ବମ୍ବେ: ଅଭିନେତାଙ୍କ ପୁଅ ଭାବେ ନୁହେଁ ବରଂ ଜଣେ ଦକ୍ଷ କଳାକାର ଭାବେ ବଲିଉଡ୍ର ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି ଟାଇଗର ଶ୍ରଫ। ଲଗାତାର ଭାବେ ହିଟ୍ ଫିଲ୍ମ ଦେଇ ଆସୁଛନ୍ତି ସେ। ଗତବର୍ଷ ରିଲିଜ ହୋଇଥିବା ଫିଲ୍ମ ‘ଓ୍ବାର’ ବକ୍ସ ଅଫିସରେ ଭଲ ବ୍ୟବସାୟ କରିଥିଲା। ଦିନକୁ ଦିନ ଚାହିଦା ବଢ଼ୁଥିବାରୁ ମୋଟା ଅଙ୍କର ପାଉଣା ମଧ୍ୟ ନେଉଛନ୍ତି ସେ। ଫିଲ୍ମ ସହ ବିଜ୍ଞାପନରେ ମଧ୍ୟ ସେ ନଜର ଆସିଥାନ୍ତି। ମାତ୍ର ୩୨ ବର୍ଷ ବୟସରେ ଏବେ ସେ ୧୦୪ କୋଟିର ମାଲିକ।
ଟାଇଗରଙ୍କ ଅସଲ ନାମ ହେଉଛି ହେମନ୍ତ ଶ୍ରଫ୍। ସେ ଅଭିନେତା ଜ୍ୟାକି ଶ୍ରଫ ଏବଂ ଆଏଶା ଶ୍ରଫ୍ଙ୍କ ପୁଅ। ଫିଲ୍ମ ‘ହିରୋପନ୍ତୀ’ ଜରିଆରେ ବଲିଉଡ୍ରେ ଡେବ୍ୟୁ କରିଥିଲେ ସେ।
ବାପାଙ୍କ ଭଳି ଦାମୀ ଗାଡ଼ିର ସଉକ ରହିଛି ଟାଇଗରଙ୍କର। ତାଙ୍କ ଗ୍ୟାରେଜରେ ଅନେକ ଦାମୀ ଗାଡ଼ି ରହିଛି। ସେଥିରେ ବିଏମ୍ଡବ୍ଲୁ, ମର୍ସଡିଜ୍, ଜାଗୁଆର, ରେଞ୍ଜ ରୋଭର ଭଳି କମ୍ପାନୀର ଗାଡ଼ି ରହିଛି।
ନିକଟରେ ଟାଇଗର ୮ ବିଏଚ୍କେ ଘର କିଣିଛନ୍ତି। ଏଥିରେ ଓପନ ଏୟାର ଜିମ୍, ଡ୍ୟାନ୍ସ ଷ୍ଟୁଡିଓ, ସି ଭ୍ୟୁ ଭଳି ସୁବିଧା ରହିଛି। ଏହାଛଡ଼ା ସେ ଗୋଟିଏ କୋଠାରେ ତିନୋଟି ମହଲା କିଣିଥିବା କୁହାଯାଉଛି। ଏଥିଲାଗି ସେ ୩୧.୫ କୋଟି ଟଙ୍କା ଖର୍ଚ୍ଚ କରିଛନ୍ତି।
ଆଜି ଏହି ହ୍ୟାଣ୍ଡସମ ଅଭିନେତାଙ୍କ ଜନ୍ମଦିନ ହୋଇଥିବା ବେଳେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି। ସୋସିଆଲ ମିଡିଆରେ ସାଥୀ କଳାକାର, ପ୍ରଶଂସକମାନେ ନିଆରା ଢ଼ଙ୍ଗରେ ତାଙ୍କୁ ବାର୍ତ୍ତା ଦେଉଥିବା ଦେଖିବାକୁ ମିଳୁଛି।