ତିରୁପତି, ୨୫।୯ : ବିଶ୍ୱର ସବୁଠାରୁ ଧନୀ ହିନ୍ଦୁ ପୂଜା ସ୍ଥଳ ତିରୁମାଲା ତିରୁପତି ଦେବସ୍ଥାନମ (ଟିଟିଡି) ଘୋଷଣା କରିଛି ଯେ ଏହାର ସମଗ୍ର ଦେଶରେ ୯୬୦ଟି ସମ୍ପତ୍ତି ରହିଛି। ଯାହାର ମୂଲ୍ୟ ୮୫,୭୦୫ କୋଟି ଟଙ୍କା। ଗଣମାଧ୍ୟମ ରିପୋର୍ଟ ଅନୁସାରେ ସରକାରୀ ଆକଳନ ଏବଂ ବଜାର ମୂଲ୍ୟ ହିସାବରେ ସମ୍ପତ୍ତିଗୁଡିକ ଅତି କମରେ ଦେଢ଼ ଗୁଣା ଅଧିକ ହୋଇ ପ୍ରାୟ ୨ ଲକ୍ଷ କୋଟି ଟଙ୍କା ହେବ। ଟିଟିଡି ପକ୍ଷରୁ ଆନୁଷ୍ଠାନିକ ଭାବରେ ସମ୍ପତ୍ତିର ବିବରଣୀ ସାର୍ବଜନୀନ କରାଯାଇଛି।
ତିରୁମାଲା ତିରୁପତି ଦେବସ୍ଥାନମଙ୍କ ସଦ୍ୟତମ ତଥ୍ୟ ଏପରି ଏକ ସମୟରେ ଆସିଛି ଯେତେବେଳେ ଗତ ପାଞ୍ଚ ମାସ ଧରି ମନ୍ଦିର ହୁଣ୍ଡିକୁ ଦାନ ମାଧ୍ୟମରେ ଟିଟିଡିର ମାସିକ ଆୟରେ କ୍ରମାଗତ ବୃଦ୍ଧି ଘଟିଛି। ଚଳିତ ବର୍ଷ ଏପ୍ରିଲରୁ ବର୍ତ୍ତମାନ ପର୍ଯ୍ୟନ୍ତ ହୁଣ୍ଡି ମାଧ୍ୟମରେ ମୋଟ ଦାନ ୭୦୦କୋଟି ଟଙ୍କା ଅତିକ୍ରମ କରିଛି।
ଏହାର ଟ୍ରେଜେରୀରେ ଦିନକୁ ଦିନ ବୃଦ୍ଧି ସହିତ ଟିଟଡି ଆମେରିକା ଭଳି କିଛି ଦେଶ ବ୍ୟତୀତ ଦେଶର ବିଭିନ୍ନ ସ୍ଥାନରେ ମନ୍ଦିର ନିର୍ମାଣ କରୁଛି। ଟିଟିଡି ଅଧ୍ୟକ୍ଷ ୟୁ.ଭି ସୁବା ରେଡ୍ଡୀ ଶନିବାର କହିଛନ୍ତି ଯେ ମନ୍ଦିର ଟ୍ରଷ୍ଟର ସାରା ଦେଶରେ ୭,୧୨୩ ଏକର ଜମି ରହିଛି। ସେ କହିଛନ୍ତି ଯେ ୧୯୭୪ ରୁ ୨୦୧୪ ମଧ୍ୟରେ, ବିଭିନ୍ନ ସରକାରଙ୍କ କାର୍ଯ୍ୟକାଳ ମଧ୍ୟରେ,ଟିଟିଡର ଟ୍ରଷ୍ଟ ୧୧୩ ବିଭିନ୍ନ ସମ୍ପତ୍ତି ବିକ୍ରି ହୋଇଛି। ତେବେ ସମ୍ପତ୍ତି ବିକ୍ରୟ ହେବାର କାରଣ ସମ୍ପର୍କରେ ସେ ସ୍ପଷ୍ଟ କରିନାହାଁନ୍ତି।
ସୁବା ରେଡ୍ଡୀ କହିଛନ୍ତି ଯେ ୨୦୧୪ ପରେ ଟିଟିଡି କୌଣସି ସମ୍ପତ୍ତିକୁ ବିକ୍ରି କରି ନାହିଁ ଏବଂ ଭବିଷ୍ୟତରେ ଏହାର କୌଣସି ଅସ୍ଥାବର ସମ୍ପତ୍ତି ବିକ୍ରୟ କରିବାର ଯୋଜନା ନାହିଁ। ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁଯାୟୀ ଟ୍ରଷ୍ଟ ବୋର୍ଡ ପ୍ରତିବର୍ଷ ଟିଟିଡି ସମ୍ପତ୍ତି ଉପରେ ଏକ ଶ୍ୱେତପତ୍ର ଦେବାକୁ ନିଷ୍ପତ୍ତି ଗ୍ରହଣ କରାଯାଇଥିଲା। ଗତ ବର୍ଷ ପ୍ରଥମ ଶ୍ୱେତପତ୍ର ରିଲିଜ ହୋଇଥିବାବେଳେ ଦ୍ୱିତୀୟ ଶ୍ୱେତପତ୍ର ଟିଟିଡି ୱେବସାଇଟରେ ସମସ୍ତ ସମ୍ପତ୍ତିର ସବିଶେଷ ତଥ୍ୟ ଏବଂ ମୂଲ୍ୟାଙ୍କନ ସହିତ ଅପଲୋଡ ହୋଇଛି। ବିଭିନ୍ନ ବ୍ୟାଙ୍କରେ ୧୪୦୦୦ କୋଟି ଟଙ୍କାରୁ ଅଧିକ ଫିକ୍ସଡ ଜମା ରହିଛି। ସେହିପରି ୧୪ ଟନର ସୁନା ଭଣ୍ଡାର ରହିଛି।