ହାଇଦ୍ରାବାଦ,୮।୮ : ତିରୁମାଲା ତିରୁପତି ଦେବସ୍ଥାନମ ବିଭିନ୍ନ ବିକାଶମୂଳକ ପ୍ରକଳ୍ପ ପାଇଁ 300 କୋଟି ଟଙ୍କା ଖର୍ଚ୍ଚ କରିବେ। ବିଦାୟୀ ଟ୍ରଷ୍ଟ ବୋର୍ଡର ଚେୟାରମ୍ୟାନ ଓ୍ବାଇ ଭି ସୁବା ରେଡ୍ଡୀ ଏସମ୍ପର୍କରେ ସୂଚନା ପ୍ରଦାନ କରିଛନ୍ତି। ତାଙ୍କ ଅଧ୍ୟକ୍ଷତାରେ ବୋର୍ଡର ଶେଷ ବୈଠକରେ ରେଡ୍ଡୀ କହିଛନ୍ତି ତିରୁପତିଠାରେ ନିର୍ମିତ ଶ୍ରୀ ପଦ୍ମାବତୀ ଚିଲଡ୍ରେନ ହାର୍ଟ ସେଣ୍ଟର ପାଇଁ ୭୬ କୋଟି ଟଙ୍କା ମୂଲ୍ୟର ଉପକରଣ କ୍ରୟ କରାଯାଉଛି। ସଡ଼କ ଦୁର୍ଘଟଣାକୁ ଏଡାଇବା ପାଇଁ ଉଭୟ ଘାଟ ରାସ୍ତାରେ ସୁରକ୍ଷା କାନ୍ଥ ନିର୍ମାଣ ପାଇଁ ୨୪ କୋଟି ଟଙ୍କା ଖର୍ଚ୍ଚ ହେଉଛି।
ରିପୋର୍ଟ ଅନୁଯାୟୀ, ତିରୁପତିସ୍ଥିତ ଶ୍ରୀ ଭେଙ୍କଟେଶ୍ୱର ମନ୍ଦିରର ସଂରକ୍ଷକ ତିରୁମାଲା ତିରୁପତି ଦେବସ୍ଥାନମ (ଟିଟିଡି) ତିରୁମାଲାରେ ବୈକୁଣ୍ଠମ କମ୍ପ୍ଲେକ୍ସ ପରି ତିରୁଚାନୁରରେ ଭକ୍ତଙ୍କ ପାଇଁ କମ୍ପ୍ଲେକ୍ସ ନିର୍ମାଣ ପାଇଁ ୨୩.୫ କୋଟି ଟଙ୍କା ଖର୍ଚ୍ଚ କରିବେ। ଏସୟୁ ଆୟୁର୍ବେଦିକ ହସ୍ପିଟାଲରେ ଅତିରିକ୍ତ ମହଲା ନିର୍ମାଣ ପାଇଁ ୧୪ କୋଟି ଟଙ୍କା ଖର୍ଚ୍ଚ ହେଉଛି। ସେହିପରି ଆୟୁର୍ବେଦିକ ମହାବିଦ୍ୟାଳୟର ବାଳିକା ହଷ୍ଟେଲରେ ଆଉ ଦୁଇଟି ମହଲା ନିର୍ମାଣ ପାଇଁ ୩ କୋଟି ଟଙ୍କା ଆବଣ୍ଟନ କରାଯାଇଛି।
ରେଡ୍ଡୀ କହିଛନ୍ତି ଏସଭି କଲେଜ ଅଫ ମ୍ୟୁଜିକ ଆଣ୍ଡ ଡ୍ୟାନ୍ସରେ ବାଳକ ହଷ୍ଟେଲ ନିର୍ମାଣରେ ୧୧ କୋଟି ଟଙ୍କା ଏବଂ ଶ୍ରୀବାଣୀ ଟ୍ରଷ୍ଟ ପାଣ୍ଠି ସହିତ ଭାକୁଲମାଥା ମନ୍ଦିରରେ ବିକାଶ କାର୍ଯ୍ୟ ପାଇଁ ୧୦ କୋଟି ଟଙ୍କା ବ୍ୟବହାର କରାଯିବ। ଏଥିସହ ଶ୍ରୀନିବାସ ସେତୁ ପ୍ରକଳ୍ପର ଅନ୍ତିମ ପର୍ଯ୍ୟାୟ ପାଇଁ ଶ୍ରୀବାଣୀ ଟ୍ରଷ୍ଟ ପାଣ୍ଠି ଅଧୀନରେ ୨୬ଟି ମନ୍ଦିର ନିର୍ମାଣ ପାଇଁ ୧୧୯ କୋଟି ଟଙ୍କା ପ୍ରଦାନ କରାଯିବ। ଟିଟିଡି ଚେୟାରମ୍ୟାନ ଭାବରେ ଲଗାତାର ଦୁଇ ଥର କାର୍ଯ୍ୟ ଶେଷ କରିଥିବା ସୁବା ରେଡ୍ଡୀଙ୍କୁ ତାଙ୍କ ସ୍ଥାନରେ ଓ୍ବାଇଏସଆରସିପି ନେତା ତଥା ତିରୁପତି ବିଧାୟକ ଭୁମନା କରୁଣାକର ରେଡ୍ଡୀ କାର୍ଯ୍ୟ କରିବେ।
