ଘଟଗାଁ,୧୧।୪(ଡି.ଏନ.ଏ): କେନ୍ଦୁଝର ଜିଲା ଘଟଗାଁ ରେଞ୍ଜ ଅଟେଇ ସଂରକ୍ଷିତ ଜଙ୍ଗଲରେ ପୁଣି ବାଘ ଆତଙ୍କ ଦେଖାଦେଇଛି। ଚରିବାକୁ ଯାଇଥିବା ଏକ ଗାଈକୁ ବାଘ ଆକ୍ରମଣ କରି କ୍ଷତାକ୍ତ କରିଛି। ଖବରପାଇ ରେଞ୍ଜ ଅଫିସର ପହଞ୍ଚତ୍ ଗାଈର ଚିକିତ୍ସା ବ୍ୟବସ୍ଥା କରିବା ସହ ତଦନ୍ତ କରୁଥିବା କହିଛନ୍ତି।
ସୂଚନା ଅନୁଯାୟୀ, ୨୦ନଂ. ଜାତୀୟ ରାଜପଥକୁ ଲାଗିଥିବା ଉପରଡ଼ିହା ଗ୍ରାମ ଅନ୍ତର୍ଗତ ବନ୍ଧସାହିର ଶିରପାଣୀ ଲିଆଙ୍ଗିଙ୍କ ଗାଈ ସୋମବାର ଜଙ୍ଗଲକୁ ଚରିବାକୁ ଯାଇଥିଲା। ସନ୍ଧ୍ୟାରେ ଗୁରୁତର ହୋଇ ଘରକୁ ଫେରିବା ପରେ ଅଞ୍ଚଳରେ ଆତଙ୍କ ଖେଳିଯାଇଥିଲା। ବାଘ ଆକ୍ରମଣରେ ଗାଈଟିର ପେଟରେ ଗଭୀର ଆଘାତ ଲାଗିଥିବା ଦେଖିବାକୁ ମିଳିଛି। ଗାଈର ମାଲିକ ଏ ସଂକ୍ରାନ୍ତରେ ବନବିଭାଗକୁ ଜଣାଇବା ପରେ ଘଟଗାଁ ଫରେଷ୍ଟର ଯତିନ୍ଦ୍ର କୁମାର ସାହୁ ଓ ଫରେଷ୍ଟଗାର୍ଡ ଶ୍ରବଣ ପାତ୍ର ଘଟଣାସ୍ଥଳକୁ ଯାଇ ତୁରନ୍ତ ଗାଈର ଚିକିତ୍ସା ବ୍ୟବସ୍ଥା କରିଥିଲେ। ତେବେ ଏହା ବାଘ ଆକ୍ରମଣ କି ନୁହେଁ ତାହା ବନବିଭାଗ ସ୍ପଷ୍ଟ କରିନାହିଁ। ବାଘ ମୁଣ୍ଡକୁ ଆକ୍ରମଣ କରିଥାଏ। ମାତ୍ର ଏ କ୍ଷେତ୍ରରେ ପେଟକୁ ଆକ୍ରମଣ କରାଯାଇଛି। ମଙ୍ଗଳବାର ବିଶେଷଜ୍ଞଙ୍କ ଦ୍ୱାରା ଯାଞ୍ଚ ପରେ ଏହା ସ୍ପଷ୍ଟ ହେବ ବୋଲି ଘଟଗାଁ ରେଞ୍ଜ ଅଫିସର ପ୍ରଭାତ କୁମାର କୁଅଁର କହିଛନ୍ତି।