ବାରଙ୍ଗ, ୨୨।୪ (ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନର ଅନ୍ୟତମ ଆକର୍ଷଣ ବାଘୁଣୀ ରେଣୁକାର ବୁଧବାର ମୃତ୍ୟୁ ଘଟିଛି। ରେଣୁକା ଦୀର୍ଘଦିନ ଧରି ଅସୁସ୍ଥ ଥିବା କାରଣରୁ ତା’ର ମୃତ୍ୟୁ ଘଟିଲା ବୋଲି ନନ୍ଦନକାନନ ଉପନିର୍ଦ୍ଦେଶକ ବିମଳ ପ୍ରସନ୍ନ ଆଚାର୍ଯ୍ୟ କହିଛନ୍ତି। ରୋହିତ ଓ ଶୈଳଜା ଔରସରୁ ୨୦୦୮ ଫେବୃୟାରୀ ୨୮ରେ ରେଣୁକା ଓ ମନିଷ ନାମକ ୨ ଶାବକ ଜନ୍ମ ଗ୍ରହଣ କରିଥିଲେ। ହେଲେ ମନିଷ ୨୦୧୮ ସେପ୍ଟେମ୍ବର ୧ରେ ମୃତ୍ୟୁବରଣ କରିବା ପରେ ରେଣୁକା ଏକା ଥିଲା। ପରେ ଧୀରେ ଧୀରେ ରେଣୁକା ଅସୁସ୍ଥ ହେବାରେ ଲାଗିଥିଲା। ଚିକିତ୍ସା ପରେ ସ୍ବାସ୍ଥ୍ୟରେ ଉନ୍ନତି ନ ହେବାରୁ ବୁଧବାର ତା’ର ମୃତ୍ୟୁ ଘଟିଥିଲା। ରେଣୁକାକୁ ମୃତ୍ୟୁବେଳକୁ ୧୩ବର୍ଷ ହୋଇଥିଲା। ତେବେ ରେଣୁକା ନନ୍ଦନକାନନ ପାଇଁ ନୂଆ ବାଘବଂଶର ଉଦ୍ଭାବକ ସାଜିଥିଲା। ରେଣୁକା ଓ ସମ୍ରାଟର ମିଳନରୁ ୨୦୧୬ ମେ ୧୫ରେ ଏକ କଳାଲୋମଯୁକ୍ତ ଛୁଆକୁ ଜନ୍ମ ଦେଇଥିଲେ ମଧ୍ୟ ପରେ ସେ ମୃତ୍ୟୁବରଣ କରିଥିଲା। ଦ୍ୱିତୀୟଥର ପାଇଁ ଏହି ଯୋଡ଼ିଙ୍କ ମିଳନରୁ ପୁଣି ୨ଟି କଳାଲୋମଯୁକ୍ତ ଛୁଆ ୨୦୧୮ ଡିସେମ୍ବର ୨୨ରେ ଜନ୍ମ ହୋଇଥିଲା। ରେଣୁକାର ମୃତ୍ୟୁପରେ ନନ୍ଦନକାନନରେ ବାଘ ସଂଖ୍ୟା ହ୍ରାସ ପାଇ ୨୭ରେ ପହଞ୍ଚତ୍ଛି।
