ନୂଆଦିଲ୍ଲୀ/ମଥୁରା,୨୯ା୯:ଜଣେ ଟ୍ରେନ୍ କର୍ମଚାରୀଙ୍କ ଦାୟିତ୍ୱହୀନତା ପାଇଁ ଉତ୍ତରପ୍ରଦେଶର ମଥୁରା ରେଳଷ୍ଟେଶନରେ ଛିଡ଼ାହୋଇଥିବା ଏକ ଟ୍ରେନ୍ ମଙ୍ଗଳବାର ରାତିରେ ଲାଇନ୍ଚ୍ୟୁତ ହୋଇ ପ୍ଲାଟ୍ଫର୍ମକୁ ମାଡ଼ିଯାଇଥିଲା। ଏଥିରେ ଜଣେ ମହିଳା ଆହତ ହୋଇଥିଲେ। ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦିଆଯାଇଥିବାବେଳେ ଟ୍ରେନ୍ରେ ଲାଗିଥିବା ସିକ୍ୟୁରିଟି କ୍ୟାମେରାରେ ରେକର୍ଡ ହୋଇଥିବା ସେହି ସମୟର ଭିଡିଓରୁ ଦୁର୍ଘଟଣାର କାରଣ ଜଣାପଡ଼ିଛି। ଟ୍ରେନ୍ରୁ ସମସ୍ତ ଯାତ୍ରୀ ଓହ୍ଲାଇଯିବା ପରେ ରେଲଓ୍ବେର ଜଣେ କର୍ମଚାରୀ ଇଞ୍ଜିନ୍ କ୍ୟାବିନ୍ରେ ପ୍ରବେଶ କରୁଥିବା ଉକ୍ତ ଭିଡିଓରୁ ଦେଖିବାକୁ ମିଳିଛି। ସଚିନ୍ ନାମକ ଉକ୍ତ ବ୍ୟକ୍ତି ଇଞ୍ଜିନ୍ର ଥ୍ରୋଟଲ ଉପରେ ତାଙ୍କ ବ୍ୟାଗ୍ ରଖି ଫୋନ୍ରେ ଭିଡିଓ କଲ୍ରେ ବ୍ୟସ୍ତ ଥିଲେ। ବ୍ୟାଗ୍ର ଚାପ ଯୋଗୁ ଥ୍ରୋଟଲ୍ ଫରଓ୍ବାର୍ଡ ପୋଜିଶନ୍କୁ ଚାଲିଯାଇଥିଲା। ଫଳରେ ଟ୍ରେନ୍ଟି ପ୍ଲାଟ୍ଫର୍ମ ଆଡ଼କୁ ମାଡ଼ିଯାଇଥିଲା। ଟ୍ରେନ୍ ଆଗକୁ ବଢ଼ିବା ସହ ଡେଡ୍ ଏଣ୍ଡ୍କୁ ଭାଙ୍ଗି ଏହାର କିଛି ଅଂଶ ପ୍ଲାଟ୍ଫର୍ମକୁ ଉଠିଯାଇଥିବା ଭିଡିଓରେ ଦେଖାଯାଇଛି। ଏହି ଦୁର୍ଘଟଣା ପାଇଁ ସଚିନ୍ଙ୍କ ସମେତ ୫ ଜଣଙ୍କୁ ନିଲମ୍ବନ କରାଯାଇଥିବା ଡିଜିଜନାଲ ରେଲ୍ଓ୍ବେ ମ୍ୟାନେଜର ପ୍ରକାଶ ଅଗ୍ରଓ୍ବାଲ କହିଛନ୍ତି। ଇଞ୍ଜିନ୍ କ୍ୟାବିନ୍କୁ ଚାବି ଆଣିବାକୁ ଯାଇଥିବା ସଚିନ ସେହି ସମୟରେ ମଦ ପିଇଥିଲେ କି ନାହିଁ, ତାହାର ତଦନ୍ତ କରାଯାଉଛି। ତାଙ୍କୁ ହସ୍ପିଟାଲ ନିଆଯାଇ ରକ୍ତ ନମୁନା ପରୀକ୍ଷା ପାଇଁ ପଠାଯାଇଛି।