ଡେରାଡୁନ୍,୧୭ା୪: ଦେଶରେ ବାଘ ସଂଖ୍ୟା ବଢ଼ୁଥିବାବେଳେ ପର୍ଯ୍ୟାପ୍ତ ବାସସ୍ଥାନ ଅଭାବ କିମ୍ବା ଖାଦ୍ୱ ଅନ୍ବେଷଣରେ ସେମାନେ ଗାଁ ଓ ସହରମୁହାଁ ହେଉଛନ୍ତି। ଫଳରେ ବାଘ ଆକ୍ରମଣ ବୃଦ୍ଧି ପାଉଛି। ଉତ୍ତରାଖଣ୍ଡରେ ବାଘ ଆକ୍ରମଣରେ ୨ ଜଣଙ୍କ ଜୀବନ ଯିବା ପରେ ଦୁଇଟି ଜିଲାରେ ଥିବା ଗ୍ରାମାଞ୍ଚଳରେ ଏକପ୍ରକାର କର୍ଫ୍ୟୁ ଲାଗୁ କରାଯାଇଛି। ଗ୍ରାମବାସୀମାନଙ୍କୁ ସନ୍ଧ୍ୟା ପରେ ଘରୁ ନ ବାହାରିବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶନାମା ଜାରି ହୋଇଛି। ସନ୍ଧ୍ୟା ୭ରୁ ସକାଳ ୬ ପର୍ଯ୍ୟନ୍ତ ଦୁଇ ଜିଲାର ଲୋକମାନଙ୍କୁ ବାହାରକୁ ଯିବା ବାରଣ କରାଯାଇଛି।
ଏହା ସହ ସୋମବାରଠାରୁ ଦୁଇଦିନ ଯାଏ ସ୍କୁଲ୍ଗୁଡ଼ିକୁ ବନ୍ଦ କରିଦିଆଯାଇଛି। ଉତ୍ତରାଖଣ୍ଡରେ ଗତ ଗୁରୁବାର ଓ ରବିବାର ବାଘ ଆକ୍ରମଣରେ ୨ ଜଣଙ୍କ ମୃତ୍ୟୁ ଘଟିଥିଲା। ଦୁଇଟି ଆକ୍ରମଣରେ ଗୋଟିଏ ବାଘ ସମ୍ପୃକ୍ତ କି ନୁହେଁ, ତାହା ଏଯାବତ୍ ସ୍ପଷ୍ଟ ହୋଇନାହିଁ। ଗ୍ରାମାଞ୍ଚଳରେ ଏକ ବାଘ ବୁଲୁଥିବା ନେଇ ଗତ ୧୦ ତାରିଖରେ ବନ ବିଭାଗକୁ ଖବର ମିଳିଥିଲା। ଉକ୍ତ ଅଞ୍ଚଳ ଉପରେ ନଜର ରଖାଯାଇଥିବା ବନ ଅଧିକାରୀ ସ୍ବପ୍ନିଲ ଅନିରୁଦ୍ଧ କହିଛନ୍ତି। ସଶସ୍ତ୍ର ବନ କର୍ମଚାରୀମାନଙ୍କୁ ବିଭିନ୍ନ ସ୍ଥାନରେ ମୁତୟନ କରାଯାଇଛି।