ମେଲବର୍ନ,୧୩।୫: ଅଷ୍ଟ୍ରେଲିଆ ଟେଷ୍ଟ ଅଧିନାୟକ ଟିମ୍ ପେନ ଦାୟିତ୍ୱରୁ ହଟିବାକୁ ନେଇ ସଙ୍କେତ ଦେଇଛନ୍ତି। ଆସେସ୍ କ୍ରିକେଟ ସିରିଜରେ ଇଂଲଣ୍ଡକୁ ଯଦି ତାଙ୍କ ଦଳ ପରାସ୍ତ କରେ ତେବେ ସେ ଅଧିନାୟକ ପଦ ଛାଡ଼ିଦେବେ ବୋଲି କହିଛନ୍ତି। ଏପରିକି ସେ ଷ୍ଟିଭ୍ ସ୍ମିଥଙ୍କୁ ତାଙ୍କ ବଦଳରେ ଅଧିନାୟକ ହେବେ ବୋଲି ସେ ପରୋକ୍ଷରେ କହିଛନ୍ତି।
ଭାରତୀୟ କ୍ରିକେଟ ଟିମ୍ ବିପକ୍ଷରେ ଘରୋଇ ସିରିଜ୍ ଖେଳି ପରାଜିତ ହୋଇଥିଲା ଅଷ୍ଟ୍ରେଲିଆ। ଏହାପରଠାରୁ ପେନ୍ଙ୍କ ଉପରେ ଅଧିନାୟକ ପଦ ଛାଡ଼ିବା ନେଇ ଚାପ ରହିଛି। ସେହିଭଳି ସ୍ମିଥ୍ ପୁଣିଥରେ ଦଳର ନେତୃତ୍ୱ ନେବାକୁ ଆଶା କରି ବସିଛନ୍ତି।
ଏକ ସାକ୍ଷାତକାରରେ ପେନ୍ କହିଛନ୍ତି, ନିଶ୍ଚିତ ଭାବେ ମୁଁ ନିଷ୍ପତ୍ତି ନିଏ ନାହିଁ। ହେଲେ ଷ୍ଟିଭ୍ଙ୍କ ନେତୃତ୍ୱରେ ଯେତିକି ସମୟ ଖେଳିଛି, ତାହା ବହୁତ ଭଲ ଥିଲା। ତାଙ୍କ ପାଖରେ ବହୁତ ଅଭିଜ୍ଞତା ରହିଛି। ତାଙ୍କୁ ବହୁତ କମ୍ ବୟସରୁ ଦଳର ଦାୟିତ୍ୱ ମିଳିଥିଲା। ସେଥିପାଇଁ ସେ ପ୍ରସ୍ତୁତ ନ ଥିଲେ। ହେଲେ ଯେତେବେଳେ ମୁଁ ଆସିଲି, ସେ ନିଜକୁ ମଜଭୂତ କରିସାରିଥିଲେ। ଏହାପରେ ଦକ୍ଷିଣ ଆଫ୍ରିକା ଭଳି ଘଟଣା ହୋଇଥିଲା। ମାତ୍ର ମୁଁ ତାଙ୍କୁ ଆଗାମୀ ଅଧିନାୟକ କରାଯାଉ ବୋଲି ଚାହେଁ ବୋଲି ସେ କହିଛନ୍ତି।
ଯଦି ଚଳିତ ବର୍ଷ ଆସେସ୍ ସିରିଜ୍ରେ ଇଂଲଣ୍ଡକୁ ଅଷ୍ଟ୍ରେଲିଆ ପରାଜିତ କରେ ତେବେ ସେ ପଦ ଛାଡ଼ି ଦେବେ। ଅତିକମ୍ରେ ଆସନ୍ତା ୬ ଟେଷ୍ଟ ପର୍ଯ୍ୟନ୍ତ ଅଛି। ଇଂଲଣ୍ଡକୁ ହରାଇବା ପରେ ଯିବାର ଠିକ୍ ସମୟ ହେବ ବୋଲି ମନେକରୁଛି।
ଏହାଛଡ଼ା ଭାରତ ବିପକ୍ଷ ସିରିଜକୁ ନେଇ ସେ କହିଛନ୍ତି, ସେ ସହଜରେ ଆପଣଙ୍କ ଧ୍ୟାନ ପରିବର୍ତ୍ତନ କରିପାରନ୍ତି। ଆମେ ସେଥିରେ ଫସି ଯାଇଥିଲୁ। ସେମାନେ ଗାବା ଯିବେ ନାହିଁ ବୋଲି କହିଥିଲେ। ଏଣୁ କେଉଁଠି ଖେଳିବୁ ବୋଲି ଆମେ ଜାଣି ନ ଥିଲୁ। ଏଣୁ ଆମ ଧ୍ୟାନ ବଦଳିଥିଲା। ସେତେବେଳେ ଭାରତୀୟ ଟିମ୍ ବ୍ରିସ୍ବେନରେ ଖେଳିବାକୁ ଚାହୁଁ ନ ଥିଲେ, ମାତ୍ର ଭାରତ ଖେଳିଥିଲା ଏବଂ ଶେଷ ମ୍ୟାଚ୍ ଜିତି ଇତିହାସ ରଚିଥିଲା।
