ବ୍ରହ୍ମଗିରି,୨୭।୫(ଡି.ଏନ୍.ଏ.): ସାମୁଦ୍ରିକ ବାତ୍ୟା ୟାସ୍ ପୁରୀ ଜିଲାରେ ବିଶେଷ କ୍ଷୟକ୍ଷତି କରିନାହିଁ। ତଥାପି ବ୍ରହ୍ମଗିରି ଅଞ୍ଚଳରେ ବାତ୍ୟା ପ୍ରଭାବରେ ବୁଧବାର କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ଅରଖକୁଦା ଗାଁରେ ସମୁଦ୍ରର ଜୁଆର ପାଣି ପଶିଯାଇଛି। ଫଳରେ ଲୋକମାନେ ଭୟଭୀତ ହୋଇପଡିଛନ୍ତି। ‘ୟାସ’ ମୁକାବିଲା ପାଇଁ ଜିଲା ପ୍ରଶାସନ ସଜାଗ ରହି ଅନେକ ମତ୍ସ୍ୟଜୀବୀଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତରିତ କରିଥିଲା। ବାତ୍ୟା ପ୍ରଭାବରୁ ବ୍ରହ୍ମଗିରି ଅଞ୍ଚଳ ବର୍ତ୍ତିଯାଇଥିବା ସମୟରେ ପୂର୍ଣ୍ଣମୀ ତିଥିରେ ସମୁଦ୍ର ଅଶାନ୍ତ ହୋଇଥିଲା। ଏହି ଗ୍ରାମକୁ ସାମୁଦ୍ରିକ ଜୁଆରରୁ ସୁରକ୍ଷା ପାଇଁ ଗ୍ରାମ ଚାରିପଟେ ରିଙ୍ଗ ବନ୍ଧ ହୋଇଛି। କିନ୍ତୁ ଦୁର୍ବଳ ରିଙ୍ଗବନ୍ଧ ଯୋଗୁ ଅରଖକୁଦା ଗାଁର ମେରାଇନ୍ ଥାନା ନିକଟ, ଭାଗବତ ସାହି, ଲକ୍ଷ୍ମୀନାରାୟଣ ସାହି ଓ ହରଚଣ୍ଡୀ ସାହି ଇତ୍ୟାଦିରେ ଜୁଆର ପାଣି ପଶିଛି। ଫଳରେ ସ୍ଥାନୀୟ ମତ୍ସ୍ୟଜୀବୀ ଆତଙ୍କିତ ହୋଇପଡ଼ିଛନ୍ତି। ସୂଚନା ଥାଉକି, କୋଟି କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ରିଙ୍ଗ୍ ବନ୍ଧ ବର୍ତ୍ତମାନ ସୁଦ୍ଧା ଶେଷ ହୋଇ ନ ଥିବାବେଳେ ଏବଂ ରିଙ୍ଗବନ୍ଧରେ ଥିବା କଲଭର୍ଟରେ ଗେଟ୍ ବ୍ୟବସ୍ଥା ନ ଥିବାରୁ ସମୁଦ୍ର ଜୁଆର ପାଣି ଗାଁରେ ପଶୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ତେଣୁ ଯଥାଶୀଘ୍ର ପ୍ରଶାସନ ପକ୍ଷରୁ ଏହି ଅଞ୍ଚଳକୁ ଗୁରୁତ୍ୱ ଦେଇ ଠିକ୍ ଭାବେ ରିଙ୍ଗ ବନ୍ଧ ନିର୍ମାଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।