ବେଙ୍ଗାଲୁରୁ,୨୪।୬: କର୍ନାଟକରେ ଶାସନ କରୁଥିବା ଭାଜପାର ନେତ୍ରୀ ତଥା ଦୁଇ ଥର ବୃହତ୍ ବେଙ୍ଗାଲୁରୁ ମହାନଗର ପାଳିକା (ବିବିଏମ୍ପି) କର୍ପୋରେଟର ରେଖା କାଦିରେଶଙ୍କୁ ହତ୍ୟା କରାଯାଇଛି। ଗୁରୁବାର ବେଙ୍ଗାଲୁରୁ ସ୍ଥିତି ଅଫିସ ବାହାରେ ସ୍ପଷ୍ଟ ଦିବାଲୋକରେ ଦୁଇ ଜଣ ଦୁର୍ବୃତ୍ତ ତାଙ୍କୁ ଗୋଡ଼େଇ ଗୋଡ଼େଇ ହାଣିଥିଲେ। ତେବେ ତାଙ୍କ ହତ୍ୟା ପଛରେ ପୂର୍ବ ଶତୃତା ରହିଥିବା ପୋଲିସ ପକ୍ଷରୁ ସନ୍ଦେହ କରାଯାଉଛି।
ପୂର୍ବରୁ ରେଖାଙ୍କ ସ୍ବାମୀ ଏସ୍. କାଦିରେଶଙ୍କୁ ୨୦୧୮ ଫେବୃୟାରୀ ୭ରେ ହତ୍ୟା କରାଯାଇଥିଲା। ସେ କଟନପେଟ୍ ଅଞ୍ଚଳରେ ଜଣେ ରାଉଡୀ ନେତା ଭାବେ ଜଣାଶୁଣା ଥିଲେ। ତାଙ୍କ ନାମରେ ହତ୍ୟା, ଅପହରଣ ଭଳି ୧୪ଟି ସଙ୍ଗୀନ ମାମଲା ଥିଲା। ଉକ୍ତ ଅଞ୍ଚଳରେ ସକ୍ରିୟ ଥିବା ବିରୋଧୀ ଗ୍ୟାଙ୍ଗ ତାଙ୍କୁ ହତ୍ୟା କରିଥିବା ତଦନ୍ତରୁ ଜଣାପଡ଼ିଥିଲା।
୪୫ ବର୍ଷୀୟା ରେଖାଙ୍କ ହତ୍ୟା ଘଟଣା ସମ୍ପର୍କରେ ଅତିରିିକ୍ତ ପୋଲିସ କମିଶନର ଏସ୍. ମୁରୁଗାନ କହିଛନ୍ତି, ଚାଲାଭାଦିପାଲୟାର ଭାଜପା କାଉନ୍ସିଲର ସକାଳ ୧୦ଟା ୩୦ରେ ଅଞ୍ଚଳରେ ଚାଲିଥିବା ରିଲିଫ୍ ବଣ୍ଟନ କାର୍ଯ୍ୟର ତଦାରଖ କରୁଥିଲେ। ଏହି ସମୟରେ ବାଇକ୍ ଯୋଗେ ଆସିଥିବା ଦୁଇ ଦୁର୍ବୃତ୍ତ ତାଙ୍କୁ ଖଣ୍ଡାରେ ଗୋଡ଼େଇ ଗୋଡ଼େଇ ହାଣିଥିଲେ। ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲ ନିଆଯାଇଥିଲା, ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ହତ୍ୟାକାଣ୍ଡ ପଛରେ ରେଖାଙ୍କ ଅଫିସର କେହି ସମୃକ୍ତ ଥିବା ପୋଲିସ ସନ୍ଦେହ କରୁଛି। କାରଣ ଅଫିସ ବାହାରେ ଲାଗିଥିବା ସିସିଟିଭି ଘଟଣା ସମୟରେ ସୁଇଚ୍ ଅଫ୍ ଥିଲା।