କଟକ ଅଫିସ,୧୪ ।୧୧: ଦାଦାବଟି ମାମଲାରେ ଦରଘାବଜାର ପୋଲିସ ଗ୍ୟାଙ୍ଗଷ୍ଟର ଟିଟୋଙ୍କ ସହଯୋଗୀ ବାଙ୍କା ବଜାରର ମୁନା ଲାଡେନ୍ ଓରଫ ସୟଦ ମୁତାକ୍ୱିଦଙ୍କୁ ଗିରଫ କରିଛି। ତାଙ୍କ ନିକଟରୁ ଗୋଟିଏ ୯ ଏମ୍ଏମ୍ ପିସ୍ତଲ, ୬ ରାଉଣ୍ଡ ଗୁଳି, ମାଗାଜିନ ଓ ମୋବାଇଲ ଫୋନ ଜବତ କରାଯାଇଛି। ଏ ନେଇ ଏକ ମାମଲ ା(ନଂ.୧୨୦/୨୦) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ୫ ଲକ୍ଷ ଟଙ୍କା ବଟି ଲାଗି ଗୁରୁବାର ରାତିରେ ମୁନା ଲାଡେନ ଜନୈକ ବ୍ୟକ୍ତିଙ୍କ ମୁଣ୍ଡରେ ପିସ୍ତଲ ଲଗାଇଥିଲେ। ଖବରପାଇ ପୋଲିସ ଟିମ୍ ଗୌରୀଶଙ୍କର ପାର୍କ ପଛ ପଟ ଅନ୍ଧାରିଆ ସ୍ଥାନରେ ଚଢଉ କରି ତାଙ୍କୁ ଗିରଫ କରିଥିଲା। ମାତ୍ର ତାଙ୍କ ସହଯୋଗୀ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଅଭିଯୁକ୍ତଙ୍କୁ ଥାନାକୁ ଆଣି ଜେରା କରିବା ପରେ ପୂରା ଘଟଣାର ଖୁଲାସା ହୋଇଥିଲା। କଟକ ସହରରେ କେନ୍ଦ୍ରାପଡାର ଗ୍ୟାଙ୍ଗଷ୍ଟର ଟିଟୋ ଓରଫ ସୟଦ ଉସ୍ମାନ ଅଲ୍ଲୀର ପତିଆରା ବୃଦ୍ଧି କରିବାରେ ମୁନା ଲାଡେନର ପ୍ରମୁଖ ଭୂମିକା ଥିଲା। ଟିଟୋ ନିର୍ଦ୍ଦେଶରେ ମୁନା ଲାଡେନ ସହରରେ ଟେଣ୍ଡର ଫିକ୍ସିଂ, ଦାଦାବଟି, ଅପହରଣ କରି ଟଙ୍କା ଅସୁଲ କରୁଥିଲେ। ଏହାଛଡା ସେ ବେଆଇନ ଅସ୍ତ୍ରଶସ୍ତ୍ର ଓ ନିଶା ଚାଲାଣ ବି କରୁଥିଲା। ଟିଟୋର ଛତ୍ରଛାୟାରେ ରହି ମୁନା ଲାଡେନ କଟକ ସହରରେ ନିଜର ଆପରାଧୀକ ସାମ୍ରାଜ୍ୟ ବିସ୍ତାର କରିଥିବା ଜଣାପଡିଛି। ପୂର୍ବରୁ ତାଙ୍କ ନଁାରେ କେନ୍ଦ୍ରାପଡା, ଲାଲ୍ବାଗ, ଚାଉଳିଆଗଞ୍ଜ, ମର୍କତନଗର ଓ ଦରଘାବଜାର ଥାନାରେ ୧୨ଟି ଅପରାଧୀକ
ମାମଲା ରହିଥିବା ଜଣାପଡିଛି।
