ପୁରୀ ଅଫିସ,୧୬ା୭:ତିନି ରଥର ଚକ ଓ ପ୍ରଭାରେ ଫାଟ ହୋଇଛି। ତାଳଧ୍ୱଜ ରଥ ଆଗପାର୍ଶ୍ୱ ଚକରେ ବଡ଼ ଫାଟ ହୋଇ ଚକଟି ଗୋଟିଏ ପାର୍ଶ୍ୱକୁ ମୋଡ଼ିଯାଇଥିବାବେଳେ ଦର୍ପଦଳନ ଓ ନନ୍ଦିଘୋଷରେ ସାମାନ୍ୟ ଫାଟ ହୋଇଥିବା ଦେଖିବାକୁ ମିଳିଛି। ଦକ୍ଷିଣମୋଡ଼ ପୂର୍ବରୁ ତିନି ରଥର ଯାଞ୍ଚ ପ୍ରକ୍ରିୟା ସମୟରେ ଏହା ଜଣାପଡ଼ିଛି। ଏ ନେଇ ରଥନିର୍ମାଣ କମିଟିର ତତ୍ତ୍ବାବଧାରକ ସୁଦର୍ଶନ ମେକାପ କହିଛନ୍ତି, ସବୁବର୍ଷ ରଥ ଦକ୍ଷିଣମୋଡ଼ ଲାଗି ନାକଚଣା ଦ୍ୱାରକୁ ଯିବା ପୂର୍ବରୁ ଯାଞ୍ଚ କରାଯାଇଥାଏ। ସେହିଭଳି ରଥ ଦକ୍ଷିଣମୋଡ଼ ନେବା ପରେ ମଧ୍ୟ ଚକ, ପ୍ରଭା ଇତ୍ୟାଦି ଯାଞ୍ଚ ହୁଏ। ଚଳିତବର୍ଷ ବାରମ୍ବାର ବ୍ରେକ୍ ଦିଆଯିବାରୁ ଚାପରେ ଏଭଳି ଫାଟ ହୋଇଛି। ଗୁରୁବାର ଏହି ଯାଞ୍ଚ ପ୍ରକ୍ରିୟାରେ ପୂର୍ବତଟ ରେଲ୍ଓ୍ବେର ୪୫ଜଣିଆ ଟେକ୍ନିସିଆନଙ୍କ ସମେତ ୧୦ ମହାରଣା, ୬ ଭୋଇସେବାୟତ ଓ ୩ଜଣ କମାରସେବକ ସାମିଲ ଥିଲେ। ଏମାନେ ରଥଗୁଡ଼ିକୁ ତନ୍ନତନ୍ନ କରି ଯାଞ୍ଚ କରିଥିଲେ। ନନ୍ଦିଘୋଷ ଓ ଦର୍ପଦଳନ ରଥରେ ଥିବା ସମସ୍ୟା ମଧ୍ୟ ସମାଧାନ କରାଯାଇଛି। ରେଲଓ୍ବେ ଟେକ୍ନିସିଆନ୍ ରବିନାରାୟଣ ପାଣିଗ୍ରାହୀ କହିଛନ୍ତି, ସବୁ ଫାଟକୁ ମରାମତି କରାଯାଇଛି। ୧୭ତାରିଖରେ ରଥ ଦକ୍ଷିଣ ମୋଡ଼ ହେବ। ତେଣୁ ପରେ ରଥ ଯାଞ୍ଚ କରାଯିବ।