ମୁମ୍ବାଇ,୨୨।୫: ଆଇପିଏଲ୍ ୨୦୨୨ ମୁମ୍ବାଇ ଇଣ୍ଡିଆନ୍ସ ପାଇଁ ନିରାଶଜନକ ରହିଥିଲେ ହେଁ ଦଳର କିଛି ଖେଳାଳି ନିଜର ବ୍ୟକ୍ତିଗତ ପ୍ରଦର୍ଶନକୁ ନେଇ ଚର୍ଚ୍ଚାରେ ଅଛନ୍ତି। ସେଥିରୁ ଜଣେ ହେଲେ ଯୁବ ବ୍ୟାଟ୍ସମ୍ୟାନ୍ ତିଳକ ବର୍ମା। ଚଳିତ ସିଜନରେ ତିଳକ ଦଳ ପାଇଁ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଛନ୍ତି। ଚମତ୍କାର ବ୍ୟାଟିଂ କରି ସେ ରିଷଭ ପନ୍ତଙ୍କ ୫ ବର୍ଷର ପୁରୁଣା ରେକର୍ଡ ନିଜ ନାମରେ କରିଛନ୍ତି। ୨୦ ବର୍ଷ ବୟସର ହେବା ପୂର୍ବରୁ ସେ ଗୋଟିଏ ସିଜନରେ ସର୍ବାଧିକ ରନ୍ ସ୍କୋର କରିଥିବା ବ୍ୟାଟ୍ସମ୍ୟାନ୍ ପାଲଟିଛନ୍ତି।
ଶନିବାର ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ ତିଳକ ୧୭ ବଲରେ ୨୧ରନ୍ର ଇନିଂସ ଖେଳିଥିଲେ। ଏହାଦ୍ୱାରା ସେ ନିଜର ଡେବ୍ୟୁ ସିଜନରେ ମୋଟ ୩୯୭ ରନ୍ ସ୍କୋର କରିବାରେ ସଫଳ ହୋଇଛନ୍ତି। ଏଥିରେ ତାଙ୍କର ୨ ଅର୍ଦ୍ଧଶତକ ରହିଛି। ତିଳକଙ୍କ ପୂର୍ବରୁ ପନ୍ତ ୨୦୧୭ରେ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଖେଳି ସିଜନ୍ରେ ୩୬୬ ରନ୍ କରିଥିଲେ। ଏବେ ପନ୍ତଙ୍କୁ ପଛରେ ପକାଇ ତିଳକ ୩୧ ରନ୍ ଅନ୍ତରରେ ନୂଆ ରେକର୍ଡ କରିଛନ୍ତି। ଏହି ତାଲିକାର ତୃତୀୟ ସ୍ଥାନରେ ଦିଲ୍ଲୀର ପୃଥ୍ବୀ ଶ ଅଛନ୍ତି। ସେ ୨୦୧୯ ସିଜନରେ ୩୫୩ ରନ୍ କରିଥିଲେ।