ଅଲେପ୍ପୋ,୭ ।୨: ସୋମବାର ସକାଳେ ଥରି ଉଠିଛି ମଧ୍ୟ-ପୂର୍ବର ୪ଟି ଦେଶ ତୁର୍କୀ, ସିରିଆ, ଲେବାନନ ଓ ଇସ୍ରାଏଲ । ସବୁଠାରୁ ଅଧିକ କ୍ଷୟକ୍ଷତି ତୁର୍କୀ ଓ ଏହାକୁ ଲାଗି ରହିଥିବା ସିରିଆରେ ହୋଇଛି । ତୁର୍କୀରେ ୧୨ ଘଣ୍ଟା ମଧ୍ୟରେ ୭ ତୀବ୍ରତାରୁ ଅଧିକ ଦୁଇଟି ଭୂକ୍ମପ ଅନୁଭୁତ ହୋଇଥିଲା । ଏଥିରେ ବଡ ବଡ କୋଠା ଧରାଶୟୀ ହୋଇଯାଇଥିଲା ।
ଆମେରିକା ଭୂଗର୍ଭ ସର୍ବେକ୍ଷଣର ରିପୋର୍ଟ ଅନୁଯାୟୀ, ତୁର୍କୀରେ ସ୍ଥାନୀୟ ସମୟ ସକାଳ ୪ଟା ୧୭ରେ ପ୍ରଥମେ ୭.୮ ତୀବ୍ରତାର ଏକ ଭୂକମ୍ପ ଅନୁଭୁତ ହୋଇଥିଲା । ଏହାର ଠିକ୍ ୧୧ ମିନିଟ ପରେ ୬. ତୀବ୍ରତାର ଆଉ ଏକ ଭୂକମ୍ପ ତୁର୍କୀକୁ ପୁଣିଥରେ ଦୋହଲାଇ ଦେଇଥିଲା । ଏହାପରେ ଦ୍ୱିପ୍ରହର ୧ଟା ୨୪ରେ ପୁଣିଥରେ ୭.୫ ତୀବ୍ରତାର ଭୂକମ୍ପ ତୁର୍କୀରେ ଅନୁଭୁତ ହୋଇଥିଲା ।
ଅନ୍ୟପଟେ ସିରିଆରେ ସ୍ଥାନୀୟ ସମୟ ସକାଳ ୪ରୁ ରାତି ୯ଟା ମଧ୍ୟରେ ପ୍ରାୟ ୫୦ରୁ ଅଧିକ ଭୂକମ୍ପ ହୋଇଛି । ଏଥିମଧ୍ୟରୁ ୪ଟିର ତୀବ୍ରତା ରିକ୍ଟର ସ୍କେଲରେ ୬ରୁ ଅଧିକ ରହିଥିବା ବେଳେ ୧୦ଟିର ତୀବ୍ରତା ୬-୭ ତୀବ୍ରତା ମଧ୍ୟରେ ରହିଥିଲା ।
ସାରା ବଶ୍ୱରେ ସୋମବାର ସନ୍ଧ୍ୟା ସୁଦ୍ଧା ପ୍ରାୟ ୭୮ ଭୂକମ୍ପ ଆସିଥିବା ରେକର୍ଡ କରାଯାଇଛି । ଏଥିରେ ସିରିଆରେ ୪୬ଟି ଭୁକମ୍ପ ଅନୁଭୁତ ହୋଇଥିବା କୁହାଯାଇଛି । ଫଳରେ ତୁର୍କୀ ଓ ସିରିଆରେ ଅନେକ ବଡ ବଡ କୋଠା ମାଟିରେ ମିଶିଯାଇଛି । ଭୂକମ୍ପ ପରେ ଏଠାରେ ବିଳମ୍ବିତ ରାତି ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଛି । ଏହି ସମୟରେ ଭଙ୍ଗା କୋଠତଳୁ ଚିତ୍କାର ଶୁଣିବାକୁ ମିଳିଛି । ଜଣେ ୟୁଟ୍ୟୁବର ଭଙ୍ଗାଘର ତଳୁ ଭିଡିଓ ପଠାଇ ବଞ୍ଚାଇବାକୁ ଗୁହାରି କରିଛନ୍ତି ।