ଓ୍ବାଶିଂଟନ/ନୂଆଦିଲ୍ଲୀ, ୧୮।୧୨: ପୃଥିବୀରେ କରୋନା ମହାମାରୀ ଯୋଗୁ ଆତଙ୍କ ସୃଷ୍ଟି ହୋଇଛି। ନୂଆ ନୂଆ ଭାରିଆଣ୍ଟ୍ ଆସିବା ଯୋଗୁ ସଙ୍କଟ ବଢ଼ିଚାଲିଛି। ଏପରିସ୍ଥଳେ ବିଶେଷଜ୍ଞମାନେ କହିଛନ୍ତି ଯେ, କରୋନା ମହାମାରୀ ପୃଥିବୀରେ ୨୦୨୪ ପର୍ଯ୍ୟନ୍ତ ରହିବାର ଆଶଙ୍କା ରହିଛି। ଆମେରିକାର ବହୁରାଷ୍ଟ୍ରୀୟ ଭ୍ୟାକ୍ସିନ ନିର୍ମାତା ଫାଇଜର ପକ୍ଷରୁ ଏଭଳି ଚେତାବନୀ ଦିଆଯାଇଛି। କରୋନା ମହାମାରୀ ପୁଣି ୩ ବର୍ଷ ରହିବ ବୋଲି କମ୍ପାନୀର ବିଶେଷଜ୍ଞମାନେ ମତପୋଷଣ କରିଛନ୍ତି। ଓମିକ୍ରନ ଭାରିଆଣ୍ଟ ଆସିବା ପରେ ଏଭଳି ପୂର୍ବାନୁମାନ କରାଯାଇଛି। ଓମିକ୍ରନ୍ କରୋନାର ମୂଳ ଭୂତାଣୁ ଠାରୁ ୫୦ ପ୍ରତିଶତ ଅଧିକ ପରିବର୍ତ୍ତନ ହୋଇଛି। ଏହା କରୋନା ସଂକ୍ରମଣ ଲଢ଼େଇରେ ଟିକାର ଦୁଇଟି ଡୋଜର ପ୍ରଭାବକୁ ହ୍ରାସ କରି ସାରା ବିଶ୍ୱରେ ଦ୍ରୁତ ଗତିରେ ବ୍ୟାପିବାରେ ଲାଗିଛି।
ଫାଇଜରର ମୁଖ୍ୟ ବୈଜ୍ଞାନିକ ଅଧିକାରୀ ମିକେଲ ଡୋଲଷ୍ଟନ କହିଛନ୍ତି ଯେ ଆସନ୍ତା ୨ରୁ ୩ ବର୍ଷ ପର୍ଯ୍ୟନ୍ତ କରୋନା ମହାମାରୀ ଜାରି ରହିବ ବୋଲି କମ୍ପାନୀ ଆଶା କରୁଛି। ତେବେ ଟିକାକରଣର ପ୍ରଭାବ ଏବଂ ଚିକିତ୍ସା ଉପରେ ଏହାର ନୂଆ ଭାରିଆଣ୍ଟର ଗତି ନିର୍ଭର କରିବ ବୋଲି ସେ କହିଛନ୍ତି। କମ ଟିକା କରଣ ଅଞ୍ଚଳରେ ଏହାର ହାର ବଢ଼ାଇବାକୁ ପଡିବ ବୋଲି ସେ କହିଛନ୍ତି।
ଓମିକ୍ରନ ଭାରିଆଣ୍ଟର ଆସିବା ପୂର୍ବରୁ ଆମେରିକାର ଶୀର୍ଷ ରୋଗ ଚିକିତ୍ସକ ଆନ୍ଥୋନୀ ଫାଉସି ପୂର୍ବାନୁମାନ କରିଥିଲେ ଯେ ଆମେରିକାରେ ମହାମାରୀ ୨୦୨୨ରେ ଶେଷ ହେବ। କିନ୍ତୁ ନୂଆ ଭାରିଆଣ୍ଟର ସଂକ୍ରମଣ ଯେଭଳି ବୃଦ୍ଧି ପାଉଛି ତାହା ଏକ ନୂଆ ସ୍ଥିତି ସୃଷ୍ଟି କରିବାରେ ଲାଗିଛି।
ଫାଇଜର ପକ୍ଷରୁ ପ୍ରସ୍ତୁତ କରାଯାଇଥିବା ଆଣ୍ଟିଭାଇରାଲ ବଟିକା ପାକ୍ସଲୋଭିଡ କରୋନା ସଂକ୍ରମଣକୁ ରୋକିବାରେ ବେଶ୍ ପ୍ରଭାବଶାଳୀ ହେବାରେ ଲାଗିଛି। କ୍ଲିନିକାଲ ପରୀକ୍ଷଣରେ ଡାକ୍ତରଖାନାରେ ଭର୍ତ୍ତି ହେବା ଏବଂ ଗୁରୁତର କ୍ଷେତ୍ରରେ ମୃତ୍ୟୁ ହାରକୁ ଏହା ପ୍ରାୟ ୯୦ ପ୍ରତିଶତ ହ୍ରାସ କରିବାକୁ ସକ୍ଷମ ହୋଇପାରିଛି। ରିଫିନିଟିଭ୍ର ଆଇବିଇଏସ ତଥ୍ୟ ଅନୁଯାୟୀ, ତିନି ବିଶ୍ଳେଷକ ଆକଳନ କରିଛନ୍ତି ଯେ ଏହାର ବିକ୍ରି ଆସନ୍ତା ବର୍ଷ ୧୫ ବିଲିୟନରୁ ୨୫ ବିଲିୟନ ଡଲାର୍ ଛୁଇଁବ।
ଆମେରିକାର କମ୍ପାନୀ ଫାଇଜର ନିଜର କୋଭିଡ-୧୯ ଟିକା ଜର୍ମାନୀର ବାୟୋ ଏନ୍ଟେକ୍ ଏସ୍ଇ ସହିତ ମିଳିତ ଭାବେ ବିକଶିତ କରିଛି । ଆସନ୍ତା ବର୍ଷ ସୁଦ୍ଧା ୩୧ ବିଲିୟନ ଡଲାର୍ ଆୟ କରିବ ବୋଲି ଆଶା କରାଯାଉଛି। ଆସନ୍ତା ବର୍ଷ କମ୍ପାନୀ ଚାରି ବିଲିୟନ ଡୋଜ୍ ପ୍ରସ୍ତୁତ କରିବାକୁ ଯୋଜନା କରିଛି।