ଭୁବନେଶ୍ୱର,୨୦।୮ (ସୂର୍ଯ୍ୟକାନ୍ତ ବେହେରା)କମିଶନରେଟ ପୋଲିସର ସ୍ବତନ୍ତ୍ର କ୍ରାଇମ ୟୁନିଟ୍ ପାଣ୍ଡରାରେ ଚଢ଼ାଉ କରି ନିଶା ରାକେଟର ପର୍ଦ୍ଦାଫାଶ କରିଛି। ଏହାସହ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନଙ୍କଠାରୁ ୩୫୦ ଗ୍ରାମ ବ୍ରାଉନସୁଗାର, ଗୋଟିଏ ଦେଶୀ ପିସ୍ତଲ, ତିନି ରାଉଣ୍ଡ ଗୁଳି, ୫ଟି ମୋବାଇଲ, ନଗଦ ୪ ହଜାର ୪୦୦ ଟଙ୍କା ଆଦି ଜବତ କରିଛି। ଅଭିଯୁକ୍ତମାନେ ହେଲେ କେନ୍ଦ୍ରାପଡା ରାଜନଗରର ଅଶ୍ରୁମୋଚନ ରାଉତ, ଖୋର୍ଦ୍ଧା ଅଞ୍ଚଳର ମୀନକେତନ ବେହେରା ଓ କେଉଁଝର ଆନନ୍ଦପୁରର ଅଭିଳାଷ ମିଶ୍ର। ଏମାନଙ୍କ ମଧ୍ୟରେ ଅଶ୍ରୁମୋଚନ ବିଟେକ ଗ୍ରାଜୁଏଟ ହୋଇଥିବାବେଳେ ଅଭିଳାଷ ହେଉଛନ୍ତି ଡିପ୍ଲୋମାଧାରୀ ଓ ମୀନକେତନ ଜଣେ ବସ୍ ଡ୍ରାଇଭର ବୋଲି ଜଣାପଡିଛି। ତେବେ ଜବତ ନିଶାଦ୍ରବ୍ୟର ମୂଲ୍ୟ ୩୫ ଲକ୍ଷ ଟଙ୍କା ହେବ। ଜାମିନ ନାମଞ୍ଜୁର ହେବାରୁ ସମସ୍ତ ଅଭିଯୁକ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏମାନେ ଟିଟୋ ଗ୍ୟାଙ୍ଗ୍ ଲିଙ୍କ୍ରେ ଥିବା ପୋଲିସ ସୂଚନା ପାଇବା ପରେ ଘଟଣାକୁ ଗୁରୁତ୍ୱର ସହ ନେଇ ତଦନ୍ତକୁ ତ୍ୱରାନ୍ବିତ କରିଛି। ଅଭିଯୁକ୍ତମାନେ ଓଡ଼ିଶା ସମେତ ଅନ୍ୟ ରାଜ୍ୟରେ ନିଶାଦ୍ରବ୍ୟ ସହ ଅସ୍ତ୍ରଶସ୍ତ୍ର ଓ ବେଆଇନ ଅର୍ଥ କାରବାର କରୁଥିବା ଆଶଙ୍କା କରାଯାଉଛି। ତେଣୁ ସ୍ପେଶାଲ କ୍ରାଇମ ୟୁନିଟ୍ ଅଭିଯୁକ୍ତମାନଙ୍କୁ ରିମାଣ୍ଡରେ ଆଣିବାକୁ ଯୋଜନା କରିଛି ।
ସୂଚନାନୁସାରେ, ପାଣ୍ଡରା ଅଞ୍ଚଳରେ ଲୋକଙ୍କୁ ବ୍ରାଉନସୁଗାର ବିକ୍ରି କରୁଥିବାବେଳେ ପ୍ରଥମେ ଅଭିଯୁକ୍ତ ମୀନକେତନ ଓ ଅଭିଳାଷଙ୍କୁ ପୋଲିସ ଗିରଫ କରିଥିଲା। ସେମାନଙ୍କଠାରୁ ୬ଟି ଛୋଟ ପ୍ୟାକେଟ (୫ ଗ୍ରାମ) ବ୍ରାଉନସୁଗାର ଜବତ କରାଯାଇଥିଲା। ପଚରାଉଚରା ପରେ ଅଭିଯୁକ୍ତଦ୍ୱୟ ଏହି ନିଶାଦ୍ରବ୍ୟ ଅଶ୍ରୁମୋଚନଙ୍କଠାରୁ ଆଣି ପ୍ରତ୍ୟେକ ପ୍ୟାକେଟ ପିଛା ୬୦୦ ଟଙ୍କାରେ ବିକ୍ରି କରୁଥିଲେ। ପରେ ପ୍ରାଚୀ ବିହାରର ଅଭିଯୁକ୍ତ ଅଶ୍ରୁମୋଚନଙ୍କ ଘରେ ଚଢ଼ାଉକରି ପୋଲିସ ତାଙ୍କୁ କାବୁକରିବା ସହ ୩୦୪ ଗ୍ରାମ ବ୍ରାଉନସୁଗାର, ଗୋଟିଏ ଦେଶୀ ବନ୍ଧୁକ ସହ ଅନ୍ୟାନ୍ୟ ସାମଗ୍ରୀ ଜବତ କରିଥିଲା।