ନାକଟିଦେଉଳ,୧୨ା୪(ଡି.ଏନ.ଏ.): ସମ୍ବଲପୁର ଜିଲା ନାକଟିଦେଉଳ ଥାନା ପେଣ୍ଠବାହାଳ ନିକଟ ଚମ୍ପାଳି ନଦୀଠାରେ ମଙ୍ଗଳବାର ଏସ୍ଟିଏଫ୍ ଟିମ୍ ଚଢାଉ କରି ଏକ କଲରାପତରିଆ ବାଘଛାଲ ଜବତ କରିଛି। ଏହାସହ ଏଥିରେ ସମ୍ପୃକ୍ତ ଅଭିଯୁକ୍ତ ନାକଟିଦେଉଳ ଗ୍ରାମ ହରିଜନ ସାହିର ବାବୁଲି ନାଏକଙ୍କୁ ଗିରଫ କରି ବୁଧବାର ରେଢାଖୋଲ କୋର୍ଟ ଚାଲାଣ କରିଛି। ବାବୁଲି ବାଘଛାଲ ବାହାର ଅଞ୍ଚଳକୁ ଚାଲାଣ କରିବାକୁ ଉଦ୍ୟମ କରୁଥିବା ଏସ୍ଟିଏଫ୍ ସୂଚନା ପାଇ ଚଢାଉ କରିଥିଲା। ଏସ୍ଟିଏଫ୍ କେସ୍ ନମ୍ବର ୭/୨୩ରେ ଏକ ମାମଲା ରୁଜୁ କରି ବନ୍ୟଜନ୍ତୁ ସଂରକ୍ଷଣ ଆଇନ ୧୯୭୨ ବଳରେ ଅଭିଯୁକ୍ତ ବାବୁଲିଙ୍କୁ କୋର୍ଟ ଚାଲାଣ କରିଛି। ଅନ୍ୟପକ୍ଷରେ ଜବତ କଲରାପତରିଆ ଛାଲର ବାଇଲୋଜିକାଲ ପରୀକ୍ଷା ପାଇଁ ଏସ୍ଟିଏଫ୍ ଉତ୍ତରାଖଣ୍ଡର ଡେରାଡୁନ ପଠାଇ ଘଟଣାର ଅଧିକ ତଦନ୍ତ କରୁଥିବା ଜଣାପଡିଛି l ଗିରଫ ବାବୁଲିଙ୍କ ଘର ନାକଟିଦେଉଳ ଥାନା ବାଟଗାଁ ପଞ୍ଚାୟତ ଅନ୍ତର୍ଗତ କେଲୋବେର୍ଣ୍ଣି ଗ୍ରାମରେ ହୋଇଥିବା ବେଳେ ଗତ କିଛିବର୍ଷ ହେଲା ସେ ନାକଟିଦେଉଳ ହରିଜନ ସାହିର ନିଜ ଶ୍ୱଶୁର ଘରେ ରହି ଆସୁଛନ୍ତି।
