ନୂଆପଡ଼ା ଅଫିସ,୮।୪: ନୂଆପଡ଼ା ଜିଲାରେ ଗତ ପ୍ରାୟ ୧ ମାସ ହେବ ବାଘ ଆତଙ୍କ ଦେଖାଦେଇଛି। ବାଘ ଭୟରେ ଲୋକେ ସନ୍ଧ୍ୟା ନ ହେଉଣୁ ତାଟିକବାଟ ବନ୍ଦ କରି ରହୁଛନ୍ତି। ଏଭଳି ସ୍ଥିତିରେ ନୂଆପଡା ସଦର ବନ ବିଭାଗ ରେଞ୍ଜ ଅଧୀନ ଧରମବନ୍ଧା ବିଟ୍ ଚୁଲାଭାଟ ଗାଁରେ ପୁଣି ଏକ ଗାଈକୁ ବାଘ ଖାଇଥିବା ସୂଚନା ମିଳିଛି। ନୂଆପଡ଼ା ରେଞ୍ଜ ବନ ବିଭାଗ କର୍ମଚାରୀ ଘଟଣାସ୍ଥଳକୁ ଯାଇ ଗାଈର ମୃତଦେହ ବ୍ୟବଚ୍ଛେଦ ପରେ ପୋତି ଦେଇଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ଗାଁର ଗୋବର୍ଦ୍ଧନ ମାଝିଙ୍କ ଗାଈ ଜଙ୍ଗଲକୁ ଚରିବାକୁ ଯାଇଥିଲା। ସନ୍ଧ୍ୟା ପର୍ଯ୍ୟନ୍ତ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ ମଧ୍ୟ ପାଇ ନ ଥିଲେ। ଗାଁ ଲୋକେ ମହୁଲଫୁଲ ଗୋଟେଇବାକୁ ଜଙ୍ଗଲକୁ ଯିବା ସମୟରେ ଚୁଲାଭାଟ ନାଳାରେ ଗାଈର ମୃତଦେହ ପଡିଥିବା ଦେଖିବାକୁ ପାଇ ଭୟରେ ଫେରି ଆସି ଗାଁରେ କହିଥିଲେ। ଗୋବର୍ଦ୍ଧନଙ୍କ ପରିବାର ଲୋକ ଗାଈକୁ ଦେଖି ଚିହ୍ନଟ କରିଥିଲେ। ଖବର ପାଇ ବନ ବିଭାଗ କର୍ମଚାରୀମାନେ ସେଠାରେ ପହଞ୍ଚି ମୃତଗାଈର ବ୍ୟବଚ୍ଛେଦ କରାଇ ଗାତ ଖୋଳି ପୋତିଦେଇଥିଲେ। ଜିଲାର କୋମନା, ବୋଡେନ ଓ ନୂଆପଡା ବ୍ଲକକୁ ସୁନାବେଡା ଅଭୟାରଣ୍ୟ ଲାଗି ରହିଛି। ମାଓବାଦୀଙ୍କ ଭୟରେ ବନ ବିଭାଗ ଓ ବନ୍ୟପ୍ରାଣୀ ବିଭାଗ ଅଧିକାରୀ କିମ୍ବା କର୍ମଚାରୀ ଅଭୟାରଣ୍ୟକୁ ଯାଉନାହାନ୍ତି। ଅନ୍ୟପକ୍ଷେ କାଠ ମାଫିଆମାନେ ଜଙ୍ଗଲ ସଫା କରିଦେଉଥିବାରୁ ଖାଦ୍ୟ ଅନ୍ବେଷଣରେ ବନ୍ୟଜନ୍ତୁ ଗାଁ ମୁହାଁ ହେଉଛନ୍ତି। ବର୍ତ୍ତମାନ ବାଘ ଜିଲାର ୩ଟି ବ୍ଲକରେ ଗୋଟିଏ ମାସରେ ଜଣେ ବୃଦ୍ଧାଙ୍କ ସହ ୧୯ ଗୃହପାଳିତ ପ୍ରାଣୀ ମାରି ଖାଇଥିବା ବେଳେ ୨ଟି ଗୃହପାଳିତ ପ୍ରାଣୀ ମାରି ଘାଇଲା କରିଛି।