ନୂଆଦିଲ୍ଲୀ,୨୫ା୮:ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ) ବୁଧବାର ସନ୍ଧ୍ୟାରେ ଚନ୍ଦ୍ରର ଦକ୍ଷିଣ ମେରୁରେ ଚନ୍ଦ୍ରୟାନ-୩ର ସଫଳ ସୂକ୍ଷ୍ମାବତରଣ କରାଇ ଇତିହାସ ରଚିଛି। ପୂର୍ବରୁ ରୁଷିଆ, ଆମେରିକା ଓ ଚାଇନାର ମୁନ୍ ମିଶନ ସଫଳ ହୋଇଥିବାବେଳେ ଏଭଳି ସଫଳତା ହାସଲ କରିବାରେ ଭାରତ ହେଉଛି ପ୍ରଥମ ରାଷ୍ଟ୍ର। ତେଣୁ ଭାରତୀୟମାନେ ଏହାକୁ ନେଇ ଖୁବ୍ ଉତ୍ସାହିତ ଅଛନ୍ତି। କିନ୍ତୁ ସେମାନେ ଆମେରିକାରୁ ପ୍ରକାଶିତ ‘ନ୍ୟୁୟର୍କ ଟାଇମ୍ସ’ (ଏନ୍ଓ୍ବାଇଟି)ର ଏକ ୯ ବର୍ଷ ତଳର କାର୍ଟୁନ୍କୁ ଭୁଲିପାରି ନାହାନ୍ତି।
୨୦୧୪ରେ ୪୫୦ କୋଟି ବ୍ୟୟରେ ଭାରତର ମଙ୍ଗଳ ଅଭିଯାନ ସଫଳ ହୋଇଥିଲା। ପୂର୍ବରୁ ଆମେରିକା, ରୁଷିଆ ଓ ୟୁରୋପ ମଙ୍ଗଳକୁ ଯାନ ପଠାଇଥିଲେ ହେଁ ଆନ୍ତଃ ଗ୍ରହ ମିଶନ ପାଇଁ ଭାରତ ସବୁଠୁ କମ୍ ଖର୍ଚ୍ଚ କରିଥିଲା। ମଙ୍ଗଳୟାନର ସଫଳତା ପରେ ଏନ୍ଓ୍ବାଇଟିରେ ଏକ କାର୍ଟୁନ ପ୍ରକାଶ ପାଇଥିଲା। ସେଥିରେ ଜଣେ ଭାରତୀୟ ଚାଷୀ ଏକ ଗାଈକୁ ସାଙ୍ଗରେ ଧରି ‘ଏଲିଟ୍ ସ୍ପେସ୍ କ୍ଲବ୍’ର କବାଟ ବାଡ଼ଉଛନ୍ତି। ଘର ଭିତରେ ୩ ଜଣ ସୁଟ୍ ପିନ୍ଧିଥିବା ବ୍ୟକ୍ତି (ସମ୍ଭବତଃ ଆମେରିକୀୟ ମହାକାଶ ଗବେଷଣା ସଂସ୍ଥା ନାସାର ବୈଜ୍ଞାନିକ) ବସିଥିବା ଦେଖାଯାଇଥିଲା। ସିଙ୍ଗାପୁରର ବ୍ୟଙ୍ଗ ଚିତ୍ରକର ହେଙ୍ଗ୍ କିମ୍ ସଙ୍ଗ୍ଙ୍କ ଏହି କାର୍ଟୁନର ଶୀର୍ଷକ ଥିଲା, ‘ଇଣ୍ଡିଆଜ୍ ବଜେଟ୍ ମିଶନ ଟୁ ମାର୍ସ’। ଚନ୍ଦ୍ରୟାନ-୩ର ସଫଳତା ପରେ ଉତ୍ସବ ମନାଉଥିବା ଭାରତୀୟ ନେଟିଜେନ୍ମାନେ ସେହି ପୁରୁଣା ଫଟୋକୁ ମନେପକାଇ ନ୍ୟୁୟର୍କ ଟାଇମ୍ସକୁ ବୈଷମ୍ୟବାଦୀ ଖବରକାଗଜର ଆଖ୍ୟା ଦେଇଛନ୍ତି। ସେମାନେ କହଛନ୍ତି, ଏନ୍ଓ୍ବାଇଟି ପାଇଁ ଏବେ ନୂଆ କାର୍ଟୁନ ପ୍ରକାଶ କରିବାର ସମୟ ଉପନୀତ।
