କେନ୍ଦୁଝର,୨୧ା୫(ସ୍ବ.ପ୍ର.): ଆନନ୍ଦପୁର ବନ୍ୟପ୍ରାଣୀ ଡିଭିଜନର ଦୈତାରୀ ରେଞ୍ଜ ବୁଢୀପଦା ଗ୍ରାମରୁ ମହାବଳ ବାଘ ଛାଲ ଜବତ ଘଟଣାରେ ବୁଟୁ ମହାକୁଡ଼ (୩୦)ଙ୍କୁ ଗିରଫ କରାଯାଇଥିବା ବେଳେ ଆଜି ତାଙ୍କ ବାପା ଦୁର୍ଯ୍ୟୋଧନ ମହାକୁଡ଼ (୬୦) ଓ ଭାଇ ପଞ୍ଚୁ ମହାକୁଡ଼ଙ୍କୁ ବନ ବିଭାଗ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି। ଫଳରେ ଗିରଫ ସଂଖ୍ୟା ତିନିରେ ପହଞ୍ଚିଥିବା ବେଳେ ଏଥିରେ ସମ୍ପୃକ୍ତ ଅନ୍ୟମାନଙ୍କୁ ଗିରଫ କରିବାକୁ ବନ ବିଭାଗ ଚଢ଼ାଉ ଜାରି ରଖିଛି। ଅନ୍ୟ ଜଣେ ନାବାଳକଙ୍କୁ ଆଣି ପଚରାଉଚରା କରିବା ପରେ ଛାଡ଼ି ଦିଆଯାଇଥିବା ଜଣାପଡ଼ିଛି।
ଗୁରୁବାର ରାତିରେ ଏହି ଛାଲକୁ ବନ ବିଭାଗ ପକ୍ଷର ଜବତ କରାଯାଇଥିଲା। ତେବେ ଜବତବେଳେ ଗ୍ରାମବାସୀଙ୍କ ଆକ୍ରମଣରେ ବନ ବିଭାଗ କର୍ମଚାରୀ ଆହତ ହୋଇଥିବା ବେଳେ ଏକ ଗାଡ଼ି ଭାଙ୍ଗି ଦେଇଥିଲେ। ଆହତ ବନ କର୍ମଚାରୀଙ୍କ ଅଧିକ ଚିକିତ୍ସା ପାଇଁ କଟକ ବଡ଼ଡାକ୍ତରଖାନାକୁ ପଠାଯାଇଥିବା ଜଣାପଡ଼ିଛ। ରାଜ୍ୟରେ ମହାବଳ ବାଘ ଲୋପ ପାଇବାକୁ ବସିଥିବାବେଳେ ଏହି ବାଘଟି କେଉଁଠୁ ଆସିଲା ଏବଂ କେଉଁଠି ଶିକାର କରାଗଲା ତାହାର ସଠିକ୍ ତଥ୍ୟ ବନ ବିଭାଗ ଖୋଜୁଛି। ତେବେ ରେବଣ- କଳାପାଟ ସଂରକ୍ଷିତ ଜଙ୍ଗଲ ସୀମାରେ ମଇଁଷି ମାରିବା କାରଣରୁ ଏଭଳି ବିଷ ଦେଇ ହତ୍ୟା କରାଯାଇଥିବା କୁହାଯାଉଛି। ଏକ ମଇଁଷିକୁ ବାଘ ମାରିଦେବା ପରେ ତା’ ଉପରେ ବିଷ ପକାଇ ଦେଇଥିଲେ। ଉକ୍ତ ମାଂସକୁ ଖାଇ ବାଘଟି ମରିଯାଇଥିଲା। ତେବେ କିଏ ବିଷ ଦେଇ ମାରିଥିଲା ତାହା ସ୍ପଷ୍ଟ ଜଣାପଡ଼ିନାହିଁ। ଏହାର ଚମଡ଼ାକୁ ଗିରଫ ଅଭିଯୁକ୍ତମାନେ ସଂଗ୍ରହ କରି କିଣାବିକା କରୁଥିବା ସମୟରେ ଧରା ପଡ଼ିଯାଇଥିଲେ ବୋଲି କୁହାଯାଉଛି। ବାଘଗଣନା ବେଳେ ଏହା ଚିହ୍ନଟ ହୋଇ ନ ଥିଲା। ଏଣୁ ଏହି ମହାବଳ ବାଘଟି ଶିମିଳିପାଳ ବାଘ ସଂରକ୍ଷଣ ପ୍ରକଳ୍ପ ଅଞ୍ଚଳରୁ ଚାଲି ଆସିଥିବା ସନ୍ଦେହ କରାଯାଉଛି।