ସିଡନୀ,୪।୧: ଭାରତ ଏବଂ ଅଷ୍ଟ୍ରେଲିଆର ମଧ୍ୟ ଚାଲିଥିବା ବର୍ଡର-ଗାଭାସ୍କର ସିରିଜ ମଧ୍ୟରେ ଏକ ବିବାଦ ସାମ୍ନାକୁ ଆସିଛି। ଟିମ ଇଣ୍ଡିଆର କିଛି ଖେଳାଳି ମେଲବୋର୍ନର ହୋଟେଲରେ ଖାଇବାକୁ ଯାଇଥିଲେ। ସେଠାରେ ବାୟୋ ବବୁଲ ଭାଙ୍ଗିବାକୁ ନେଇ ବିବାଦ ସାମ୍ନାକୁ ଆସିଥିଲା ଏବଂ ସେହି ଖବର ଆସିବା ପରେ ବ୍ରିସବେନ୍ରେ କରୋନାକୁ ନେଇ କଡ଼ା ନିୟମ ପାଳନ କରାଯାଉଥିବାରୁ ଟିମ ଇଣ୍ଡିଆ ସେଠାରେ ଟେଷ୍ଟ ମ୍ୟାଚ ଖେଳିବାକୁ ଚାହୁଁନାହିଁ। ଏହି ଦୁଇଟି ମାମଲା ପରେ ଲାଗୁଛି ଯେ କ୍ରିକେଟ ଅଷ୍ଟ୍ରେଲିଆ ଏବଂ ବିସିସିଆଇ ମଧ୍ୟରେ କଳହ ସୃଷ୍ଟି କରିବ ଏବଂ ସିରିଜ ଉପରେ ବିପଦ ରହିଛି। ଏହି ଦୁଇଟି ବିବାଦ ମଧ୍ୟରେ ଇଂଲଣ୍ଡ କ୍ରିକେଟର୍ ଜୋଫ୍ରା ଆର୍ଚରଙ୍କ ଟୁଇଟ୍ ଏବେ ଭାଇରାଲ ହେବାରେ ଲାଗିଛି। ଭାରତ-ଅଷ୍ଟ୍ରେଲିଆ ସିରିଜ ସହିତ ସଂଯୁକ୍ତ ହୋଇଥିବା ଜୋଫ୍ରା ଆର୍ଚର ଏକ ଟୁଇଟ କରିଛନ୍ତି। ଜାନୁଆରୀ ୨ରେ ଜୋଫ୍ରା ଆର୍ଚର ଟୁଇଟ୍ କରି କହିଛନ୍ତି, ‘ବ୍ୟାଗ ପ୍ୟାକ କରିବାର ସମୟ ଆସିଛି।’ ପ୍ରଶଂସକମାନେ ଏହି ଟୁଇଟ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ସିରିଜ୍ ବିଷୟରେ ବୋଲି ଚର୍ଚ୍ଚା କରୁଛନ୍ତି। ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ତୃତୀୟ ଟେଷ୍ଟ ମ୍ୟାଚ ଜାନୁଆରୀ ୭ରୁ ସିଡନୀରେ ଖେଳାଯିବ।