ରାଞ୍ଚି/ଚେନ୍ନାଇ: ତାମିଲନାଡୁର ଭଣ୍ଡାଲୁରସ୍ଥିତ ଆରିଗ୍ନାର ଆନ୍ନା ଜାତୀୟ ଉଦ୍ୟାନରେ ୯ ସିଂହ କୋଭିଡ୍ ପଜିଟିଭ୍ ଚିହ୍ନଟ ହୋଇଥିଲେ। ସେମାନଙ୍କ ମଧ୍ୟରୁ ୯ ବର୍ଷର ଏକ ମାଈ ସିଂହର ମୃତ୍ୟୁ ଘଟିଛି। ଜୁଲୋଜିକାଲ ପାର୍କର ସଫାରି ଏରିଆରେ ରଖାଯାଇଥିବା ଏହି ସିଂହଟି ଗୁରୁବାର ସନ୍ଧ୍ୟା ୬ଟା ୧୫ରେ ଆଖି ବୁଜିଦେଇଥିଲା ବୋଲି ଶୁକ୍ରବାର ଏକ ପ୍ରେସ୍ ରିଲିଜ୍ରେ କୁହାଯାଇଛି। ସେହିପରି ଝାଡ଼ଖଣ୍ଡ ରାଜଧାନୀ ରାଞ୍ଚିରେ ଥିବା ଭଗବାନ ବିର୍ସା ମୁଣ୍ଡା ବାୟୋଲୋଜିକାଲ ପାର୍କରେ ୧୦ ବର୍ଷର ଅଣ୍ଡିରା ବାଘ ‘ଶିବା’ ମଧ୍ୟ ଗୁରୁବାର ରାତିରେ କୋଭିଡ୍-୧୯ରେ ଆକ୍ରାନ୍ତ ହୋଇ ପ୍ରାଣ ହରାଇଥିବା ଜଣାପଡ଼ିଛି। ଶିବାକୁ ୨୦୧୪ରେ ବେଙ୍ଗାଲୁରୁରୁ ଉକ୍ତ ଚିଡ଼ିଆଖାନାକୁ ଅଣାଯାଇଥିଲା। ଗତ ୪ ଦିନ ଧରି ବାଘଟି ଜ୍ୱର ଓ ସଂକ୍ରମଣରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିଲା ବୋଲି ଜୁ’ର ପ୍ରାଣୀ ଚିକିତ୍ସକ ଡ. ଓମ୍ ପ୍ରକାଶ ସାହୁ ସୂଚନା ଦେଇଛନ୍ତି।
