ରାୟଗଡା ଅଫିସ/ଟିକିରି(ଡି.ଏନ୍.ଏ.), ୧୮।୧୦: ରାୟଗଡ଼ା ଜିଲା ଟିକିରି ଥାନା ଅଧୀନ ପଞ୍ଚାଳି ଗ୍ରାମରେ ପାଇଖାନା ଟାଙ୍କି କାମ କରିବା ବେଳେ ଶ୍ୱାସରୁଦ୍ଧ ହୋଇ ୩ ଜଣ ଶ୍ରମିକଙ୍କ ମୃତ୍ୟୁ ଘଟିଛି। ଅନ୍ୟ ଜଣେ ଗୁରୁତର ଅଛନ୍ତି। ମୃତକ ହେଲେ ପଣସପଦର ଗାଁର ଗୋବିନ୍ଦ କୁମ୍ଭାର(୨୫), ପଞ୍ଚାଳି ଗାଁର ସୀମା ମାଝି(୨୫)। ଅନ୍ୟ ଜଣେ ମୃତକଙ୍କ ପରିଚୟ ମିଳିନାହିଁ। ତାଙ୍କ ଘର କଂସାରିଗୁଡ଼ା ଗ୍ରାମରେ ବୋଲି ଜଣାପଡିଛି।
ସୂଚନାନୁଯାୟୀ, ପଞ୍ଚାଳି ଗ୍ରାମର ଜଗବନ୍ଧୁ ଗରଡ଼ାଙ୍କ ଘରେ ନୂଆ ପାଇଖାନା ଟାଙ୍କି ତିଆରି ହୋଇଥିଲା। ସୋମବାର ସ୍ଲାବ୍ ଫଲ୍ସ ଛଡ଼ାଇବା ପାଇଁ ଟାଙ୍କି ଭିତରକୁ ଶ୍ରମିକମାନେ ଯାଇଥିଲେ। ହେଲେ ଶ୍ରମିକମାନେ ଦୀର୍ଘ ସମୟ ଧରି ବାହାରକୁ ଆସି ନ ଥିଲେ। ସନ୍ଦେହ ହେବାରୁ ପାଖରେ କାମ କରୁଥିବା ଅନ୍ୟ ଜଣେ ଶ୍ରମିକ ରାଜାରାଓ ଟାକ୍ରି ଟାଙ୍କି ଭିତରକୁ ଅନାଇଥିଲେ। ଟାଙ୍କି ଭିତରୁ କିଛି ଦେଖା ଯାଉ ନ ଥିବାବେଳେ ସେ ହଠାତ୍ ଅଚେତ ହୋଇ ପଡିଥିଲେ। ସ୍ଥାନୀୟ ଲୋକେ ରାଜାରାଓଙ୍କୁ ଉଦ୍ଧାର କରି ଗୁରୁତର ଅବସ୍ଥାରେ ଟିକିରି ଡାକ୍ତରଖାନାକୁ ନେଇଥିଲେ। ଖବର ପାଇ ଟିକିରି ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚତ୍ ଥିଲେ। ଟାଙ୍କି ଭିତରେ ଅମ୍ଲଜାନର ଅଭାବ ରହିଥିବା ଜଣାପଡିଥିଲା। ପାଖରେ ଅତ୍ୟାଧୁନିକ ଉପକରଣ ନ ଥିବାରୁ ଅଗ୍ନିଶମ ବାହିନୀ ଟାଙ୍କି ଭିତରକୁ ଯାଇପାରି ନ ଥିଲେ। ରାୟଗଡ଼ାରୁ ଉପକରଣ ଆସିବା ପରେ ଟାଙ୍କି ଭିତରକୁ ଯାଇ ମୃତଦେହ ବାହାର କରାଯିବ ବୋଲି ସୂଚନା ମିଳିଛି। ଟିକିରି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।