ମୁନିଗୁଡ଼ା, ୩।୧୦(ରାଧେଶ୍ୟାମ ଅଗ୍ରଓ୍ବାଲ): ରାୟଗଡ଼ା ଜିଲା ମୁନିଗୁଡ଼ା ରେଞ୍ଜ ଅନ୍ତର୍ଗତ ଜଗଦଳପୁର ଫରେଷ୍ଟ ବିଟ୍ ତଥା ଅମ୍ବାଦଳା ଥାନା ଅନ୍ତର୍ଗତ କନ୍ଧମାଳ ସୀମାରେ ଥିବା ବଡ଼ କାନ୍ଦୁଲପଡା ଗ୍ରାମରୁ ପୋଲିସ ଗୋଟିଏ କଲରାପତରିଆ ବାଘଛାଲ, ୨ଦେଶୀ ବନ୍ଧୁକ ଓ କିଛି ବାରୁଦ ପାଉଡର ଜବତ କରିବା ସହ ଜଣେ ଶିକାରୀକୁ ଗିରଫ କରିଛି। ଗିରଫ ଶିକାରୀ ଜଣକ ହେଲେ ବଡ଼ କାନ୍ଦୁଲପଡା ଗ୍ରାମର କୀତାନା ଆନ୍ଦକିଆ (୩୧) l
ସୂଚନା ଅନୁଯାୟୀ, ବିଶେଷ ସୂତ୍ରରୁ ଖବର ପାଇବା ପରେ ରେଞ୍ଜର ଅନୀଲ କୁମାର ବାଲାଙ୍କ ନିର୍ଦ୍ଦେଶକ୍ରମେ ଏକ ଟିମ୍ ବଡ଼ କାନ୍ଦୁଲପଡା ଗ୍ରାମର କୀତାନା ଆନ୍ଦକିଆଙ୍କ ଘରେ ଚଢ଼ାଉ କରିଥିଲେ l ଚଢ଼ାଉ ସମୟରେ ତାଙ୍କ ଘରୁ କଲରାପତରିଆ ବାଘଛାଲ, ଦୁଇଟି ଦେଶୀ ବନ୍ଧୁକ ଓ କିଛି ବାରୁଦ ପାଉଡର ଜବତ କରିଛି। ଆନ୍ଦକିଆଙ୍କୁ ଗିରଫ କରାଯାଇଥିବା ବେଳେ ସାମନ୍ତ ସିକ୍କା ନାମକ ଆଉ ଜଣେ ବ୍ୟକ୍ତି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଜବତ ବାଘ ଛାଲଟି ଅଣ୍ଡିରା ବାଘ ଓ ଏହାର ଲମ୍ବ ୨୨୦ ସେ.ମି. ଥିବା ବେଳେ ଚଉଡା ୬୦ ସେ.ମି.। ବାଘନଖ ଓ ହାଡ଼ ସେ ବିକ୍ରିକରି ଦେଇଥିବା ଆନ୍ଦକିଆ ସ୍ବୀକାର କରିଛନ୍ତି। ଏ ନେଇ ମୁନିଗୁଡ଼ା ଫରେଷ୍ଟ ଅଫିସରେ କେସ୍ ନମ୍ବର ୧୪୪/୨୩ରେ ମାମଲା ରୁଜୁକରି ଅଭିଯୁକ୍ତ ଶିକାରୀ କୀତାନାକୁ କୋର୍ଟ ଚାଲାଣ କରିବା ସହ ଏଥିରେ ଅନ୍ୟ କାହାର ସମ୍ପୃକ୍ତି ଅଛି ସେନେଇ ଅଧିକ ତଦନ୍ତ ଜାରି ରହିଛି ବୋଲି ମୁନିଗୁଡା ରେଞ୍ଜର ଅନୀଲ କୁମାର ବାଲା କହିଛନ୍ତି l ଚଢ଼ାଉ ସମୟରେ ଅମ୍ବାଦଳା ଫରେଷ୍ଟର ସୁରେଶ ପାତ୍ର, ମୁନିଗୁଡା ଫରେଷ୍ଟର ପ୍ରମୋଦିନୀ ମଣ୍ଡାଙ୍ଗୀ, ରୋନିତ କୁମାର ମହାରଣା, ପ୍ରଳୟ ଦଣ୍ଡସେନା, ଜଗଦଳପୁର ବିଟର ଫରେଷ୍ଟ ଗାର୍ଡ ସୁଭାଷିନୀ ମୂଳିଙ୍କ ସମେତ ୧୦ ଜଣ ୱାଇଡ ଲାଇଫ ସ୍କ୍ବାଡ୍ ସାମିଲ ଥିଲେ।