ମେଲବୋର୍ନ,୨୧।୧୧: ପେସର ପାଟ କୁମିନ୍ସଙ୍କୁ ଅଷ୍ଟ୍ରେଲିଆ ଟେଷ୍ଟ ଦଳର ନେତୃତ୍ୱ ଦେବାର ସମୟ ଆସିଯାଇଛି। ଏଭଳି କହିଛନ୍ତି ଅଷ୍ଟ୍ରେଲିଆର କିମ୍ବଦନ୍ତୀ ଲେଗ୍ ସ୍ପିନର ଶେନ ଓ୍ବର୍ନ।
ଶୁକ୍ରବାର ଟେଷ୍ଟ ଦଳର ଅଧିନାୟକ ପଦରୁ ଇସ୍ତଫା ଦେଇଛନ୍ତି ଉଇକେଟକିପର ଟିମ୍ ପେନ। ୪ ବର୍ଷ ତଳେ ସେ ଜଣେ ମହିଳାଙ୍କୁ ଅଶ୍ଳୀଳ ଫଟୋ ପଠାଇଥିଲେ। ଏହି ମାମଲାରେ ପୂର୍ବରୁ ତାଙ୍କୁ ଦୋଷମୁକ୍ତ କରାଯାଇଥିଲା। କିନ୍ତୁ ଉକ୍ତ ଫଟୋ ପୁଣି ଥରେ ସର୍ବସମ୍ମୁଖକୁ ଆସିବାରୁ ଗଣମାଧ୍ୟମ ଆଗରେ ଅଧିନାୟକ ପଦରୁ ଇସ୍ତଫା ଦେଇଥିଲେ ପାଇନ। ନେତୃତ୍ୱରେ ତାଙ୍କୁ ଉପ ଅଧିନାୟକ ଭାବେ ସାହାଯ୍ୟ କରିଥିଲେ କୁମିନ୍ସ। ୨୦୧୧ରେ ପଦାର୍ପଣ କରିଥିବା ୨୮ ବର୍ଷୀୟ ପେସର ଏପର୍ଯ୍ୟନ୍ତ ୩୨ ଟେଷ୍ଟରେ ୧୬୪ ଉଇକେଟ ନେଇଛନ୍ତି।
”ମୋ ମତରେ କୁମିନ୍ସଙ୍କୁ ନେତୃତ୍ୱ ଦାୟିତ୍ୱ ଦେବା ଲାଗି ଏହା ଉଚିତ ସମୟ। ଏ ସମ୍ପର୍କରେ ମୁଁ ଶୁକ୍ରବାର ପୂର୍ବରୁ ଚିନ୍ତା କରିଥିଲି। ପାଇନଙ୍କ ଅନୁପସ୍ଥିତିରେ ଅଷ୍ଟ୍ରେଲିଆର ପୋଷ୍ଟର ବୟ କୁମିନ୍ସଙ୍କୁ ଅଧିନାୟକ ପଦ ଦିଆଯିବା ଉଚିତ ହେବ। ଉଇକେଟକିପର ଭାବେ ମାଥ୍ୟୁ ଓ୍ବେଡ, ଜୋଶ ଇଙ୍ଗଲିସ କିମ୍ବା ଆଲେକ୍ସ କ୍ୟାରିଙ୍କ ମଧ୍ୟରୁ ଜଣଙ୍କୁ ସୁଯୋଗ ଦିଆଯିବା ଦରକାର। ମୁଁ ଇଙ୍ଗଲିସ ସମର୍ଥନ କରିବି। ଉଇକେଟ ପଛରେ ତାଙ୍କର ଭଲ ଦକ୍ଷତା ରହିଛି। ଏହା ସହିତ ସେ ଜଣେ ୩୬୦ ଡିଗ୍ରୀ ବ୍ୟାଟର। ଗତ ସିଜନରେ ଓ୍ବେଷ୍ଟର୍ନ ଅଷ୍ଟ୍ରେଲିଆ ପାଇଁ ସେ ୩ ଶତକ ଲଗାଇଥିଲେ। ଏଣୁ ତାଙ୍କୁ ଦଳରେ ସାମିଲ କରାଯାଉ“ ବୋଲି ଓ୍ବର୍ନ କହିଛନ୍ତି।
