ବମ୍ବେ: ବ୍ୟବସାୟୀ ପରିବାରର ହୋଇଥିଲେ ହେଁ ଅଭିନେତ୍ରୀଙ୍କ ପ୍ରେମରେ ପଡ଼ିଥିଲେ ଅନିଲ ଅମ୍ବାନୀ। ଏକ ବିବାହରେ ଅତିଥି ଭାବେ ଯୋଗ ଦେଇଥିଲେ ଟିନା। କଳା ରଙ୍ଗର ଶାଢ଼ି ପିନ୍ଧିଥିଲେ ସେ। ପ୍ରଥମ ଦେଖାରେ ଟିନାଙ୍କୁ ପସନ୍ଦ କରିଥିଲେ ଅନିଲ। ଏହାପରେ ଆମେରିକାରେ ଉଭୟଙ୍କ ଦ୍ୱିତୀୟ ଭେଟ ହୋଇଥିଲା। ଅନିଲ ତାଙ୍କୁ ବୁଲି ଯିବାକୁ କହିଥିଲେ। ହେଲେ ଟିନା ମନା କରିଦେଇଥିଲେ। ଏହାଜାଣିପାରି ଟିନାଙ୍କ ଭଣଜା ଅନିଲଙ୍କୁ ଭେଟିବାକୁ ଚାପ ପକାଇଥିଲେ। ସେତେବେଳେ ଅନେକ ଫିଲ୍ମ ଫ୍ଲପ୍ ହୋଇଥିବା କାରଣରୁ ସେ କାହାକୁ ଭେଟିବାକୁ ଚାହୁଁ ନ ଥିଲେ।
ଅନିଲ-ଟିନାଙ୍କ ମଧ୍ୟରେ ସବୁକିଛି ଠିକ୍ ହୋଇ ଆସୁଥିବା ବେଳେ ପରିବାରଲୋକେ ସେମାନଙ୍କ ସମ୍ପର୍କକୁ ଗ୍ରହଣ କରି ନ ଥିଲେ। ଯେତେ ବୁଝାଇଲେ ବି ଜବାବ ନା ମିଳିଥିଲା। ଏକଥା ଅନିଲ ଟିନାଙ୍କୁ କହିଥିଲେ। ଶେଷରେ ସେମାନେ ପରସ୍ପର ସହ ଚାରି ବର୍ଷ ଯାଏ କଥା ହୋଇ ନ ଥିଲେ। ଏହାପରେ ଟିନା ଆମେରିକା ଚାଲିଯାଇଥିଲେ। ସେଠାରେ ଭୂମିକମ୍ପ ହୋଇଥିବା ଖବର ମିଳିଥିଲା। ଏହା ଜାଣି ଅନିଲ ଫୋନ୍ କରି ଟିନା କିଭଳି ଅଛନ୍ତି ପଚାରିଥିଲେ। ଏତେ ଦିନ ପରେ ଉଭୟ ଉଭୟଙ୍କ କଥା ଶୁଣିବା ପରେ ହୃଦୟ ତରଳିଥିଲା। ପୁଣିଥରେ ସେମାନେ ଏକାଠି ହୋଇଥିଲେ।
ପରିବାରଲୋକେ ଅନ୍ୟତ୍ର ବିବାହ ଠିକ୍ କଲେ ହେଁ ରାଜି ହୋଇ ନ ଥିଲେ ଅନିଲ। ଶେଷରେ ବାଧ୍ୟ ହୋଇ ଟିନାଙ୍କୁ ବୋହୂ କରିବାକୁ ସେମାନେ ହଁ କହିଥିଲେ। ଏହାପରେ ଟିନା ଭାରତ ଫେରିଥିଲେ। ଅନିଲ ଟିନାଙ୍କ ଘରକୁ ଯାଇ ବିବାହ ପ୍ରସ୍ତାବ ଦେଇଥିଲେ। ୧୯୯୧ରେ ଉଭୟ ବିବାହ କରିନେଇଥିଲେ।