କୋଲକାତା,୨୯।୭: ପଶ୍ଚିମବଙ୍ଗ ସ୍କୁଲ ସେବା କମିଶନ(ଏସ୍ଏସ୍ସି) ନିଯୁକ୍ତି ଦୁର୍ନୀତି ମାମଲାରେ ଗିରଫ ହେବା ପରେ ମନ୍ତ୍ରୀପଦ ହରାଇଛନ୍ତି ପାର୍ଥ ଚାଟାର୍ଜୀ। ଏପରିକି ତାଙ୍କୁ ଟିଏମ୍ସିରୁ ମଧ୍ୟ ନିଲମ୍ବନ କରାଯାଇଛି। ଏବେ ସେ ଇଡି ହେପାଜତରେ ଥିବା ବେଳେ ପ୍ରଥମ ଥର ପାଇଁ ନିଜର ପ୍ରତିକ୍ରିୟା ରଖିଛନ୍ତି। ଦଳର ନିଷ୍ପତ୍ତି ନେଇ ପଚରାଯିବାରେ ସେ ‘ ସମୟ ହିଁ ସବୁକିଛି କହିବ’ ବୋଲି କହିଛନ୍ତି।
ପ୍ରକାଶ ଯେ, ସ୍କୁଲ ନିଯୁକ୍ତି ଦୁର୍ନୀତି ସମୟରେ ପାର୍ଥ ଶିକ୍ଷାମନ୍ତ୍ରୀ ଥିଲେ। ସେତେବେଳେ ନିଯୁକ୍ତି ପ୍ରଦାନ ଲାଗି ଆଶାୟୀ ପ୍ରାର୍ଥୀଙ୍କଠାରୁ କୋଟି କୋଟି ଟଙ୍କା ଆଦାୟ କରାଯାଇଥିଲା। ଉକ୍ତ ମାମଲାରେ ଇଡି ପାର୍ଥଙ୍କୁ ଗିରଫ କରିଥିଲା। ପରେ ତାଙ୍କ ସହଯୋଗୀ ଅର୍ପିତା ମୁଖାର୍ଜୀଙ୍କର ଦୁଇଟି ଘର ଉପରେ ଇଡି ଚଢ଼ାଉ କରି ୫୦ କୋଟି ନଗଦ ଟଙ୍କା ସହ ୫ କିଗ୍ରା ସୁନା ଜବତ କରିଥିଲା। ଏବେ ଉଭୟ ଇଡି ହେପାଜତରେ ଥିବା ବେଳେ ଘଟଣାର ତଦନ୍ତ ଚାଲିଛି।
