ ମ୍ୟାଚ୍ ଟାଇ ରହିଛି।